Jelemiia 1 - O Mikanda Ikola

O kixanu kia Jelemiia ni kisuma kiê kia dianga

¹ Maka ma Jelemiia, monʼa Hilikiia ua tokala ku jinganga ja kexi mu Anathothe, moxi ia Bejamí.

² Kua muene kuene kuejile kizuelu kia Jihova, mu izuua ia Joziia, monʼa Amoni, sobha ia Juda mu muvu ua kakuinhi niʼtatu ua utuminu uê.

³ Anga ki mu iza ue mu izuua ia Jehoiakimi, monʼa Joziia, sobha ia Juda, katé bhu bhuilu dia muvu ua kakuinhi ni umoxi ua Zedekiia, monʼa Joziia sobha ia Juda; katé Jeluzaleme kia mu ambata ku ubhika mu mbeji ia katanu.

⁴ Kienhiki, kizuelu kia Jihova kia ngi sange, kixi:

⁵ Kioso ngoho kiluua ngi kʼumba mu vumu dia mamʼenu, eme nga kuʼijiia kiá, kioso ue kiluua ngó u tunda mu vumu nga ku lumbu kiá; nga ku bhana ku akua jixi kukala u musesedi uâ.

⁶ Eme bhenhobho ngixi: Èlé! Ngana Nzambi, tata! Talesa-ze, eme ki ngiʼjiia kuzuela; mbata ngala ngi mona-ndenge,

⁷ maji Jihova ua ngambela, uixi: Kana kuila: eme ngi monʼa-ndenge: mbata kuoso eme ku ngi ku tuma, uia; o ioso i ngi ku tuma, ua kà i zuela.

⁸ Ku kale ni uoma bhu phola iâ, mbata ememuène ngi kala ni eie phala ku ku kudila, Jihova ua ki tange.

⁹ Jihova iú ua sunununa o lukuaku luê, anga u ngi tuta ku dikanu; anga Jihova u ngambela uixi: Tala, ngi ta maka mami mu kanu dié.

¹⁰ Iala! lelu dienhidi, ngala ku ku imika ku thandu dia akua-jixi, ni ku thandu dia mautuminu, phala u thathumune, u lundumune, u buikise, ni u bhange jingundu; luamukuá ue, phala u tungise u kunise.

¹¹ Kua ngi tula dingi kizuelu kia Jihova, kixi: ua mono-hi, Jelemiia? Eme phe ngixi: ngalu mona luthangu lua mumendouela.

¹² Anga Jihova u ngambela uixi: Eie ua mono muene kiambote, mbata eme ngi langidila muene kizuelu kiami phala ku ki kumbidila.

¹³ Kizuelu kia Jihova anga ki ngi tula lua kaiadi, kixi: Eie ua mono-hi? eme phe ngixi: ngalu mona ímbia ia mu fulujuka, iene-phe ia lungu dikanu ku mbandu ia suku.

¹⁴ Jihova phe u ngambela uixi: Ku suku kuenhoko kuene kua-nda ku tunda kisunji hinu ki tula ku thandu dia athu oso a tunga mu ngongo.

¹⁵ Kuma talesaze, eme ngi kasa madiembu ma jimbanza joso ku suku, eme jihova; ene a-nda kuiza mbanza ni mbanza i tula kiandu kiê bhu muelu ua mabhitu ma Jeluzaleme, o imbaka iê a i kondoloka muene, ni jimbonge joso ja Juda a ji bilukila.

¹⁶ Eme-phe nga kà a zuelesa ni njinda mu kufundisa kuami; mukonda dia ufusa uâ; mbata ene a ngi xisa eme iá a ximika uasu ua dizumba ku jinzambi jengi, iá a kuata ku diundila ikalakalu ia maku mâ.

¹⁷ Eie-phe ndoko u di kute phonda mu mbunda, nda u balumuke u a tangele ioso i ngi ku tuma: kana ngó ku kala ni kekenha bhu pholo iâ, kuma eme nga kà bhangesa kuila eie kukala ni uoma bhu pholo iâ.

¹⁸ Mbata, talesaze, lelu ngala ku ku bhanga u mbonge ia difikidila, u ngunji ia felu u imbaka ia ngondo, ulue ni oxi iosololo, jisobha ja Juda u ji lue, makota mâ u ma lue, jinganga jê u ji lue, povo iaʼxi u i lue,

¹⁹ Ene-phe a-nda ku bhangela ku ku lua, maji katena ku ku tolola eie; mbata eme ngala ni eie bhuamoxi, phala ku ku kudila, Eme ngi Jihova.