I Timote 6 - O Mikanda Ikola

¹ Oso ala abhika, ala bhoxi dia ophi, a fuama a bhane jingana jâ ujitu uoso, phala ki ki bhekele kuẋonguena o dijina dia Nzambi, ni ulongelu uetu.

² Oso ue ala ni jingana jâ ja xikana kiá, ka a tobhese mukonda dia kukala jiphange jâ mua Ngana. Inda a bete ku a kalakela, mukonda o jingana a-ndu tambula o ikalakalu iâ iambote, ala axikani, phange jâ ja kazola. Imʼiii ia bhingi u i tendelela.

O ulongelu ua makutu ni umvuama ua kidi

³ Se bhu kala muthu u kuata kulonga ulongelu uengi, ka xikana o maka madisanze, maka ma Jezú Kristu, Ngana ietu, ni ulongelu uetu ua kuxila Nzambi,

⁴ muenhó ua nanuka ni ukumbu ua mu kuata, kejiia kima. Muthu u kala kiokio ua juuala ni jiphata ni jimvunda ja kuzuela. Ima kala iii i bhekela dixinga, ni kuzoka, ni kuxinga, ni kufika ima iaiibha,

⁵ ni kuhoia kua kambe mbàmbe kua athu a bolo kilunji, a tokoka o kidi. Athu kala kiki a fika kuila o kubheza (Nzambi) mubhetu ua kumuena umvuama. Athu a kala kiki, a sondoloke.

⁶ Kuma kia kidi kiene, o kuxila Nzambi-phe ni kutululuka kuê, nganhu muene ia dikota, kabasa muthu ua tena kusanguluka ni kioso kiala na-kiu.

⁷ Mukonda mu ngongʼumu ki tueza-mu ni kima, ki tua-ndu tena ue kuambatamu kima!

⁸ Kala kiki, se tua mono-phe kia kudia ni kia kudivunga, ima ienhiʼii i tu soke.

⁹ Mukonda oso-phe a bhindamena kukala jimvuama, ene kudibhala mu kudianguka, anga a fua mu mubhetu, ni mu jihânji javulu jaiibha ji tobhesa, ji bheka muthu mu kusenguluka anga u jikinina mu dibuikilu.

¹⁰ Kuma o luimbi lua kitadi, luene lundanji lu bhana o ima ioso iaiibha. Amoxi-moxi-phe, mukonda dia kudisunga mu ku ki kuata, a jimbila o kuxikana, ia a di toma mu mavuua mavulu mukuâ ni jisongo.

Kulongesa ni kulekelela

¹¹ Maji eie-phe u muthu ua Nzambi, ima ienhiʼii lenga-iu. U kaiele jinge o kuiuka, o kuxila Nzambi, o kuxikana, o kuzola, o kukolokota ni kubelesela.

¹² ʼLua o ita iambote ia kuxikana, naminina o muenhu ki uabhue. Kuma kiene Nzambi kia kuixanena, kioso eie mu kuxikana kué ki ua fisalele bhu pholo ia jimbangi javulu.

¹³ O kiki nga ku tendelela bhu mesu ma Nzambi, u bhana ima ioso kukala ni muenhu, ni bhu mesu ma Jezú Kristu, ua fisalele umbangi uambote bhu pholo ia Pônsio Pilatu, kuila:

¹⁴ Aiuka o kijila kioso kia ku tumu, sè ngó kisemu, sè bhuma bhua tena ku ku éla, katé bhua kà tukulukila Ngana ietu Jezú Kristu.

¹⁵ Mukonda Nzambi bhu thembu iê ioso ia mono, ua kà bhitisa imʼiii, Nzambi mukua mbote, muène ubheka uê, Diama, Sobha ia jisobha, Ngana ia jingana.

¹⁶ Muène ngó ubhekèlele uê uavu o muenhu ki uene mbambe. Nzambi ua tunga mu mukengeji ki u xikina ku u bhixila. Nuka muthu ua mu muene, ka tena ku mu mona. O ujitu ni uzonda sè dizubhilu, u kale jinge uangene ua muène! Amén.

¹⁷ Oso ala jimvuama mu ngongʼumu, a tendelele, ka di kake, ka dielele o jimbongo ja makutuʼiji, ki ji tena kubhandulula kima. Maji a dielele Nzambi, Ió ua tena ku tu bhana kumona kia nzungule o ima ioso ia kuzediua phala o mbote ietu.

¹⁸ A tume kuila a bhange jinge o mbote, mbé a kale ni umvuama ua ikalakalu iafuama, ende ni kubhana, ende ni kubindumuna akuá oso kala ni kima.

¹⁹ Mu kubhanga kiki, a kale mu lunda dimanenu diambote katé bhu thembu ia hàdia, phala kienhokio a tene kunganhala muenhu, uene o muenhu ua kidi.

²⁰ Timote, tata! Aiuka kiambote kioso kia ku bhana kulunda. Ditune jinge o kubuabuala kua ulalu kua ibhila Nzambi, ni kukuata jiphata ja uoua u exana ene exi unjimu, manhi unjimu ua makutu.

²¹ Mbata amoxi-moxi a di ximana kuila o unjimu uenhú ala na-u, maji kienhiki kiene kia a bhekesa kuila o njila ia kuxikana a i lueza. O kiadi kia Nzambi ki kale ni enu oso ku mualʼoko.