I Timote 3 - O Mikanda Ikola

Kioso ki kala Jibispo

¹ O iá maka a kidi kiene: Se muthu uinda kididi kia bispo, uendi ufunu uambote.

² Bispo-phe u bhinga ka kala ni kima kia ku mu elêsa na-kiu. U kala mukua muhatu uê umoxi, u kala mukua kilunji, mukua sonhi, mukua ujitu. U kala mukua kulangeka asonhi, muthu uala hete ia kulonga.

³ Ka kale mukua kukodiua mba kiiala kia thathamana, maji u bhinga u kala mukua kilendu, ua xididika. Ka kale mukua luimbi lua kitadi.

⁴ Maji u kala muthu ua tena kutumina kiambote o dibhata diêmuène, ni kubhangesa kuila anʼê a kala mu ku mu tumaka ni ujitu uoso.

⁵ Kuma muthu kia kamba kuijiia kutumina o dibhata diê-muène, u tambula kiebhi o konda ia Ngeleja ia Nzambi?

⁶ O bispo ka kale muthu ua diela kindala, sumba uzangalala, o kuzangalala kuê hé ku mu bhekela izala, nʼa di bhale mu kuêla uila kia bhitile kua Diabhu.

⁷ Ki bhinga ue athu ku kanga a mu bhela umbangi uambote, mbebhu ku pholo ku aia ka di bhale mu malebhu, ni mu mubhetu ua Diabhu.

O madiiakono

⁸ Madiiakono ue kiomuène, a kale jifiiele, ka kale akua kuzuela luiadi. Ka kale athu ejidila kunua vinhu iavulu, ka kale injenje mba akua luimbi lua nganhu iaxidi.

⁹ Ki bhinga ene a kuata o kidi kia kikutu kia kuxikana ni kitongoluelu kiazele.

¹⁰ Ki bhinga ue a dianga hanji ku a lola, nʼa bokone kiua mu udiiakono ua kusedivila o Ngeleja, se ka a mono ni kikuma.

¹¹ Ahatuʼâ ue ki bhinga a kala jifiiele, ka kale ni jimbuèmbue. A kale ku mesu a zele, a kumbidile jinge mu ima ioso.

¹² Madiiakono a mu sedivila mu Ngeleja, a kale kala muthu mukua muhatuʼê umoxi, a kale athu a tena kutumina kiambote anʼâ ni mabhata mâ.

¹³ Mukonda oso a sedivila kiambote ku udiiakono, a nganhala ditala diambote, kuma a soko-bho kùbhua uôma mu kubhana umbangi ua kuxikana kuâ kuene na-ku mua Kristu Jezú.

Kijingano kia dikota

¹⁴ Nga ku sonekena imʼiii, kiosuʼiki nga dielela ku ku sanga kindala.

¹⁵ O ki kala-phe ngi bhanga hanji izuua, mukanda iú u ku idikiza kioso kia tokala kukala athu mʼonzo ia Nzambi, kuma o inzo iê iene o ngeleja ia Nzambi ia muenhu, o philadi ni disesa kua tula o kidi.

¹⁶ Kia kidi kiene, kana muthu u tena kudituna-kiu kuila o kijingano kia ubhezelu uetu mua Nzambi kia dikota muene: Muène ua tukulukila mu kidifuanganu kia athu, o Nzumbi ia Nzambi ua mu tange kuila ualungu, o muène a mu mono kuala o ji-anju. A mu kola muʼaxaxe ka akua jixi, o mundu mu ngongo ua mu xikana, ia a mu tambula ku diulu ku ungana.