I Timote 2 - O Mikanda Ikola

O kusambela athu oso kua Nzambi

¹ Nga ku ambela-phe kuma, ku ima ioso, ku dianga o kubheza, ni kusamba, ni kusamba, ni kusakidila Nzambi mukonda dia athu oso.

² Kua tokala kubhingila jisobha, ni oso ala ni kijingo kia kutumina, phala tu tene kutunga ni muẋima ua batama, sè kavuanza, sè jimvunda, mu ujitu ni uendelu uaiuka.

³ Kienhiki kima kiambote, o Nzambi, Mubhuludi uetu, kiene kia mu uabhela.

⁴ Muène mukua kumesena kuila athu oso a bhuluke, eze mu kuijiia o kidi.

⁵ Mukonda sai-ku Nzambi imoxi ngó, ni Mubhangedi umoxi ngó u bhita bhu kaxi ka Nzambi ni athu—muène o muthu Jezú Kristu,

⁶ ua di bhele kíximbi kia ku tu kula etu ene oso. O iú uene umbangi uê uaxalela, ua bhana bhu thembu ioso ia tokala, kuila Nzambi uendi athu oso a bhuluka.

⁷ Kiene kia bhangesa ku ngi katula eme mu kukala Poxolo, ni kukala mesene ia oso ka tokala mu muiji ua Jijudé. Mbé ku a tudila o njimbu ia kuxikana ni ia kidi. O ki nga mu zuelʼiki-phe ki makutu, nga tange kidi.

⁸ Uila kiki, nga mesena kuila athu oso a di bhakula kua Ngana Nzambi, a sambe jinge ku ididi ioso, o mu kusamba a tena kuleka o maku mazele sè kizembu sè jimvunda.

⁹ Kiene ue, nginda ahatu a kemba ni izuatu ia fuama muthu ua sonhi, a kala jinjimu. Kana kukemba ni usamuinu ua bhônzo, mba matunda a ulu, mba ni jiphélula, ni izuatu iate kitadi kiavulu.

¹⁰ Maji kota uzuatelu ua kubhanga ima iambote, kala kia fuama ahatu a sola kuxila Nzambi.

¹¹ O ahatu a di longe ni kudixibha ni kubelesela.

¹² Eme o muhatu ki ngi mu ehela kukuata kulonga, mba kutambula ukota ua kutumina o diiala. Ahatu kikale a batame.

¹³ Kuma a diangele ku mu bhanga Adá, Eva ua kaiela.

¹⁴ Adá ue ka mu nganalele, a mu nganalele o muhatu, iú ua tuamena kutondala o kijila kia Nzambi.

¹⁵ Kiene ue kimoxi, muhatu hàdia ua kà bhulukila mu kuvuala ana, se u jijila kuenda mu kuxikana, ni mu henda, ni mu kukuata kilunji, ni mu kuzela moxi.