I Tesalonika 4 - O Mikanda Ikola

Phaulu u longesa o kuzela muẋima, ku di zola ni jiphange, ni kukalakala ni maku

¹ O kiki, enu jiphange, mua di longo kiá kokuetu kioso ki mua tokala kuenda ni kuuabhela Nzambi. Enʼuenu kiene kiá ki mua mu kuenda. Kala kiki, tua mi bhingi, tua mi longesa dingi mu dijina dia Ngana Jezú, kolokotenu ni ku ki bhanga jinga dingi kiavulu.

² Mukonda enu muejiia o mutendelelu u tua mi xila mua Ngana Jezú.

³ Kuma o vondadi ia Nzambi ienʼ iii, kuila: Mu zela muẋima, o undumbu mu ueha.

⁴ Phala kala muthu mudienu ejiie kutambula kiambote konda ia muhatuʼê mu kikexilu kia kuzela ni ujitu.

⁵ Kana ni huinga ia hânji iaiibha ia ufusa, kala ki bhanga ió ka xikana, a kambe kuijiia Nzambi.

⁶ Bhu kaẋʼ abha-phe, ki bhu kale muthu u somboka, mba u bhanga mukuâ phulu mu maka kala iá, kuma Ngana muzokedi a ima ioso iii. Kikiphe tua mi dimuna dingi kala ki tua diangele ku mi dimuna, ni ku mi bhana umbangi, kuma Muène hinu ua ka bhana kaxtiku kua oso a bhanga ima kala iii.

⁷ Kuma Nzambi ka tu ixanena kulaia mu ufusa, maji ua tu ixanena kulaia mu kuzela.

⁸ Uila kiki, uoso ua ditunu o ulongelu iú, ki muthu a mu ditunu, maji ua ditunu Nzambi mukua ku mi tumikisa o Nzumbi iê Ikôla.

⁹ O kia kukala ni henda ia jiphange a xikana, ki mu bhingi ngó muthu ku mi sonekena-kiu. Mbata enʼuenu mua di longo kiá kua Nzambi o ku di zola mudienu.

¹⁰ Kiene ki mua mu londekesa ku mbandu joso kuila mua di zolo muene ni jiphange joso ku Masedonia. Tua mi tangela-phe, jiphange, phala mu vule ku ki bhanga jinga.

¹¹ Kolokotenu ni kusota o kutululuka, mu suue imbamba ienu-enu ia mi tokala, mu kalakale ni maku, uila ki tua mi tendelela kiá.

¹² Phala mu ende ni athu ku kanga kioso kia fuama; enʼuenu ue, ki mu bhindame ni kima.

O kuiza kua Ngana

¹³ Tuinda-phe, enu jiphange, kuila ki mu kambe kuijiia kikexilu kia ió oso aia ku kilu, phala ki mu kale ni mukondo kala athu amukuâ ka moneka kia dielela.

¹⁴ Kuma etu tua xikana kuila Jezú ua fuile iú ua fukunuka. Kiene ue kimoxi oso a fuila mu kuxikana Jezú, Nzambi ua kà a bheka dingi kumoxi ni Jezú muene.

¹⁵ Tua mi ambela kala kia longa jinga muene Ngana, kuma etu oso tuala ku muenhu, oso tua xala-ku katé bhu kizuua bhua kejiia Ngana, ki tu di fike kuila tua kà tuamenena akuetu aia ku kilu.

¹⁶ Kuma Ngana muene ua kà tuluka ku diulu, ni kutesa nzongo, ni dizui dia kota dia ji-anju, ni koloneta ia Nzambi. Bheniobho o madifundu a fila mu kuxikana Kristu, ene a kà dinga kufukunuka.

¹⁷ O kia kà zubha o kufukunuka, ni etu tuala ku muenhu, tua xala-ku, tua kà zangumuka kumoxi ni ene ku matuta, phala kutakana ni Ngana mu dimbinza. Kieniokio tuà kaiela-ku kiá kumoxi ni Ngana.

¹⁸ Uila kiki, di kondienu o malamba mudienu ni maka enʼiâ.