I Tesalonika 3 - O Mikanda Ikola

¹ O ku tu ejilʼuku, kuila o hele ia tu kumu kiá, ki tu tena kukinga dingi kithangana.

² Hé tu kana kuxala ubheka uetu mu Atena. Anga tu katula phangʼ ietu Timote, ngunza ia Nzambi, mukalakadi ni mukuetu mu kutula o Njimbu Iambote ia Kristu, tua mu tumu phala ku mi suinisa mu kuxikana kuenu,

³ mbé ki bhu kale muthu mudienu u bhuila nʼa vutuke ku dima mukonda dia jihadi ni izudidiku. Kuma enʼuenu mua kʼ ijiia kuila a tu xindila-ju kuala Nzambi, mukonda iene ue o vondadi iê phala etu.

⁴ Kia kidi kiene, kuma ni ki nga kexile ku mualʼ oko, nga mi tangelele-kiu kuila tuanda kutala hadi! O ku pholo kunu-phe mua ki mono muene kuila kiene kia bhiti!

⁵ Mukonda dia kiki, eme uami kia ngi kumu o kukala ni héle ia kuxala ubheka, eme nga tumine Timote kuijiia kioso ki mua mu kuenda mu kuxikana kuenu. Sumbala o Diabhu ue ka tena ku mi diangula kinéne, o kukalakala kuetu kuoso ni ku-iê ngó!

⁶ Timote-phe kia tu sange kunu kindalʼ iki, ua tundu ku mualʼ oko, ua tu bhekela hundu iambote ia kuxikana kuenu ni henda ienu, kuma hanji mua tu lembalala kiambote, mua tu indi ku tu mona mesu, kala etu ue ki tua mʼindi enu.

⁷ Mukonda dia kiki, enu jiphange, muẋima ua tu tula mu kutata kuetu ni jihadi, mù kuivua o kuxikana kuenu.

⁸ Kuma ki tualʼ iki, enu se mu kolokota mua Ngana, etu ue tu laia ni kidi muene.

⁹ O kiki ngʼila kiebhi mu kusakidila Nzambi kala kia tokala mukonda dienu, mukonda dia ngalasa ioso i tua mi tanena bhu pholo ia Nzambi ietu!

¹⁰ Ni usuku ni muanha ngala kusamba ni kujiza, phala tu mi mone dingi o jipholo, ni tu mi zubhile ioso ia kambe mu kuxikana kuenu.

¹¹ Kiki-phe Nzambi ietu, Tata ietu muene, ni Ngana ietu Jezú Kristu, a lungise o njila ietu ko kuenu, phala tuie ku mi kunda.

¹² Enu-phe Ngana a mi bandekese, a mi vudisile dingi o henda ienu mudienu ni athu oso. O henda ienu ieneʼ oio i kule dingi kinéne, kala o henda ietu i tua mi kala na-iu.

¹³ Phala o muène a mi kuatese miẋima mu kuzela ku kamba kuêla, bhu pholo ia Nzambi ietu, Tatʼetu, katé bhuoso bhua kà tukulukila Ngana ietu Jezú kumoxi ni akua Ngana oso.