I Samuuele 9 - O Mikanda Ikola

Saúlu mu sota jibûlu uia kua Samuuele

¹ Kienhiki ku kala muthu, mukua Bejamí, dijina diê Kiji, monʼa Abiiele, monʼa Zelodi, monʼa Bekolate, monʼa Afiia, mukua muiji ua Bejamí, diiala dia nguzu.

² Muenhú anga u kala ni monʼê ua diiala, dijina diê Saúlo, munzangala ua uabha iu uadisanze kiambote; muʼaxaxi ka anʼa Izalaiele kanamu muthu ua mu tundu mu kuuabha ni kudisanza, o mu kitala mundu uoso a mu suku ngó bhu isuxi.

³ Tatʼâ Kiji anga u kala ni jibûlu ja mu jimbila. Kiji anga u ambela monʼê Saúlo, uixi: Katula muthu ku akua mbèle, uie-nê, mu kulumuke, mu-ie mu sota o jibûlu.

⁴ Anga u bhita mu milundu mu ixi ia Ifalaime, u bhita mʼoxi ia Saliza, maji ka ji mono; anga a bhita dingi mʼoxi ia Salime, maji ue ki ja moneka-mu; anga u bhita dingi mʼoxi ia Bejamí, maji a ji tokoka.

⁵ O kieza mʼoxi ia Sufe, Saúlo u ambela mukuambèle uala-nê uixi: Ndoko tu vutula kiá; se tu kamba kuvutuka tatʼetu u eha o kuxinganeka jibûlu, hé u kala ni hele ietuʼetu.

⁶ Mukua-mbèle anga u mu ambela, uixi: Talesa-ze bhu bhata bhabha bhuala mukua Nzambi, muthu a mu kala ni ujitu uavulu; muene kioso kia tanga ki ki kambe kubhita; tuie-bhu hanji, imoxi muene u tu ambela ioso njila ietu ia tokala i tu kuata.

⁷ Saúlo-phe u ambela mukua mbèle iê, uixi: Se tuedi tuia-bhu, tu mu bhekela-hi? Huta ia tu bhu, o ujitu ua tu kambe ua kubhana ku mukua Nzambi, ihi dingi ia tu xala-ku?

⁸ Mukua-mbèle anga u kumbulula, uambela Saúlo, uixi: Talesa-ze bhu lukuaku luami nga kuata hanji kuarto ia xikulu ia phalata; kitadi kiki kiene ki ngi bhana ku mukua Nzambi phala a tu jimbuile o njila.

⁹ Mʼokulu-phe mu Izalaiele, muthu se uedi uia kuzambula kua Nzambi, uila uixi: Tuie ku mumoni; kuma uoso kiki a mu ixana Polofeta, mʼokulu a kexe ku mu ila Mukua kumona.

¹⁰ Saúlo bhenhobho u ambela mukua-mbèle iê, uixi: Ua zuela kiambote; tuie-bhu. Anga aia mu mbonge mua tungu o muthu ua Nzambi.

¹¹ Mu kubanda-phe bhu thala ia mbonge, a takana ni ana ilumba ala kuia kuteka menha, anga a ebhula, exi: Mumoni iú koko?

¹² Anʼa ilumba a kumbulula, exi: Iú koko; uala ku pholo ienu kuenhoko; endelenu-ku, kuma lelu muene ua bhixila bhu bhata bhabha, mukonda akua bhata ala ni sata lelu ku thala kuná.

¹³ Mua-nda kuila mu tukuluka ngó mu nzunga, mu takana-nê kindala kioso kiluua a banda ku thala mu kúdia; kuma akua bhata ka xikina luua kúdia katé muene kia benzela o sata; kiene kiua ki adia, oso a a kuvitala. Bandenu kiá, kiki kiene o kithangana kia kutakana-nê.

¹⁴ Anga a banda mu mbonge; o kia zubha kutula mu mbonge, a mona Samuuele iú, muene u takana-nâ mu kutunda phala kuia ku thala.

¹⁵ Jihova-phe ua diangele kulongesa Samuuele, kizuua kia kuila Saúlo mungu ua-nda kuiza, uixi:

¹⁶ Mungu mu kumbi kala mumu nga-nda ku ku tumikisa muthu, mukua ʼxi ia Bejamí, eie-phe u mu unda ni maji, phala a kale mutuameneni ua mundu uami Izalaiele; muene uà bhulula o mundu uami bhu maku ma akua Fidíxia; kuma mundu uami nga a zambuila dingi mesu, eme nga a tongolola dingi, o ngololo iâ ia ngi bhixila.

¹⁷ Samuuele-phe kioso kia mono Saúlo, Jihova ua mu ambela, uixi: Muthu iú muene nga ku tangela-nê! Muene ua tokala, ua-nda kutumina o mundu uami.

¹⁸ Bhenhobho Saúlo anga u zukama kua Samuuele bhu dibokuenu dia bhata, uixi: Ngi tangele hanji, nga ku diondo, o inzo ia mumonhi iala kuebhi?

¹⁹ Samuuele anga u vutuila Saúlo, uixi: Eme muene ngi mumonhi; ngi tuamenenienu ku thala, kuma enu lelu mua-nda kúdia ni eme; o mungu kiene kiua ki ngi mi sulula, kioso ki ngi ku tangela ioso ia ku kala ku muxima.

²⁰ O jibûlu-phe jedi lelu tatu tunde ki ja jimbila, ku ji te dingi muxima; kuma a ji bongo kiá. O ima ioso ia beta kuuabha mu Izalaiele-phe ia tokala kua nanhi? Oko eie muene, ni dibhata dioso dia tatʼenu.

²¹ Saúlo anga u kumbulula, uixi: Eme ki ngi mukua muiji ua Bejamí, o kasule ka miiji ioso ia Izalaiele? O família iami ue ki iene kasule ka jifamília joso ja muiji ua Bejamí? Eie-phe u ngi zuelesela-hi kiki?

²² Samuuele anga u tambulula Saúlu, ni mukua mbele iê, u a bheka mu sala ia usonhi, hé ua xikamesa mu ididi ia ukota ia tundu ia akuá oso a a kuvitala; o ene ala makuinhi atatu a muthu.

²³ Samuuele anga u ambela mulambi ua kexi kulamba, uixi: Bheka xitu i nga ku bhele, i nga ku ambelele, ngixi: Bhaka-iu hanji bhu mbandu.

²⁴ Mulambi anga u katula kinama kia thulu ni xitu iala-ku, anga u ki tudila Saúlu. Samuuele anga u zuela, uixi: Ienhoio o mbandu iê i tua ku bhakelele! Tambula-iu u i die, mukonda eie muene a ku bhakela-iu, phala mu kumbi didi di tua xindi, kuila diene dia ku kuvitala o mundu. Kala kiki, Saúlu u dia kumoxi ni Samuuele kizuua kienhokio.

²⁵ Kia zubha kutunda ku thala kuenhoko, eza dingi bhu bhata, anga Samuuele u di kunda ni Saúlu bhu thandu diaʼnzo bhua xikama.

²⁶ Ki kúkia mu kimenemene, Samuuele anga u di meneka u ixana Saúlo ku thandu dia ʼnzo, uixi: Balumuka, ngi ku xinjikile. Saúlo ua balumuka, anga kiiadi kiâ a tunda.

²⁷ O kia zubha kukulumuka katé bhua suku o dibhata, Samuuele u ambela Saúlo, uixi: Mukua-mbèle ié mu tume a tu tuamenene ku pholo, mukua-mbèle anga u tuamena. Uixi-phe: Eie muene imana hanji, phala ngi kuivise o kizuelu kia tange Nzambi.