I Samuuele 8 - O Mikanda Ikola

Akua Izalaiele a bhinga sobha iâ

¹ Anga ki bhita kuila, ku izuua iavulu-phe, Samuuele kuila ua kuka kiá, u bhangesa anʼê kukala afundixi a Izalaiele.

² Thungunu iê dijina diê Jouele, o kiúbha kiê Abiia; anga a kala afundixi mu Beleseba.

³ Anʼé-phe anga a fula kuendela mu njila jê, a bhambukila mu luimbi lua kuinda nganhu ia mangonha, a tambula kitadi kia a felesela jinga, milonga anga aia ni ku i bhengelekela muengi.

⁴ Kienhokio adiakimi oso a Izalaiele a di bhongolola kumoxi, hé eza kua Samuuele bhu Lama;

⁵ anga a mu ambela, exi: Talesa, eie ua kuka kiá, o anʼê-phe kala kuendela mu njila jê. Tu ialesele sobha ietu, i kala mu tu fúndisa kala mu jixi jamukuá.

⁶ Hundu ienhiʼii-phe i iibhila Samuuele, ki edi, exi: Tu bhane sobha ietu i tu fundise. Samuuele anga u samba kua Jihova.

⁷ Jihova anga u ambela Samuuele, uixi: A evue; dízui dia mundu ku di tènde, mu ioso ia ku ambela; kuma ki eie a ku ditunu, a ngi ditunu Eme, mbé ki ngi kale dingi ngi sobha iâ.

⁸ Kia kaiela mu imbamba iâ ioso iene kubhanga, tunde kizuua ki nga a katula mu Ijito katé kizuua kia lelu, kuma a ngi baluka, a bhikila nzambi jengi, eie ue kiene kiala ku ku bhanga.

⁹ Kiki-phe a evue dizui diâ; maji eie-phe ua a ambela kidi kioso, u a lomboluela ni muanu kioso kia-ndu kala o utuminu ua sobha iâ, uoso anda ku mu hingisa.

¹⁰ Samuuele anga u kunda mundu uoso a mu bhingi sobha, o maka mosuʼama ma Jihova.

¹¹ Anga uamba, uixi: Sobha mua-nda ku mu hingisa, utuminu uê uà kala kiki: U mi tambula anʼenu a mala, ua a bhanga makuenze ma makalu mê ma ita, ni ma jikabalo jê, a kala makuenze mê ma kusonguela o makalu mê ma ita.

¹² Momuenu ua kà tumbika-mu jikabhitangu jitumina jimidi, ji tumina makuinhi atanu; amoxi ua a tuma kudima mavuʼê, ni kumuna jimbutu jê, kusula jifelu jê ja ita, ni jifelu jê ja makalu.

¹³ Anʼenu a ahatu ue ua kà a tambula mu kala jikidiiada jê ja kuiudika nguendu ia dizumba, ni ja ku mu lambela, ni ja ku mu bhangela jimbolo.

¹⁴ Ni mábhia menu, ni mivide i mua phaphe, ni midiva, ioso ia uabhabhu u i tambula u i bhana jiselevende jê.

¹⁵ Ni jimbutu jenu, ni mivide ienu, u mi tambula-ku dijimu diê, hé u bhana ku jikabhitangu jê ni jiselevende jê.

¹⁶ U mi tambula ue abhikʼenu a mala ni abhikenu a ahatu, ni minzangala ienu iadisanze-mu kiambote, ni jibûlu jenu, hé u a tuma mu sedivisu iê.

¹⁷ Ku ibhaku ienu u tambula-ku dijimu; enʼuenu mu kala mu kala mu abhikʼê.

¹⁸ Mua kà dikola kizuua kienokio, mukonda dia sobha ienu mua mu solele; Jihova-phe ka kà mi vutuila kizuua kienokio.

¹⁹ Mundu-phe aditunu dízui dia Samuuele; exi: Kana; tu kala muene ni sobha i tu tumina,

²⁰ phala tu sokele ni akua jixi jamukuá, sobha ietu nʼa kale mu tu fundisa, a tu kale ue ku pholo, a tu bhângele mu ita.

²¹ Samuuele anga u ivua maka mosoʼama, u ma kundila mu mátui ma Jihova.

²² Jihova anga ambela Samuuele, uixi: A évue dízui diâ, u a ialesele sobha, i kale mu ku a tumina. Samuuele anga u ambela mala ma Izalaiele, uixi: Muanganenu kala muthu ku bhata diê.