I Samuuele 7 - O Mikanda Ikola

¹ Kienhokio mala a akua Kidiate-Jadime anga eza, a takana álaka ia Jihova, a i bheka mʼonzo ia Abinadabe bhu kalundu mu Ngabahe, anga a lumbila monʼê Eliiazale phala kulanga o álaka ia Jihova.

Samuuele ubhomba Izalaiele kudiela

² A nga ki bhita kuila, tunde kizuua kia tula álaka mu Kidiate-Jadime, thembu iê i lebha, kuma bhua bhiti makuinhi aiadi a mivu; muiji uoso ua Izalaiele aia ni ku ditata anga akala mu didila Jihova.

³ Samuuele anga u zuela ni muiji uoso ua Izalaiele, uixi: Se muedi mu vutuka kua Jihova ni muẋima uenu uoso, hé mu tubhula jinzambi ja matumbu ni Axitalote muʼaxaxi kenu, ni mu lunge mixima ienu kua Jihova, ni mu mu bhikile muene ngó ubheka uê; muene-phe u mi kudila bhu maku ma akua Fidíxia.

⁴ Kienhokio anʼa Izalaiele anga a tubhula ni Jibaale ni Axitalote, a kala mu bhikila ngó Jihova ubheka uê.

⁵ Samuuele anga u zuela dingi, uixi: Bhongololenu Izalaiele ioso bhu Mixipa, phala eme ngi mi sambele kua Jihova.

⁶ Anga a bhongoloka bhu Mixipa, a teka menha, a ma lunduluila bhu pholo ia Jihova, a fula kúdia kizuua kienhókio, a fisala, exi: Tua te ituxi kua Jihova. Samuuele anga u kala mu fundisa anʼa Izalaiele bhu Mixipa.

Akua Fidíxia a a tolola

⁷ Akua Fidíxia-phe ki evu kuila anʼa Izalaiele a bhongolokela bhu Mixipa, jisobha ja akua Fidíxia ji tunda mu kúlua ni Izalaiele. Anʼa Izalaiele kia kʼivu a kala ni uoma ua akua Fidíxia.

⁸ Anʼa Izalaiele anga ambela Samuuele, exi: Kana kuzumbuka ku tu kolela kua Jihova Nzambi ietu, phala a tu bhulule bhu maku ma akua Fidíxia.

⁹ Samuuele anga u kuata kambudi hanji kala mu kuámua, u ka bhana mu sata ia muvimba ia kuoha kua Jihova; Samuuele anga udikola ubhingila Izalaiele kua Jihova; Jihova anga u itaia.

¹⁰ Anga ki bhita kuila, kiosuʼiki Samuuele kiala kubhana o sata ia kuoha, akua Fidíxia a tula, eza mu kúlua ni Izalaiele; Jihova-phe u numina kizuua kienokio ni kinuminu kia dízui diê dia dikota ku thandu dia akua Fidíxia, hé ua dimbulula ni uoma uavulu a lenga malusolo; anga a toloka bhu pholo ia akua Izalaiele.

¹¹ Mala ma Izalaiele-phe anga a tunda bhu Mixipa a kaia akua Fidíxia, a a beta, katé mu honga, mu luiji lua Betekale.

¹² Samuuele anga u katula ditadi u dʼimika bhu kaẋi ka Mixipa ni Sene, anga u di luka dijina dia Ebenezele, kífua uixi: Katé bhu tuezʼabha, Jihova muene ua tu kuatekesa.

¹³ Kienhiki akua Fidíxia a toloka, ka somboka dingi mbámbe ia Izalaiele; o Lukuaku lua Jihova anga lu kala ku thandu dia akua Fidíxia izuua ioso ia Samuuele.

¹⁴ Mabhata moso ma Izalaiele ma tambuile kuala akua Fidíxia, anga a ma vutula eza dingi kua Izalaiele, tunde ku Ekolone katé ku Ngata; mbámbe iê ioso Izalaiele ua i tambula dingi bhu maku ma akua Fidíxia. Anga bhu kala kutululuka ni kubatama muʼaxaxi ka Izalaiele ni akua Fidíxia.

¹⁵ Samuuele anga u kala mufundixi ua kufúndisa Izalaiele izuua ioso ia muenhu uê.

¹⁶ Mivu ioso ua kexe mu kuila u kondoloka ku Betele ni ku Jidingale ni ku Mixipa; anga u fúndisa Izalaiele mu ididi ioso ioio.

¹⁷ Mu kuvutuka-phe uiza bhu Lama, kuma bhene bhu bhata diê bhua kexi Inzu iê; anga u fundisa jinga Izalaiele bhenhobho; anga u tungila-bhu kalatódio kua Jihova.