I Samuuele 6 - O Mikanda Ikola

Akua Fidíxia a tubhula álaka mʼoxi iâ

¹ Alaka ia Jihova anga i kala mʼoxi ia akua Fidíxia sambuadi dia mbeji.

² Akua Fidíxia anga exana jinganga jâ ni azambuidi, exi: Tu bhanga kiebhi ni alaka ia Jihova? Tu longesienu kioso ki tu i tumikisa ku kididi kiê.

³ Ene exi: Se mu tumikisa álaka ia Nzambi ia Izalaiele, ki mu i tumikise ia hatu; ki bhinga muene mu mu vutuila mubhaku ua kudiẋikina mulonga; se mua ki bhange, mu iluka; hé mu kʼijiia kioso kia mu kambesa kukatula luluaku luê ku thandu dienu.

⁴ Ene-phe, exi: Mubhaku ua kudiẋikina mulonga u kala kiebhi, uoso u tu mu vutuila? Exi: Mu iudika mabhumbu matanu ma ulu, ni tundôndo tutanu tua ulu, kifua mu sokesa mu sobha jitanu ja akua Fidíxia, kuma o dibhebhu diene dimoxi dia kexile ku thandu dienu oso ni kuthandu dia jisobha jenu.

⁵ Kienhiki-phe bhangenu idifua ia mabhumbu menu, ni idifua ia tundôndo tuenu kuma jene o jiphuku jala ku mi zangela o ixi; mu bhane o fuma kua Nzambi ia Izalaiele; amoxi se enu mu bhanga kiki, o muene u tebhununa-ku ku kinemenu kia lukuaku luê ku thandu dienu, ni ku thandu dia nzambi ienu, ni ku thandu dia ixi ienu.

⁶ Mu kolela-hi muxima kala kia kolele muxima ua akua Ijitu ni Falaó a kolesele muxima uâ? Muene Nzambi ia Izalaiele, kia bhangele isunji ni madiuanu muʼaxaxi kâ, manhi o mundu uê ka ehele nʼaiá?

⁷ Kiki-phe mu kuata hé mu iudika dikalu dia ubhe, ni mama jiiadi ja jingombe jala mu kuamuisa, kiluua a ji zuika jungu mu xingu; mua kà kuika jimama ja jingombe ku dikalu, mu a katula anʼâ hé mu a jikila ku bhata mu kibhanga.

⁸ Anga mu katula álaka ia Jihova, mu i tule ku thandu dia dikalu; o makembu ma ulu u muala ku mu vutuila mu mubhaku ua kudiẋikina mulonga, mu ma bhaka mu ngonga bhu mbandu iê; mu i sulule, phala iiê.

⁹ Anga mu tala kiá; se i bandela njila ia mbámbe iê muene katé bhu Bete-seme, tu kʼijiia kuma muene ua tu bhange kiaiibha kiosoʼiki; o ki i kamba kuila njila ioio, tu kʼijiia ue kuma lukuaku lua muene ki luene lua tu kuama, maji kima kiezé ngó kibhûku.

¹⁰ Mala enhó anga a ki bhanga, a kuata mama jiiadi ja ngombe jala kuamuisa, a ji kuika ku dikalu, a jika anʼâ mu kibhanga ku bhata.

¹¹ Anga a ta álaka ia Jihova ku thandu dia dikalu, ni ngonga kumoxi muala tundôndo tua ulu, ni idifua ia mabhumbu mâ kumoxi.

¹² Jingombe anga ji kuata njila iaiuka ditônono, njila ia Bete-seme; jela muene mu ikoka, ji jʼenda ji dila, né ku kiasu né ku kúdia ki ja bhambukila bhuma; jisobha ja akua Fidíxia anga jiia ni kukaiela katé bhu mbámbe ia Beteseme.

Alaka i bhixila bhu Bete-seme

¹³ Ene-phe akua Bete-seme a kala mu muna tiliku iâ mu honga izuua ienhoio; o kia zambula mesu, a mona álaka iala mu kuiza, anga a sanguluka mu ku i mona.

¹⁴ Dikalu anga di bhixila mu díbhia dia Josuué mukua Beteseme, anga dʼimana-phe bhenhobho bhuala ditadi dia dikota. Anga a bhasa dikalu, a di bhanga jihuinhi hé a jibha jingombe, a ji oha mu túbhia, mu ku ji satela Jihova.

¹⁵ Jilevita anga ji tulula álaka ia Jihova, ni ngonga iala na-iu kumoxi, muala ima ia ulu, anga a i tula ku ditadi dia dikota dienhodio; akua Bete-seme anga a bhana jisata ja kuoha, a bhakula ni ilumbu iamukuá kizuua kienhokio kua Jihova,

¹⁶ O jisobha jitanu ja akua Fidíxia, kia zubha ku ki mona mesu, a vutuka kizuua kienhokio ku Ekolone.

¹⁷ Ene o mabhumbu ma ulu ma vutula akua Fidíxia, mu kudiẋikina mulonga kua Jihova a ma bhana Ajindodi dimoxi, Ngaza dimoxi, Axikilone dimoxi, Ngata dimoxi, Ekolone dimoxi;

¹⁸ ni tundôndo tua ulu, a tu sokesa ni konda ia jimbanza ja akua Fidíxia, ja tokala o sobha jâ jitanu, ni jimbanza jóxite ni imbaka, ni jisanzala jâ ku matutu, katé bhu ditadi dia dikota bhua tula álaka ia Jihova; o ditadi diene didié hanji katé mu kizuua kia lelu, mu díbhia dia Josuúé mukua Bete-seme.

¹⁹ Muene Jihova anga u beta akua Bete-seme, mukonda a zongola moxi dia álaka ia Jihova; ku mundu anga u betaku makuinhi sambuadi a muthu, ene oso makota mʼathu; mundu anga a kala mu dila mukonda Jihova ua a beta ni kibetu kiavulu.

²⁰ Akua Bete-seme anga a zuela, exi: Nanhi u tena kuimana bhu pholo ia Jihova Nzambi i kôla kiki? O muene kutunda bho-bhuetuʼabha, uia kua nanhi?

²¹ Anga a tuma jiphunga ku akua Kidiate-jadime a ambela, exi: Akua Fidíxia-ze a bheka dingi álaka ia Jihova; kulumukenu kunu, mu i takane, iie bhu bhata dienu.