I Samuuele 5 - O Mikanda Ikola

Alaka i bheka mavuua m ʼoxi ia akua Fidíxia

¹ Kiki-phe akua Fidíxia a tambula álaka ia Nzambi, a tunda na-iu bhu Ebenezele, hé a i bheka ku Ajindode.

² Akua Fidíxia anga a kuata álaka ia Nzambi, ai ta mʼonzo ia Dangoni, hé a i tula bhu mbandu ia Dangoni.

³ Ki kúkia ni kimeme, akua Ajindode kia balumuka, a sanga Dangoni ua dibhale pholo bhoxi, bhu pholo ia álaka ia Jihova. Anga a bhetula Dangoni, a mu imika dingi bhu kididi kiê.

⁴ Kia balumuka dingi mu kimene, kizuua kia mukuá a sanga Dangoni ua dibhale pholo bhoxi, bhu pholo ia álaka ia Jihova; ni mútue ua Dangoni, ni makanda mê ma maku a batukila bhu phidika ia muelu bhua di bhalela, Dangoni ua subhuka ngó ni mbunda iê.

⁵ Mukonda dia kiki jinganga ja Dangoni, ni athu oso a bokona mʼonzo ia Dangoni, mu Ajindode, kene mu diota bhu phidika ia muelu uê, katé mu kizuua kia lelu.

⁶ O lukuaku lua Jihova phe anga lu nemena ku thandu dia akua Ajindodi, anga ua buikisa ni mabhumbu a bheka jifidila ku mataku, kutale mu Ajindodi, uixi mu mabhata mê moso.

⁷ O mala ma akua Ajindode kia zubha ku ki mona, exi: Alaka ia Nzambi ia Izalaiele ki i kale dingi bhu bhata dietu, kuma o lukuaku luê lua xixima ku thandu dietu ni ku thandu dia Dangoni nzambi ietu.

⁸ Anga a tuma kubhongolola o jisobha joso ja akua Fidíxia, a ambela, exi: Tu bhanga kiebhi ni álaka ia Nzambi ia Izalaiele? Jisobha anga ji vutula, exi: A i sondolole, a ibheke bhu Ngate.

⁹ Anga a bheka álaka ia Nzambi ia Izalaiele kuenhoko. Kia zubha-phe ku i sondolola, lukuaku lua Jihova lu nemena ku thandu dia akua dibhata koko ni kibuika kia dikota ki kuata uoma; anga Jihova u beta akua bhata, ni jindenge ni makota, aia ni ku tunda mabhumbu ku mukutu mu ididi ia jisonhi.

¹⁰ Kienhiki a tumikisa álaka ia Nzambi ku Ekolone. Mu kubhiẋila-phe ni álaka ia Nzambi ku Ekolone, akua Ekolone a dikola, exi: A tu bhekela kunu o álaka ia Nzambi ia Izalaiele, mu ku tu jibha etu ni mundu uetu uoso!

¹¹ Mukonda dia kiki a tuma kubhongolola dingi jisobha joso ja akua Fidíxia, exi: Alaka ia Nzambi ia Izalaiele i tunde mʼoxi ietu, tumenu ku i bheka dingi bhu kididi kiê, kuma o kukamba ku ki bhanga, i tu jibha muene ni mundu uetu uoso. Mukonda o kibuika kia kalunga kia sambuka mu mbanza ioso kia kuata uoma uavulu; lukuaku lua Nzambi lua a nemena ni nguzu ioso.

¹² Oso a kambe kúfua, a tunda mabhumbu aiibha mu mukutu; anga a bhondalala kinéne, o ngololo iâ anga i banda katé ku diulu.