I Samuuele 4 - O Mikanda Ikola

Akua Fidíxia a tolola Izalaiele Kizuelu kia Samuuele anga ki bhixila ku Izalaiele ioso

¹ Izalaiele-phe anga a tunda mu kúlua ita ni akua Fidíxia, anga a ta kibangu kiâ bhu mbandu ia Ebenezele; akua Fidíxia-phe a ta kibangu kiâ bhu Afeke.

² Akua Fidíxia anga a di ta ku minonono mu kúlua ni Izalaiele; o kia salumuka o ita, Izalaiele a a kaia kuala akua Fidíxia; kuma o ku kilômbo kiâ a jibha-ku midi jiuana ja mala.

³ O mundu kia zubha kubhongoloka dingi bhu kibangu kiâ, adiakime a Izalaiele, exi: Phala-hi Jihova ua tu beta lelu bhu pholo ia akua Fidíxia? Tu takanienu álaka ia kikutu kia Jihova ku Silo, tu i bheke kunu muʼaxaxi ketu, phala i tu bhulule bhu maku ma jinguma jetu.

⁴ Kienhiki mundu a tuma athu ku Silo, anga a takana kuenhoko o álaka ia kikutu kia Jihova dia ifuẋi, uene kuxikama muʼaxaxi ka jixelube; anʼ aiadiphe a Eli, Hofini ni Finehase, anga ejiia kumoxi ni álaka ia kikutu kia Nzambi

⁵ Anga ki bhita kuila, kia zubha álaka ia kikutu kia Jihova kutula bhu kibangu, Izalaiele ioso a sanguluka kiavulu anga a dikola ni nguzu, mu ngongo ioso anga mu dʼitaia dingi!

⁶ Akua Fidíxia ki evu o kudikola, exi: Kuku kudikola kuahi kuavulu kuala kutunda bhu kibangu kia Jihebeleu? Anga a kʼivua kuma álaka ia Jihova ieza bhu kibangu.

⁷ Akua Fidíxia anga a kala ni uoma, kuma exi: Nzambi ueza bhu kibangu. Anga ela, exi: Kokolo dietu! Kiluua ku kala kima kala kiki!

⁸ Kokolo dietu! Nanhi u tu kudila bhu maku a jinzambi jiji jasuina? Jiji jene o jinzambi ja betele akua Ijitu ni mabhebhu moso mu kikangalakata.

⁹ Kolenu maku, mu bhange ukuenze, mu akua Fidíxia, phala ki mu kale mu abhika a Jihebeleu, kala ene kia kexile abhikʼenu; uene-phe kiá o uialʼú, bhângenu muene.

¹⁰ Akua Fidíxia anga a bhânga ni nguzu ioso, a beta Izalaiele, ene anga a lengela kala muthu ku bhata diê. Anga bhu bhita kihaẋi kia dikota, kuma ku mbandu ia Izalaiele kua dibhale makuinhi atatu a midi ia muthu akua kuenda bhoxi.

¹¹ Alaka ia Nzambi anga a i tambula; anʼaiadi a Eli, Hofini ni Finehase, anga a a jibha.

Kutula thambi ku bhata. Kúfua kua Eli ni mukaji a monʼê

¹² Anga bhu kala diiala mukua muiji ua Bejamí, ua tundu ku ita, u bhixila ku Silo kizuua kienhokio, izuatu iê ua i tandujula, ua di te mavu mu mútue.

¹³ Kia zubha kutula, ua sange Eli ua xikama mu kialu kiê bhu mbanduʼa njila, uala mu kinga; kuma muẋima uê uala mu teketa mukonda dia kulalamena o álaka ia Nzambi. Kia tula o diialʼidi bhu sanzala, anga u a kunda imʼii, sanzala ioso ia di te muzonga ua kudila.

¹⁴ Eli ki evu o dízui dia kudila, uixi: Kima kiahi kia bheka o kudila kuosʼuku? O diialʼidi anga uiza ni lusolo, u lenguluka kubhiẋila bhuala Eli, anga u mu tudila jimene joso.

¹⁵ Eli-phe kiene kialʼiki, uala kía mu makuinhʼivua a mivu ni nake; mesuʼê akolo kiá, muene ka-lu tena kumona dingi.

¹⁶ O diialʼidi anga u jimbuila Eli, uixi: Eme muene nga tundu ku ita, lelu muene eme nga lenge ku ita.

¹⁷ Eli uixi-phe: Kia bhiti kiebhi, monʼami? Uoso ueza kutula njimbu anga u kumbulula, uixi: Kua tema! Izalaiele a a kaie lelu kuala akua Fidíxia; kua bhiti kihaẋi kia dikota ku mundu, o anʼé aiadi Hofini ni Finehase a a jibha, álaka ia Nzambi a i tambula.

¹⁸ Bhenhobho anga ki bhita kuila, kia mu ivu kujimbula kuila álaka ia Nzambi a i tambula, Eli u di bhala ni dima ku kialu kua xikama bhu mbandu ia muelu; anga u toloka o xingu, ufua; kuma ua kuka kiá muene kiavulu, iú ua neme. Muene ua fundisa Izalaiele mu makuinhi auana a mivu.

¹⁹ Mukajiʼa monʼê-phe, muhatuʼa Finehase, u kala ni divumu, kua mu kambe ngó kudisanza; muene ki evu njimbu kuila álaka ia Nzambi a i tambula, ukouʼé uafu, munumeʼê uafu, u bulukuta hé u vuala, kuma mika iê ia mu kuatela muʼanzanzʼumu bhenhobho.

²⁰ Kithangana kia kala mu kúfua, ahatu nʼakuá a mu kondoloka a mu ambela, exi: Ku kale ni kikote, ua disanze monʼé ua diiala. Muene-phe ka vutula, mukonda ka ki suu dingi kuma uaii kiá ku kiambu.

²¹ Mona anga u mu luka Ikabode, kuma uixi: Kijingo kia tundu kiá mu Izalaiele, mukonda ue dia álaka ia Nzambi a i tambula, ni mukonda ue dia ukouʼê ni munumeʼê.

²² Xi! Uixi: Mukonda álaka ia Nzambi a i tambula, kijingo kia tundu kiá mua Izalaiele ki kiala-mu dingi.