I Samuuele 31 - O Mikanda Ikola

O Kùfua kua Saúlu ni anʼe

¹ Kioso Davidi kia-lu bhita ni imʼiii, koko-phe akua Fidíxia a di kuata ku ita ni Izalaiele. Akua Izalaiele anga a lenga akua Fidíxia, hé a di bhala-bhala ni ku a jibha-jibha mu mulundu ua Jiliboua.

² Akua Fidíxia-phe anga a landameka Saúlo ni anʼê. Akua Fidíxia anga a jibha Jonata, ni Abinadabe, ni Malaki-xuua, anʼa Saúlo.

³ Ita anga i nemena Saúlo, akua mifula a mu mono anga a mu asa mu divumu, anga u tata kiavulu mukonda dia akua mifula.

⁴ Saúlu anga u ambela kibese kiê, uixi: Fomona xibhata u ngi tome-iu u ngi kube-iu mu mixima; sumba akuamabôlo enhá eza, a ngi zubhidisa, a ngi bhanga kasekelelu. Kibese kiê-phe nguaiʼê ku ki bhanga, kuma uala ni uoma uavulu. Mukonda dia kiki, Saúlu muene u sunga o xibhata u di kuba ku pondo iê.

⁵ Kibêse kiê kia zubha ku ki mona kuma Saúlo uafu, muene u di bhalela ue ku pondo ia xibhata iê, anga u fuila-nê kumoxi.

⁶ Kala kiki ni Saúlo muene uafu, ni anʼê atatu, ni kibêse kiê, ni makuenze mê ene oso afu kizuua kiâ kimoxi.

⁷ Akua Izalaiele a tungu ku sámbua koko dia kibota, ni akua sámbua diodio dia Njolodá, kia mono kuma akua Izalaiele a a tolola ia a lenge, ni Saúlu ni anʼê afu, mu mabhata mâ a tunda-mu, a lenga; akua Fidíxia-phe anga eza, a bhingana mu mabhata mâ.

O mbila ia Saúlo ni an ʼê

⁸ Kúkia ni kimene, ki eza akua Fidíxia mu zula imbi, a sanga Saúlo ni anʼê atatu a dibhalela mu mulundu ua Jiliboua.

⁹ Anga a mu batula mútue, a mu zula ibhakatu iê, a i tumikisa kʼoxi ia akua Fidíxia, mu kutula na-iu jingolokela ku inzo ia iteka iâ, ni ku mundu.

¹⁰ Ibhakatu iê anga a i bhaka mʼonzo ia Axitalote; kimbi kiê anga a ki nhenga ku kimbaka kia Bete-Sane.

¹¹ Akua Jabezi mu Ngiliiade-phe, kia kʼivu kioso kia bhange akua Fidíxia kua Saúlu,

¹² mala oso a nguzu-phe a balumuka, enda usuku uoso, hé a katula kimbi kia Saúlo, ni imbi ia anʼê, ku kimbaka kia Bete-Sane; eza na-iu bhu Jabezi, a i ohela bhobho.

¹³ Anga omona ifuba iâ, hé a i funda bhu kota dia muxi ua mutamadixi mu Jabezi. Anga a fula kúdia, a jila mu sambuadi dia izuua.