I Samuuele 30 - O Mikanda Ikola

Davidi u sanga dibhata diê dia Zikilake a di bhûnda, a di te mu túbhia

¹ Anga ki bhita kuila, kia zubha-phe Davidi ni makuenze-mê kubhiẋila ku Zikilake, mu kizuua kia katatu, a sanga akua Amaleke a vubuka mʼoxi ioso ia sulu, ni sanzala ia Zikilake a i beta; a i oha mu túbhia,

² ahatu oso a a kutu, ni athu oso a xedi ku bhata, makota ni jindenge, ka jibha-ku muthu, maji ene oso a a kutu aii-nâ kuoso kuala kuila.

³ Davidi-phe ni makuenze-mê kia zubha kutula ku bhata, a sanga dibhata diabhi mu túbhia; o akajiʼâ, ni anʼâ a mala ni a ahatu, aii-nâ ku mikolo, a di bhange jihutile.

⁴ Bhenhobho ni Davidi, ni mundu aia-nê kumoxi, exi bulukutu ni kudila anga a dila katé kala dingi ni nguzu, kingumba o kudila, mukonda a tokoka-ku.

⁵ Ni akaji a Davidi aiadi, Akinouama mukua Jezeleele, ni Abingaíle, mukua Karmelu, a a kutu uâ.

⁶ Davidi anga u tata kiavulu, kuma mundu a tele maka a ku mu bûba ni matadi, mukonda muẋima ua mundu uoso uala ni malamba, kala muthu uala mu kuxinganeka anʼê a mala ni a ahatu. Maji Davidi-phe u di kolesa muẋima mua Jihova Nzambi iê.

Davidi u kaiela akua Amaleke, hé u tambula o jihutile

⁷ Davidi anga u ambela nganga Abiiatale, monʼa Ahimeleke, uixi: Nga ku diondo, efodi ngi bhekele-iu kunu. Abiiatale anga u bheka efodi kua Davidi.

⁸ Davidi anga u ibhula kua Jihova, uixi: Kibuka kiki, se ngi ki kaiela manhi ngʼa kuata? Anga Jihova u mu vutuila, uixi: Kaiela, u a kuata muene, iene ioso u i tambula dingi.

⁹ Kienhiki Davidi hé u katuka, ni hâma jisamanu ja mala aia-nê kumonxi, anga a tula bhu honga ia Besolo bhua xala amukuá oso a lémbua kuia ku pholo.

¹⁰ Davidi-phe, ni muene ni hama jiuana ja mala, a kaiela o jinguma; kuma hâma jiiadi a xala bhenhobho, mukonda dia kubhuila, a lémbua kuzauka o honga ia Besolo.

¹¹ Anga a sanga mukua Ijito mu mukáu, a mu bheka kua Davidi, a mu bhana mbolo, u dia; a mu bhana menha a kúnua, hé u nua.

¹² Anga a mu bhana uê mbandu ia muthadi ua jifiku, ni isaka iiadi ia jiuva; o kia zubha kudia, muenhu uê ueza dingi bhu kididi, kuma kadi kima, kanu menha, mu makumbi atatu ni mausuku atatu.

¹³ Davidi anga u mu ibhula, uixi: Eie ua tokala kua nanhi? O ku ua tundu, kuebhi? Muene, uixi: Ngi mukua Ijito, ngi mubhika ua mukua Amaleke, ngana iami-phe, lelu tatu tunde kia ngi xi ku dima, mukonda dia kukata kua ngi kuata.

¹⁴ Tua balukidile kúlua ita mu sulu ia Makelete, ni mu mbandu ia tokala kua Juda, ni mu sulu ia Kalebe; Zikilake tua mu oha mu túbhia.

¹⁵ Davidi anga u mu ambela, uixi: Manhi, se tu kulumuka u ngi bheka bhuala masoladi a kibuka kienhiki? Muene uixi: Se u ngi lokela kua Nzambi kuma eie muene ku ngi jibha, ni bhu maku a ngana iami ku ngi bhakulabhu dingi, ngi ku bheka muene bhuala kibuka kiâ.

¹⁶ Anga u a kulumuisa. Kia zubha ku mu bheka, u sanga a di zanze mu mukâu uoso uenhó, ala mu kúdia ni mu kúnua, ni mu kina, mukonda dia imbamba iavulu ia bhûndu mʼoxi ia akua Fidíxia, ni mʼoxi ia Juda.

¹⁷ Davidi anga ua beta tunde mu mixinda ia maku katé mu ngoloxi ia kizuua kiamukuá; ki bhuala diiala ua tundu-bhu, kikale ngó hâma jiuana ja minzangala a mondala jikamelu, ene ngó a lenge.

¹⁸ Davidi anga u tambula dingi imbamba ioso ia mu bhûndile akua Ameleke; Davidi anga u tambula ahatuʼê aiadi.

¹⁹ Ki bhuala kima kia a kambe-ku, né kia dikota né kiofele, né anʼa mala, né anʼa ahatu, né o imbamba ioso ia a bhundile; Davidi ua i tambula iene ioso, ueza na-iu.

²⁰ Davidi anga u kuata ilunga ioso iamukuá ia jimbudi ni jingombe, anga eza ni ku i kombola bhu pholo iê ni kukola, exi: Iii iene o ibhaku iangene í ia Davidi ia tambula.

Kuuana o madibhundila

²¹ Davidi anga uiza u sanga hâma jiiadi ja mala, a lembuele kukaiela Davidi mukonda dia kubuila, ia a xedi bhu honga ia Besolo. Ene anga a tunda mu kauidila Davidi, ni mu kauidila ue o mundu aia-nê. Davidi kia zubha kuzukama bhuala mundu, u a menekena muene kiambote ni kutululuka kuoso.

²² Bhenhobho akua phulu-phe ni iá oso abhukumuka mu ʼaxaxi ka iá ele ni Davidi andeka kuzuela, exi: Mukonda enhá a lembuele kubhiẋila bhu tuediʼetu, kana ku a bhana-ku ku madibhundila u tua tambula ku ita, inda tu a bhana ngó kala muthu muhatuʼê ni anʼê kuabhu; a a tambule, a muangane.

²³ Davidi-phe u a ambela bhenhobho, uixi: Ki kiene ki mu bhanga, phange jami, ni imbamba ia tu bhana Jihova. Muene ua tu bhake ni muenhu, iu ua thelekala bhu lukuaku luetu o kibuka kiejile ku tu bhûnda.

²⁴ Nanhi muene u mʼivua o hundu ienu i muala na-iu iii? Mukonda kioso ki tambula iú uele ku ita, kiene ue ki tambula iú ua xedi bhu imbamba. Ene oso a soka mu kuuana.

²⁵ Tunde-phe kizuua kienhókio muene, kia ki zuela Davidi, kia di bhange kijila kiâ ni kifua kiâ mu Izalaiele, katé mu kizuua kia lelu.

²⁶ Davidi anga u bhixila bhu Zikilake, ku ibhaku ia tambula anga u tumikisa-ku ku adiakimi a Juda, o makambʼê, uixi: Ujitu-ze iú u nga mi tumikisa, ua tundu ku ibhundile i tua bhûndu ku jinguma ja Jihova.

²⁷ U tumikisa-ku ue akua bhata mu Betele, ni akua bhata mu Lamote ia Nengebe ku sulu, ni akua bhata mu Jatile,

²⁸ ni ku akua bhata mu Alouele, ku akua bhata mu Sifimote, ni ku akua bhata mu Estemoua,

²⁹ ni ku akua bhata mu Lakele, ni ku akua bhata mu jisanzala ja Majelamele, ni ku akua bhata mu jisanzala ja Makènene,

³⁰ ni ku akua bhata mu Hóloma, ni ku akua Kolaxane, ni ku akua Ataka,

³¹ ni ku akua bhata mu Hebolone, ididi ioso kiá kua kexe mu suama Davidi ni makuenzemê.