I Samuuele 3 - O Mikanda Ikola

Nzambi u ixana Samuuele mu usuku

¹ Mona Samuuele anga u kala mu xibhidila Jihova bhu pholo ia Eli. Kizuelu kia Jihova ki kia vudile ku kʼivua mu izuuʼomo; kana-ku ue kisukila kia di monekena jinga luavulu.

² Thembu ienʼoio-phe ki bhita kuila, kioso kia zeka Eli bhu kididi kiê, kuma mu mesu mua mu kala kiá kavunda, kala kumona dingi kiambote;

³ kioso kandeia ka Nzambi kiluua ka jima, Samuuele-phe ua zeka kiá bhu kididi kiê mu tembulu ia Jihova, bhuala álaka ia Nzambi;

⁴ Jihova u ixana Samuuele; muene-phe anga u itaia, uixi: Emʼiú.

⁵ Anga u lengela kua Eli, uixi: Emʼiú; kuma ua ngʼixana. Kuala Eli: Ki nga ku ixana; kazekié dingi. Muene anga uia, u zeka.

⁶ Jihova anga u mu ixana luamukuá, uixi: Samuuele. Samuuele anga u balumuka, uia kua Eli, uixi: Emʼiú; kuma eie uaʼngʼixana. Kuala muene: Ki nga ku ixana, monʼami; ka zekié dingi.

⁷ Samuuele-phe kejidile luua Jihova, kuma katé kienhókio kiluua kizuelu kia Jihova ki mu tukulukila.

⁸ Jihova anga u ixana Samuuele lua katatu. Anga u balumuka, uia kua Eli, uixi: Emʼiú; kuma ua-lu ngʼixana. Eli anga u tongolola kuma Jihova muene uala kuixana mona.

⁹ Kienhiki Eli u ambela Samuuele, uixi: Ndeie, kà zekié; o ki kala-phe u ivua ua ku ixana dingi, ua kèla: Zuela, Jihova; mubhikʼé iú uivʼú. Bhenhobho Samuuele uia, u zeka bhu kididi kiê.

¹⁰ Jihova anga uiza, u imana, u ixana Samuuele kala kia bhangele kiá lutatu lua dianga, uixi: Samuuele, Samuuele. Samuuele bhenhobho uixi: Zuela, Ngana, mubhikʼé iú uivʼú.

¹¹ Jihova anga u ambela Samuuele uixi: Talesa nga-nda kubhanga kima mu Izalaiele, kia bhinga uoso u kʼivua mátui mê maiadi moso ma mu titila.

¹² Kuma bhu kizuua kienʼokio ngà kumbidila kua Eli ioso i nga mu tangela ia dibhata diê, tunde bhu ngi mu andekela katé bhu ngi mu zubhila.

¹³ Mukonda nga mu tangela kiá kuila dibhata diê ngi di êlesa ku mivu sé dizubhilu, mukonda dia kutondala kuejiia muene, mbata anʼê a di bhange ifusa, muenephe ua tokoka o ku a bazela ni kua fudisa.

¹⁴ Mu kienhiki nga lokela o dibhata dia Eli, kuma o kutondala kua dibhata dia Eli kà ka tena ku ku bhuisa ni jisata ni ilumbu mu mivu ni mivu sé dizubhilu.

Samuuele u jimbuila Eli kioso ki evu mʼusuku

¹⁵ Samuuele anga u zeka katé kuáki, anga u jikula mabhitu a inzo ia Jihova. Samuuele anga ukala ni uoma ua kutangela Eli kioso kia di uana.

¹⁶ Eli anga u ixana Samuuele, uixi: Samuuele, monʼami. Muene uixi: Emʼiú.

¹⁷ Uixi: Kima kiahi kia ku tangela Jihova? Nga ku diondo, kana ku ngi suekela-kiu; Nzambi a ku bhange-kiu, a ku tele-ku dingi ku kaxitiku, se eie u ngi suekela kima, anga u kamba ku ngi tangela ioso ia ku ambela muene.

¹⁸ Samuuele anga u mu tangela maka moso, ka xi-ku dingi kima. Eli anga u zuela, uixi: Muene Jihova, a bhange kiá kioso kia mono kiauabha ku mesu mê.

¹⁹ Samuuele anga uia ni ku kula, Jihova anga u kala-nê, kehela maka-mê moso-moso kuláuka bhoxi.

²⁰ Izalaiele ioso anga a tuma ku kʼijiia, tunde ku Dani katé ku Beele-seba, kuma Samuuele a mu xikika mu kukala polofeta ia Jihova.

²¹ Jihova anga uenda ni kumoneka jinga dingi mu Silo; kuma Jihova ua di tukuluila jinga kua Samuuele, mu kizuelu kiê kia mu zuelesa jinga na-kiu Jihova muene.