I Samuuele 28 - O Mikanda Ikola

Saúlo uia mu sota muxingidi-a-ngòmbo

¹ Anga ki bhita mu izuuʼomo kuma akua Fidíxia a di bhongolola ilombo iâ mu kuia ku ita, phala kúlua ni Izalaiele. Akiji anga u ambela Davidi, uixi: Ijiia na-kiu kuma uia ni eme mu kilômbo sé kufula, ni eie ni makuenze mé.

² Davidi anga u ambela Akiji, uixi: Ua-ndu ngi mona kioso ki ngi bhânga, ngi mubhikʼé. Akiji anga u ambela Davidi, uixi: Kiene ki nga ku solela phala u kale izuua ioso u dikuenze diami dia ku ngʼinga mútue.

³ Kienhiki kala Samuuele uafua kiá okulo, Izalaiele dioso a mu didile, iá a mu fûnda kiá mu Lama, bhu bhata diê bhene. Saúlu-phe oso akua kuxingidisa, ni akua kuzambula ua a kaiesa, mʼoxi iâ a tundu-mu.

⁴ Akua Fidíxia anga a di bhongolola, eza a ta kibangu kiâ bhu Suneme. Saúlo ue u bhongolola Izalaiele ioso, a ta kibangu kiâ mu Jiliboua.

⁵ Saúlo-phe kia mono kilômbo kia akua Fidíxia, u kala ni uoma, muẋima u mu teketa kiavulu.

⁶ Saúlo-phe ki ebhula kua Jihova, Jihova ka mu vutuila, né ku nzoji, né ku Udimi, né ku jipolofeta.

⁷ Saúlo anga u ambela akua mbèle iê, uixi: Ngi sotedienu muhatu u kala muxingidi-a-ngòmbo, ngiie kuoso kuala, ngʼibhule kua muene. Akua mbèle iê anga a mu ambela, exi: Sai-ze muhatu muxingidi-a-ngòmbo ua tungu bhu Endolo.

⁸ Saúlo anga u di kitula, u di ta izuatu iengi, anga uia, ni muene ni malʼaiadi endela-nê kumoxi, a kana muhatu muenʼiú mu usuku. Anga u mu ambela, uixi: Nga ku diondo, xingila ngombo ié, u ngʼixanene uoso ngi ku tumbuila-nê dijina diê.

⁹ Muhatu anga u mu ambela, uixi: Eie uejiia-phe kioso kia bhange Saúlo, kuma oso akua kuxingila ni akua kuzambula ua a bhuisa mʼoxiʼmu; u ngi lungila-hi-phe mubhetu ua kukuata muenhu uami, ni ku ngi fuisa ngó?

¹⁰ Saúlu anga u mu lokela mu dijina dia Jihova, uixi: Kalè-ku Jihova ku muenhu, ku kale ngó ni uoma, ki kuiza mulonga mukonda dia kimʼiki.

¹¹ Muhatu uixi: Nzumbi ia nanhi ngi mu ixana ni u mu ivu? Uixi: Ngʼixanene Samuuele.

¹² Muhatu-phe kia mono Samuuele, ua dikola ni dízui dia suina. Muhatu anga u ambela Saúlo, uixi: Ua ngi bhombelahi? Manhi eʼmuene Saúlo!

¹³ Muenexi anga u mu ambela, uixi: Ku kale ni uoma; maji-phe, ua monohi? Muhatu anga u ambela Saúlo, uixi: Nga mono nzambi iala kutunda mu mavu.

¹⁴ Muene u ambela muhatu, uixi: Uala ni kidifua kiahi? Muhatu, uixi: Kikulakaji muene kiala mu tunda; ua di futu dibeka. Saúlo anga u tongolola kuma Samuuele muene, anga u bhetama pholo iê katé mu mavu, u mu diundila.

¹⁵ Samuuele anga u ambela Saúlo, uixi: Ua ngi fudisila-hi kunhoha kuami, o ku ngi fukununa kiki eme ngeza bhabha? Saúlo anga u vutuila Samuuele, uixi: Nga tate kiavulu; kuma akua Fidíxia eza ku ngi lua ita, Nzambi phe ua ngi xi, kala ku ngi vutuila dingi, né ku jipolofeta, né ku jinzoji. Kiene ki nga ku ixanena eie, phala u ngʼijidise kioso ki ngi bhanga.

¹⁶ Samuuele uixi: U ngʼibhuila-hi-phe eme, se Jihova ua ku xi, ua biluka kiá nguma ié?

¹⁷ Jihova ua ku bhange kioso kia zuelele kó kuami: kuma Jihova ua tambula ungana bhu lukuaku lué, ua u bhana mukuenu uengi, muene Davidi,

¹⁸ Mukonda eie ua kambe kutumaka dízui dia Jihova, ua kambe ku mu zubhila njinda iê iatema ia kuatelele Amaleke, kiene Jihova kia ku bhangela kiki kizuua kia lelu.

¹⁹ Kua di te dingi kia-nda kubhanga Jihova, u bhakula Izalaiele ni eie kumoxi bhu maku ma akua Fidíxia. Mungu muene ni eie ni anʼé muà kala ni eme ku ngala; o kilômbo kia Izalaiele Jihova u ki bhakula bhu maku ma akua Fidíxia.

²⁰ Bhenhobho Saúlo udibhala, utandelela bhoxi, u kala ni uoma uavulu mukonda dia maka ma Samuuele; nguzu ioso anga i mu bhua, mukonda ka di kima kizuua kiosuʼokio ni usuku uê.

²¹ Muhatu anga u iza kua Saúlo, u mu mona kuma ua bhuuama kiavulu, u mu ambela, uixi: Talesa-ze, ngana, ngi kahatu ké nga ku ivu dízui, muenhu uami kifua nga u te bhu lukuaku, eme ngʼevu o maka oso u ua ngʼambela.

²² Kiki-phe, nga ku diondo, eie ue ngʼivue-ku eme, ngi kahatu ké, ngi ku bhangele kakudia bhenhabha, u die; phala u kale ni nguzu, mbé ki ua-ndu kuata dingi mu njilʼmu.

²³ Maji muene-phe u dituna, uixi: Nguami kúdia. Akua mbèle iê-phe, ni muhatu kumoxi, a mu bhinjika, anga u ivua kiua dízui diâ. Anga u balumuka bhoxi, u xikama bhu hama.

²⁴ Muhatuphe u kala ni kangombe kanete mʼonzo iê; anga u bhanga lusolo, u ka jibha. U katula ue fuba ia tiliku, u i masana, hé u kanga jimbolo ja kambe felemendo.

²⁵ Anga uiza ni kúdia kuê u zalela Saúlo, u zalela ue akua mbèle iê, anga a dia ene oso. Kia zubha kúdia, a balumuka, a katuka, ni usuku uenhó.