I Samuuele 27 - O Mikanda Ikola

Davidi u lengela dingi kua Akiji sobha ia Ngate

¹ Davidi anga u amba ku muẋima uê, uixi: Hinu bhu kala kizuua ngi buila ku lukuaku lua Saúlo. Ki ngalʼiki kota ngi lengela kʼoxi ia akua Fidíxia; koko-phe Saúlo-phe u ngi lémbua kiá, ka kala dingi mu ku ngi sota mu jimbámbe ja Izalaiele, o miẋima uê ki u dielela dingi ku ngi kuata; kiene ngó ki ngi ẋangumuka bhu lukuaku luê.

² Kienhókio Davidi anga u zanguka, ni muene ni hâma jisamanu ja mala aia-nê kumoxi, hé a sambuka kua Akiji, monʼa Maoka, sobha ia Ngate.

³ Davidi anga u tunga ni Akiji bhu Ngate, ni muene ni makuenze mê, kala muthu ni dibhata diê, Davidi muene ue ni ahatuʼê aiadi, Akinoama mukua Jezeleele, ni Abingaíle mukua Karmelo, mutudi ua Nabale.

⁴ Anga a ki tangela Saúlo kuila Davidi ua lengela ku Ngate; muene anga u zumbuka o ku mu sota.

⁵ Davidi anga u ambela Akiji, uixi: Se eme nga sange ngalasa, ku mesu mê, a ngi bhese kididi ku jisanzala ku matutu, ngi tunge-ku; eme ngi mubhiké ngi kalela-hi mu mbanza mu ualʼeie u sobha?

⁶ Akiji anga u mu bhana Zikilake kizuua kienʼokio; tunde kienhiki Zikilake ia tokala ku jisobha ja Juda katé mu kizuua kia lelu.

⁷ Izuua-phe ia bhange Davidi ni kutunga ku matutu ma akua Fidíxia, i tena muvu ni mbeji jiuana.

⁸ Davidi ni makuenze mê anga aia ni kutunda mu kúlua ni akua Ngesula ni akua Ngelesita, ni akua Amaleke; kuma ene akuaʼxi a kexile-mu, mʼokulu, tunde ku Sule, katé ku ixi ia Ejito.

⁹ Davidi anga uia ni ku beta ixi ioso ienhoio, ka xi-mu né diiala né muhatu, anga u ambata jimbudi, ni jingombe, ni jibûlu, ni jikamelo, ni izuatu, anga u vutuka, u tula na-iu kua Akiji.

¹⁰ Akiji-phe anga u ibhula, uixi: Akua-hi mua a balukila lelu? Davidi uixi: Tua balukila o sulu ia Juda, ni akua Jelamiiele, ni akua Kene.

¹¹ Davidi-phe ka xi-ku muthu ni muenhu, né diiala mba muhatu, ualengesa kuila uiza-nâ ku Ngate, kulengesa kuila: A tu tanga, ela: Kiene kiene kubhanga Davidiʼiki, kiene kífua kiê, thembu ioso ia tungu ku matutu ma akua Fidíxia.

¹² Akiji anga u xikina Davidi, uixi: Ua di zembesa ku muiji uê ua Izalaiele; mukonda dia kiki, ua xalela dikuenze diami.