I Samuuele 26 - O Mikanda Ikola

Davidi u fula luamukuá kujibha Saúlo

¹ Akua Zifi anga eza kua Saúlo ku Ngibeia, exi: Manhi Davidi ka suama mu mulundu ua Hakila, ua zukama mu mikáu ia hatu ia kikangalakata kia Jesimone?

² Saúlo anga u balumuka, u kulumuka ku ditutu dia Zifi, ni midi jitatu ja mala ua a nona mu Izalaiele, ela-nê kumoxi, mu kusota Davidi mu ditutu dia Zifi.

³ Saúlo anga u ta kibangu mu mulundu ua Hakila, uazukamena mu kikangalakata kia Jesimone, mu mikáu ia hatu, bhu mbandu ia njila. Davidi-phe ua kala mu ditutu, anga u mona kuma Saúlo ueza muene ku mu sotela mu ditutu.

⁴ Davidi anga u katula ilôlo iê phala kuia mu kulonda, anga a mu ijidisa kididi bhuoso bhua tula Saúlo.

⁵ Davidi anga u balumuka, uiza ni kuzomba bhu kididi bhuoso bhua te Saúlo kibangu kiê. Davidi anga u talesa kididi bhua zeka Saúlo, ni Abinele monʼa Nedi, kabhitangu ka kifuẋi kiê. Saúlo muene ua zeka mu axaxe ka kibangu bhu kididi kia makalu, mundu uoso a mu bhake bhu ʼaxaxe.

⁶ Bhenhobho Davidi anga u ambela Ahimeleke mukua Hiti, ni Abisai monʼa Zeluia, phange ia Jouabhe, uixi: Nanhi u ngi bheka, ni tu kulumuka bhu kibangu bhobho bhua Saúlo? Abisai uixi: Eme ngi ku bheka.

⁷ Kienhiki Davidi ni Abisai eza mu usuku muʼ axaxi ka mundu. Anga a sanga Saúlu iú ua zekʼú mu kaẋi ka kibangu bhu kididi kia makalu, ni sosa iê ua i kubu bhoxi bhu mutuelu uê. Ni Abinele, ni mundu uoso, a zeka mu jimbandu, muene a mu te mu kaẋi.

⁸ Abisai anga u ambela Davidi, uixi: Nzambi ua ku thelekala nguma ié bhu lukuaku kizuua kia lelu. Kiki-phe ngehele, nga ku diondo, ngi mu tome ni dionga, ngi mu phaphele mu mavu; ngi mu ta ngó lumoxi luene, ki ngi mu tona dingi.

⁹ Davidi anga u ambela Abisai, uixi: Kana ku mu jibha; kuma nanhi u tena: kuzengela muthu Jihova ua mu undu ku ungana nʼa kambe kuêla?

¹⁰ Davidi anga u zuela, uixi: Kalé-ku Jihova ku muenhu, kuma muene Johova hinu u mu ta; mba u bhixila bhu kizuua kiê kia kúfua, mba uia mu ita nʼa mu jibhe,

¹¹ Ngana ka ngehele; kuma ki kala kisunji se eme ngi mu zengela lukuaku, hé ngi sota kukuama muthu a mu undu kuala Jihova. Eie-phe katula ngó, nga ku diondo, o sosa iala bhu mutuelu uê, ni mudingi ua menha, tuende ni kuietu.

¹² Kala kiki, Davidi ua katula ngó o sosa ni mudingi ua menha bhu mutuelu! ua Saúlo, anga a tunda-bhu. Ki bhuala-phe muthu ua ki mono, ki bhuala ua kʼijiia, ki bhuala ue ua phaphumuka nʼa tono; kuma ene oso aii ku kilu kia muioko-ioko, mukonda kilu kia a kuata kiavulu kia tundu kua Jihova.

¹³ Davidi anga uia ku sámbua, u banda bhu thala ia mulundu mu kanga, bhu kaẋi ua te-bhu muene dikanga.

¹⁴ Davidi anga u kuata kuhandekela mundu ni Abinele, monʼa Nedi, uixi: Xeie! Abinele, ku itaia? Abinele anga u kumbulula, uixi: Eie nanhi, muenexi uala ku mu bhangela jibuia?

¹⁵ Davidi anga u ambela Abinele, uixi: Abinele u diiala, kuambe? Eie mu Izalaiele ku moneka mukuenu. Muadiʼé muenexi-phe, ku mu langela-hi? Tala, kuma bhejile muthu kujibha muadiʼé muenexi.

¹⁶ Ki ki uabha, kiki ki ua bhange! Nga lokela mua Jihova uala ku muenhu, kuila mu athu mua tokala ku mi jibha, enu mua fulu kulanga muadiʼenu, muthu a mu undu kuala Jihova. Talesenu hanji mba sosa ia muenexi ii kuebhi, ni mudingi uê ua menha ua kexile bhu mutuelu?

¹⁷ Saúlo anga u ijiia dízui dia Davidi, uixi: O dízui diéʼodio, monʼami Davidi? Davidi uixi: Kùku, ngana, dízui diami eme muene.

¹⁸ Davidi uixi dingi: Phala-hi, ngana iami, ua-lu ngi sota kiki, ngi mubhikʼé? Eme kima kiahi ki nga bhange? Kituxi kiahi ki ua ngi mono na-kiu kia ngi kala bhu maku mami?

¹⁹ Bhenhabha-phe, kùku, nga ku diondo, ngʼívue hanji o kuzuela, ngi mubhikʼé: O ki kala Jihova muene ua ku vunza ku ngi zukutisa, ngi mu satele, a ngi tambulule; o ki kala-phe anʼ athu ngó a ka vunza, Jihova a a bhubhidile bhu pholo iê, kuma a ngi kaie, kizuua kia lelu, phala ngi kambe kididi mu undundu ua Jihova, mukua ni kuila, exi: Ndeie, ka bhikile nzambi jengi.

²⁰ Kikiphe manhinga mami ka bhubhile ngó bhoxi ku makanga mengi, mukonda dia ku ngi kaia bhu pholo ia Jihova. Kuma muenexi a Izalaiele ua di te ni ku ngi kenga kala ueza mu sota mbuanana, ua soko ni dinhanga u seia nguadi mu milundu!

²¹ Saúlo bhenhobho anga u zuela, uixi: Nga bhange kiaiibha! Vutuka monʼami Davidi, kuma ki nga-nda ku ku bhanga dingi phulu; mukonda muenhu uami eie lelu ua u kiti kima kikôla. Ni kidi muene nga bhange uoua, nga tondala kiavulu muene.

²² Davidi anga u mu kumbulula, uixi: Kùku, sosa ié iii bhabhʼiii. Tumikisa dikuenze, eze a i takane.

²³ Jihova u bhana futu mu vutuila muthu uoso kala kiatokala mu uiukilu uê ni mu ufiiele uê. Mukonda Jihova ua ku thelekalele lelu bhu lukuaku luami, eme-phe ki ngi xikina ku ku zengela lukuaku, eie u muthu a ku undu kuala Jihova.

²⁴ Talesa, kala o muenhu ué ki ua kôlele mu mesu mami, kiene kimoxi muenhu uami ue u kole mu mesu ma Jihova, muene a ngi kudile mu kutata kuami kuoso-kuoso ku ngi kala na-ku.

²⁵ Saúlo anga u ambela Davidi, uixi: Diebhe-diebhe, monʼami Davidi! Mu kubhânga, u dizonda, mu ku lenda ki bhuala u tena ku ku fudisa! Kienhiki Davidi u ila njila iê, Saúlu anga u vutuka ku bhata.