I Samuuele 25 - O Mikanda Ikola

Kufua kua Samuuele. Davidi, ku mikau ia kukuta ia Palane

¹ Samuuele anga u fua: Izalaiele ioso anga a bhongoloka mu ku mu dila thambi, anga a mu fûnda bhu bhata diê bhu Lama. Davidi-phe u sendumuka-bhu, anga u kulumuka ku mikáu iakukuta ia kikangalakata kia Palane.

Davidi ni Nabale

² Anga bhu kala muthu ua tungu ku Maone, maji ibhaku iê ia mu kala mu Karmelo; muenhú muadiakimi muene, mukua itadi iavulu, u kala ni midi jitatu ja jimbudi, ni midi ia jihombo. Thembu ienhoio anga u kala mu bhuta jimbudi jé ku Kalamelu.

³ Muthu iú dijina diê Nabale, o múkajiʼê dijina diê Abingaíle; muhatu iú anga u kala ni kilunji kiambote, anga u uabha ue o pholo kiavulu muene. O diiala-phe u bhonza, anga ukala mukua phulu; muene u tokala ku muiji ua Kalebe.

⁴ Davidi ku mikáu iakukuta kuoso kuala, u ívua kuma Nabale uala mu bhuta o jimbudi jê.

⁵ Davidi anga u katula kuinhi dia munzangala, Davidi anga u a ambela, uixi: Bandenu ku Kalamelu, muie kua Nabale, mu mu menekene mu dijina diami;

⁶ mua kà mu ambela kiki: Tana-ku, ngana! Ku kale paze ko kué, ku kale paze mʼonzo ié, ku kale paze ku mbèle ié ioso.

⁷ Kikiphe ngevu kuma ua kase abhuti mu bhata dié; abidi é-phe tua kexe-nâ buamoxi mu iangu, ki tua a bhange kima kiaiibha, ki bhua jimbila kibhaku mba ku a kamba kima thembu ioso ia kexile mu Karmelo nʼetu.

⁸ Ibhula minzangala ié, a ku kundile-kiu. O minzangala iami-phe iá, a sange ngalasa ku mesu mé, kuma tueza bhu kizuua kiambote kia kubhanga fesa. Tu bhane-phe, tua ku diondo etu tu abhikʼé, kumoxi ni monʼé Davidi, kioso ki ua tena ki u kuata bhu lukuaku lué.

Makuenze a Davidi a vutuka maku ahatu kua Nabale

⁹ Minzangala ia Davidi anga eza, a kunda Nabale maka mosoʼama, mu dijina dia Davidi, anga a tula mahezu.

¹⁰ Nabale anga u vutuila makuenze a Davidi, uixi: Davidi muene mukua-hi? Monʼa Jese nanhi muene? Abhika avulu-á izuuʼiii, a mu lenga mʼonzo ia jingana jâ!

¹¹ Kifua ngi katula o mbolo iami, ni menha, ni xitu, ioso i nga jibhila abhuti kúdia, ni ngi i bhane athu engi, ki nga ejiia ngó kuoso kua tundu?

¹² Kienhiki o minzangala ia Davidi a vutuka njila, eza maku a hatu, anga a mu kunda muene maka mosuʼama.

¹³ Davidi anga u ambela makuenze mê, uixi: Enu oso manekenu o jixibhata. Anga a maneka kala muthu o mukuale uê. Davidi ue u maneka o mukuale uêmuène. Davidi anga u tuamenena, o ku kunda diê ku mu kaiela hâma jiuana ja mala; o hâma jiiadi a xala ni kulanga bhu imbamba.

¹⁴ Munzangala umoxi-phe u kunda Abingaile, mukajiʼa Nabale, uixi: Davidi-ze ua tumu jiphunga jê, a tundu ku mikáu iakukuta kuala, phala kumenekena muadiʼetu, maji muene-phe ua a baúla, kuma ka a tambulula kiambote.

¹⁵ Mala enhó-phe a tu bhangele mbote iavulu, kioso ki tuala-nâ mu kikangalakata, kana muthu mudietu a mu tatesa, kana kibhaku kia jimbila, mba a tu bhanga phulu thembu ioso i tua bhangenâ mu iangu.

¹⁶ Ene kifua a kexile kimbaka kietu kia ku tu xitila mu usuku ni mu muanha, thembu ioso i tua kalanâ mu kuinga jimbudi.

¹⁷ Kiki-phe eie ijiia na-kiu, u tongolole kioso ki u bhanga, kuma muadiʼetu kua-nda ku mu iza divuua, anga u senguluka ni dibhata diê dioso. Muene-phe o kusekala ni kuhuka kuala na-ku, ua di bhange monʼa kadia-phemba, muthu ka xikina ngó ku mu zuelesa.

Abingaile u batuila Davidi, u mu uabhesa muẋima

¹⁸ Abingaile anga u bhanga lusolo, u kuata hâma jiiadi ja jimbolo, isudi iiadi ia vinhu, mbudi jitanu jótale kiá ia a ji kange, inda itanu ia masa ókange, hâma ia isaka ia jiuva, hâma jiiadi ja mitadi ia jifiku, anga u i longa ku jibûlu.

¹⁹ Muene anga u ambela minzalngala iê, uixi: Ngi tuamenenienu; eme ngizʼó ni kukaiela. Ka ki tangela-phe munumiʼê Nabale.

²⁰ Mu kuenda kiki, muene ua mondala bûlu iê, kia kala mu kulumuka bhu phaka ia mulundu, u mona Davidi ni makuenze-mê ala mu kulumuka ku sámbua anga a takana.

²¹ Davidi-phe uambele, uixi: Kidi muene, nga tale ngó hadi ia kuinga ibhaku ioso ia iala muenhú mu iangu, katé ki bhua mu jimbila kima kia mu tokala; muene-phe ua ngi vutuila phulu mu mbote i nga mu bhange.

²² Nzambi a ki bhange ku jinguma ja Davidi, a a tele-ku dingi, se ku dibhata dioso dia tokala Nabale katé ki kúkia ngi xá-ku né mona umoxi ngó uòfele ua diiala.

²³ Abingaile kia mono Davidi, u lenguluka, hé u tuluka ku bulu ie, u mu diundila, u tula dibhomo ku mavu bhu pholo ia Davidi.

²⁴ Anga uiza u fukama bhu inama iê, uixi: Ki kale, ngana, ku thandu diami, o ku ku kambela ujitu kuenhuku! Nga ku diondo, ngehele ngi kahatu ké, ngi ku zuelele mu mátui, u ngʼivue tumaka tu ngi kuambela, ngi kahatu ké.

²⁵ Nga ku diondo, ngana iami, kana kukaiela diialʼidi dia sekala, muene na Nabale; kuma kiala dijina diê, ni muene kiene kiala; dijina diê Nabale, o uoua uê-phe ki u mu bhu! Eme-phe ngi kahatu ké, minzangala ia ngana iami ki nga a muene, oso u ua tumine.

²⁶ Kiki-phe, ngana iami, nga loka mu dijina dia Jihova uala ku muenhu, nga lokela ue o muenhu ué eʼmuene moxi, kuma Jihova ua ku fudisa kubhubhisa manhinga, ua ku fudisa ue kuvutula phonzo ni lukualu lué eʼmuène. Kala kiki-phe o jingùma jé, ni athu oso a sota ku ku bhanga phulu, eie u ngana iami; a kà sokela ngó kumoxi kala kiala Nabale.

²⁷ Ujitu-phe iú u nga ku bhekela ngana, ngi mubhikʼé, u u bhane minzangala iá a ku kaiela, eie u ngana iami.

²⁸ Loloka, nga ku diondo, o kutondala kua kahatu ké; kuma ni kidi muene, Jihova ua-nda ku ku tungila dibhata dinanga, ngana iami: mukonda ngana iami, jimvunda ji uene kuzoka, jimvunda ja Jihova; ka ku kuate ni kikuma izuua ié ioso.

²⁹ Sumbala se bhu kala muthu ua balumuka mu ku ku landameka, ua bhindamena ku ku tambula o muenhu ué, ngana iami, muenhu ué a u kutila kumoxi mu kita kia athu a muenhu ala ni Jihova Nzambi ié; maji o mienhu-phe ia jinguma jé a ka i zabujula kala ditadi ki di tunda mu kaẋi ka mbala-fundu.

³⁰ Hádia-phe ki kia kà bhita, Jihova kia kà zubha ku ku bhanga, ngana iami, mbote ioso ia tange muene ku thandu dié, kia kà zubha ku ku tumbika mu kukala u mutuameneni ku pholo ia Izalaiele,

³¹ ki kia kà kala-phe dingi kima kia kudielesa, mba lamba dia muẋma, kuila ua bhubhisa manhinga sé kikuma, mba ua di vutuila phonzo ni lukuaku lué eʼmuene, ngana iami. Kioso-phe Jihova kia kà zubha ku kubhandulula, ngana iami, kienʼokio eme ue ngi xinganeke, ngi kahatu ké.

³² Kienhókio Davidi anga u ambela Abingaile, uixi: Nga sakidila Jihova, Nzambi ia Izalaiele, ua ku tumu kizuua kia lelu ku ngi batuila.

³³ Nga ku sakidila ue eie-muène ni kilunji kié, kuma ua ngi fudisa lelu kubhubhisa manhinga, ni ku vutula phonzo ni lukuaku luami eme-muène.

³⁴ Kuma ni kidi muene kala Jihova, Nzambi ia Izalaiele kiala ku muenhu iú ua ngi fudisa ku ku kuama, se eie ua kambele ku lenguluka kuiza ku ngi batuila, katé ki kúkia, eme ki ngeji kuxila Nabale ku muenhu, né ngó monʼumoxi ua diiala uòfele-fele.

³⁵ Kienhiki Davidi anga u tambula ku lukuaku luê, o ima ioso ia mu bhekela muhatu anga u mu ambela, uixi: Suluka kiá ni kutululuka ku bhata dié, ndeie ni paze. Ua mono, nga ku ivu dízui dié, eme nga ku xikina o pholo ié, ki uezʼiki.

O kúfua kua Nabale

³⁶ Abingaile anga uiza dingi kua Nabale, u mu sanga ua-lu bhanga fesa ia dikota mʼonzo iê, kala kizokola kia sobha. Nabale muene muẋima uê moxi ua mu tana, kuma ua kodiua kiavulu; mukonda dia kiki muene ka mu tangela kima, né kiofele né kionéne, katé ki kuákie.

³⁷ Anga ki bhita kuila ki kúkia ni kimene, Nabale kia mu bhu o uhólua uê, mukajiʼê u mu kunda ima ioso iii, muẋima uê anga u mu fua moxi, ukala mukuâ ni ditadi.

³⁸ Kubhita dingi kuinhi dia izuua, Jihova u mu zubhidisa, anga u fua.

Davidi u sakana ni Abingaile

³⁹ O ki evu Davidi kuila Nabale uafu, u zuela uixi: Nga sakidila Jihova ua ngi fúndila mulonga ua dilebhu diami di nga tambuile kua Nabale, ua ngi fudisa kubhanga kiaiibha eme ngi mubhikʼê. O phulu ia bhangele Nabale, Jihova ua mu vutuila-iu mu mútue uêmuène. Davidi anga u tuma kuta maka kua Abingaíle, phala ku mu sakana, nʼa kale mukajiʼê.

⁴⁰ Imbalambi ia Davidi kia zubha kutula kua Abingaile ku Karmelo, a mu kunda, exi: Davidi ua tu tumu ko kué, phala ku ku ambata ni ku ku bheka kua muene, nʼu kale u mukajiʼê.

⁴¹ Muene anga u balumuka, u bhetama pholo iê bhoxi, uixi: Emʼiú, ngi kahatu kê, ngi kale ngi mubhika ua kusukula inama ia akua mbèle ia muadiʼami.

⁴² Abingaile anga u lenguluka, u katuka, uendela ku bûlu, ni ilumba iê itanu ela-nê kumoxi. Anga u kaiela imbalambi ia Davidi, u kala mukajiʼê.

⁴³ Davidi ue anga u bhenga dingi Akinoama mukua Jezeleele; ene oso kiiadi kiâ anga a kala akajiʼê.

⁴⁴ Saúlophe, monʼê Mikala, muhatuʼa Davidi, ua mu bhana Palati monʼa Laiji, mukua Ngalime.