I Samuuele 24 - O Mikanda Ikola

Davidi u batula mbandu ku divunga dia Saúlo

¹ Anga ki bhita kuila, kia vutuka Saúlo mu kukaia akua Fidíxia, a mu tangela, exi: Davidi-ze uala mu mukáu ua Engedi.

² Saúlo anga u katula midi jitatu ja mala, ua a nona mu Izalaiele ioso, anga uia kuseia Davidi ni makuenze mê ku matadi ma bhonzo kinéne, abhingi kale ngoho jihoha jʼendelà-ku.

³ Anga u bhixila bhu ibhanga ia jimbudi mu njila, bhuala dibanda; Saúlu u bokona-mu mu ku di tebhununa mu mala. Davidi-phe ni makuenze mê a xikama mu jihota ja dibanda dienhidi.

⁴ Makuenze a Davidi anga a mu ambela, exi: Kiene-ze kizuuʼ iki kia ku tangela Jihova, uixi: Hinu ngi ku thelekala nguma ié bhu maku, phala u mu bhange kioso ki ua mesena. Bhenhobho Davidi u balumuka, uia ni kuzomba anga u batula mbandu ku divunga dia Sáulo, sé muene ku mu ívua.

⁵ Kia zubha ku ki bhanga-phe, Davidi muẋima uê ua mu êlesa, mukonda dia kubatula ku divunga dia Saúlo.

⁶ Anga u ambela makuenze mê, uixi: Ki kola! Ngana a ngi lange, phala eme ki ngi te kituxi kala kiki, kia kusunununa lukuaku luami kuthandu dia muthu a mʼundu ni maji kuala Jihova; ki ngi kala kisunji eme ku mu zengela lukuaku, kuma Jihova muene ua mu undu ku ungana.

⁷ Kienhiki Davidi ua fudisa makuenze mê ni makʼama, ka ehela kulundumukina Saúlo phala ku mu bhanga kiaiibha. Saúlo anga u balumuka bhenhobho, u tunda mu dibanda, hé uia njila iê.

⁸ Kia zubha kuia, Davidi ue u balumuka hé u tunda, u kuata kuhandekela Saúlo, uixi: Kùku, eie-ó! Saúlo kia sakuka kuema, Davidi u bhetama pholo bhoxi, u mu diundila ni ujitu uoso.

⁹ Davidi anga u kuata kuambela Saúlo, uixi: Phala-hi, ngana, u ivua jimbuémbue ja athu, a kuambela, exi: Davidi ua-lu sota ku ku bhanga phulu?

¹⁰ Talesa, mesu mé a ki mone kuma Jihova ua ku thelekalele lelu bhu lukuaku luami mu dibânda mumu. Amoxi-phe ue a ngi longesele kiá ku ku jibha, maji-phe nga ku lendukila, ngixi: Muadiʼami nguami ku mu zengela o lukuaku luami, kuma muene muthu ua ngene, Jihova muene ua mu undu ku ungana.

¹¹ Luamukuá, Phaphai, talesa hanji mbandu ia divunga dié bhu lukuaku luami. O ki ua monuʼiki, nga batula ngó mbandu ku divunga dié, eme nga kambe ku ku jibha, ijiia na-kiu kuma, bhu lukuaku luami ki bhuala phulu ki bhuala kikuma. Eme-phe ki nga te kituxi kokué, sumbala eie uala ku ngi seia o muenhu uami phala ku ngi tambula-u.

¹² Jihova a tu batuile ni eme ni eie! Jihova a ku tatele phonzo iami, maji eme-phe lukuaku luami ki ngi lu zengela kokué.

¹³ Kala kiambe o Sabhu ia makulu, exi: Mukua phulu, a mu ijidila mu kubhanga o phulu iene; eme-phe lukuaku luami ki lu ku tula.

¹⁴ Ki tualʼiki, nanhi ua katula muenexi ua Izalaiele ku Mbanza? Ua tundu mu kuseia-hi? Mu kuseia ímbua ia di fuila? Inga mu kuseia mbuanana?

¹⁵ Jihova-phe a batule bhu kaẋi kʼami ni eie, Mufundixi uetu a tale uoso ua bele ni eme ni eie, a ngi fundile mulonga uami, a ngi tambule bhu lukuaku lué.

¹⁶ Bhenhobho, kia zumbuka Davidi kuzuela makʼama kua Saúlo, Saúlo uixi: O dízui diéʼodio, monʼami Davidi? Saúlo anga u suína dízui ni kudila.

¹⁷ Anga u ambela Davidi, uixi: Eie ua lungu, ki ngi lungu eme; kuma ku thandu dia eme ku ku bhanga phulu, eie ua ngi bhange mbote.

¹⁸ Eie uedikiza lelu kuma ua ngi lendukila, mukonda eie ua fulu ku ngi jibha, kia ngi thelekala Jihova bhu lukuaku lué.

¹⁹ Mukonda muthu kuxi ua kuata kiá nguma iê, anga u mu eha ngó nʼaie? Jihova a ku fute ni mbote, ku ioso i ua ngi bhange eie lelu.

²⁰ Kiki-phe, talenu, nga kʼijiia kuila eie ua kà hinga o ungana iú, o utuminu ua Izalaiele-phe ua kà kuata kiambote bhu lukuaku lué.

²¹ Ngi lokele-phe bhabha mu dijina dia Jihova, kuila o luvualu luami lu ngi xia eie kua kà lu batula, o dijina diami ue kua kà di jimuna mu bhata dia tatʼetu.

²² Davidi anga u lokela Saúlo. Saúlo anga u vutuka ku bhata, o Davidi-phe ni makuenze mê a banda, anga aia dingi mu mutôlo.