I Samuuele 23 - O Mikanda Ikola

Davidi u kudila Keila

¹ Davidi anga a mu kundila-kiu, exi: Akua Fidíxia-ze ala kúlua ni Keila, ala mu bhûnda makanga ma kuvundila.

² Davidi anga u ibhula kua Jihova, uixi: O kuila ngiia kubeta akua Fidíxia enhá? Jihova anga u vutuila Davidi, uixi: Ndeie, u bete akua Fidíxia, u kudile Keila.

³ O mala ala ni Davidi anga a mu ambela, exi: Sumbala kunu mu Juda tuala ni uoma, ki kala-phe kiehhi se tuia ku Keila mu kúlua ni ilombo ia akua Fidíxia?

⁴ Bhenhobho Davidi u tona dingi kuibhula kua Johova. Jihova anga u mu vutuila, uixi: Balumuka, u kulumuke ku Keila; mukonda eme ngi ku bhana akua Fidíxia bhu maku mé.

⁵ Davidi-phe ni makuenze-mê aia ku Keila, a lua ni akua Fidíxia, anga a a tambula ibhaku iâ, a a jibha ni kihaẋi kia dikota. Kienhiki Davidi u bhulula akua Keila.

⁶ Kioso-phe kia lenge Abiiatale, monʼa Ahimeleke, anga u sanga Davidi ku Keila, uejiia kumoxi, ni efodi ia kuata bhu lukuaku.

Saúlo uia kuseia Davidi mu kikangalakata

⁷ Anga a ki kunda Saúlo kuila Davidi ueza ku Keila. Saúlo anga u zuela, uixi: Nzambi ua ngi thelekala-nê bhu maku mami; kuma ua kuaẋiua, kiene kia bokona mu sanzala ia bhiti kimbaka, iala mabhitu ni jitalangʼiki.

⁸ Sáulo anga u kasa mundu uoso kuia ku ita, phala a kulumuke ku Keila, Davidi ni makuenze mê nʼa a kondele momo.

⁹ Davidi anga u kʼijiia kuma Saúlo uala ku mu kanena ku mu bhanga kiaiibha! Anga u ambela nganga Abiiatale, uixi: Beka kunu efodi.

¹⁰ Davidi anga u samba, uixi: Eie u Jihova, tata! Nzambi ia Izalaiele, eme ngi mubhikʼé ngevu muene kuma Saúlo ua-lu sota kuiza ku Keila kubuikisa dibhata mukonda diami eme.

¹¹ O kuila akua Keila a ngi bhakula bhu maku mê? Saúlo manhi u kulumuka muene, kala ki ngʼevu, ngi mubhikʼé? Eie u Jihova, Nzambi ia Izalaiele, nga ku diondo ngi tangele, ngi mubhikʼé. Jihova anga u mu ambela, uixi: U kulumuka muene.

¹² Davidi-phe, uixi: Manhi akua Keila a ngi thelekala ni makuenze mami bhu maku ma Saúlo? Jihova uixi: A ku thelekala muene.

¹³ Bhenhobho Davidi ni makuenze aia-nê, hâma jisamanu ja muthu, a balumuka, a tunda mu Keila, a di tela kuoso kua mono. Anga a ki kunda Saúlo kuila Davidi ni makuenze-mê a ku xi, a tundu kiá mu Keila; muene anga u zumbuka o kuia ku mu sota.

¹⁴ Kienhiki Davidi u kala mu inhunginu mu mitôlo, u enda mu milundu mu ditutu dia Zifi. Saúlo anga u kala ni ku mu sota izuua ioso sé kunhoha, Nzambi-phe ka mu thelekala bhu maku mê.

Jonata ni Davidi a ta dingi kikutu kiâ

¹⁵ Davidi anga u mona kuma Saúlo uala ku mu seia phala ku mu jibha, Davidi anga u kala mu ditutu dia Zifi, bhu Holesa.

¹⁶ Jónata, monʼa Saúlu, anga u balumuka, uiza kua Davidi mu ditutu bhu Holesa, u mu suinisa muẋima mua Nzambi,

¹⁷ anga u mu ambela, uixi: Ku kale ni uoma; kuma lukuaku lua tatʼetu Saúlu lu ku lémbua muene, ki lua-nda kutena ku ku kuata. Hádia eie muene ua kà kala ku ungana ua kutumina Izalaiele, eme-phe ngà bhabhelela kó-kué; kifua mu ungana ué eme kadi. Saúlu, tatʼetu, kienhiki ua kijiia muene kiambote.

¹⁸ Anga a ta kikutu kiiadi kiâ bhu pholo ia Jihova. Davidi anga u xala bhu Holesa, Jonata-phe uia ku bhata diê.

O ufe ua akua Zifi

¹⁹ Bhenhobho akua Zifi a banda aia kua Saúlo bhu Ngibeia, exi: Davidi manhi ka suama ko kuetu mu mitôlo, bhu Holesa, mu mulundu ua Hakila Uazukama ku mikau ia hatu ialela ku kuaku lua kúdia ku sulu ia Jesimone?

²⁰ Kiki-phe, kùku, kulumuka, kioso kiandala muẋima ué; kulumuka, etu-phe tua soko-bhu ku mu thelekala bhu maku mé.

²¹ Saúlo anga u a ambela, uixi: Jihova a mi benzele; kuma mua ngi kuatela henda.

²² Ndenu-phe, nga mi diondo, mu mu ibhule muene phala mu mu tongolole kiambote, bhuoso bhuala, mu mu tole katé bhu disuamenu diê, bhu kale ni muthu uoso ua mu mono-bhu; kuma ngene ku mu ivua kuila muene ua dimuka kiavulu.

²³ Ka tadienu-phe kiambote hanji, mu lange ididi ioso bhuene kusuama, se mua mono bhuoso bhu tu mu kuatela sé kufula, kiene ki muiza dingi ku ngi takana eme, tuile kumoxi. Hé kiene-phe, se mu ngongo Davidi iú momo, né uala koxiʼa mavu eme ngi mu seia muene ni jimidi joso ja masoladi a Juda.

²⁴ Ene anga a balumuka, a tuamenena Saúlo ku Zifi. Davidi-phe ni makuenze mê a kala mu ditutu dia Maone, mu kanga ku mikáu ia hatu ku sulu ia Jesimone.

²⁵ Saúlo ni makuenze mê anga aia ku mu seia. Anga a ki tangela Davidi, muene anga u kulumuka ku ndánji, u kala mu ditutu dia Maone. Saúlo kia kʼivu uia ni kukaiela Davidi mu ditutu dia Maone.

²⁶ Anga ela: Saúlo u bhita ku bolo dimoxi dia mulundu, Davidi ni makuenze mê a bhita ku bolo diamukuá dia mulundu: Anga Davidi ni makuenze mê a di landameka ni kulenga Saúlo mukonda a fika kuila a-nda ku a kuata muene; kuma Saúlo ni makuenze mê a bhake Davidi ni makuenze mê mu kaxá, kua kambe ngó muene kofele phala ku a kuata kiá.

²⁷ Bhu kithangana kienʼokio muene, ku tula-phe phunga kua Saúlo, uixi: Endelà-ku, uize lusolo ku bhata, kuma akua Fidíxia a tu balukila ni kubhûnda oxi.

²⁸ Saúlo bhenhobho u vutuka, ueha ku kaiela Davidi, uia hanji mu kukaia akua Fidíxia. Mu kienhiki, kididi kienʼokio a ki luka exi Ndanji ia Kubhulaka,

²⁹ Davidi anga u tunda kuenioko, u banda, u tunga mu mitôlo ia Engedi.