I Samuuele 22 - O Mikanda Ikola

Davidi u kala mu dibanda dia Adulamu

¹ Davidi anga kuenhoko u tundaku, u lengela ku dibanda dia Adulamu. Jiphange jê-phe, ni dibhata dioso dia tatʼâ, kia kʼivu, a kulumuka aia kuenhoko kua muene.

² Uoso ue uala bhu kíbhidi, mba uàdia makôngo mba ua tata ni mulonga, enhoso iá a mu bhongolokela kuenhoko, hé u kala kabhitangu kâ; anga a di bhongolola katé kia tena konda ia hâma jiuana ja mala kumoxi aia-nê.

³ Davidi anga u katuka bhenhobho, uia ku Mixipa ku Mouabhe. Anga u ambela sobha ia Mouabhe, uixi: Nga ku diondo, ehela tatʼetu ni mamʼetu eze a kale bhu kinama kié, katé ki ngʼijiia kioso kia-nda ku ngi bhanga Nzambi.

⁴ Anga u a bheka bhu pholo ia sobha ia Mouabhe, anga a tunga-nê kumoxi thembu ioso iala Davidi mu mutôlo.

⁵ Polofeta Ngadi anga uambela Davidi, uixi: Kana kukala kunu mu mutôlo, tunda-mu uie kʼoxi ia Juda; kienʼokio Davidi u tunda uiza u kala mu muxitu ua Helate.

Saúlo u jibha jinganga mu Nobe

⁶ Saúlu anga uivua kuma Davidi ua tuluka kumoxi ni mala aia-nê. Kienhiki Saúlu ua xikama mu Ngibeia bhu kota dia muxi ua mutamadixi bhu thala ia kalundu, ni sosa ie ua i kuata bhu lukuaku, ni akua mbèle iê oso a mu imanena.

⁷ Saúlo anga u ambela akua mbèle a mu imanena, uixi: Ivenu, enu mu akua Bejamí; manhi monʼa a Jese ua-nda ku mi bhana mábhia ni mivide, u mi bhanga kukala mu jikabhjitangu ja jimidi, mu jikabhitangu ja jihama?

⁸ Kiene ki mua ngi kanenena? Mukonda mua di xibhenu ki bhuala ua ngi jimbuila-kiu kioso kia te monʼami kikutu ni monʼa Jese; ki bhuala mudienu ua ngi kuatela henda, mba u ngi jimbuila kuma monʼami ua funhisa mubhikʼami ku ngi kitukila, ni ku ngi batamena kala ki mua di muena mu kizuua kia lelu.

⁹ Bhenhobho Doueki, mukua Edomo, ua kexile muene dikota dia akua mbèle ia Saúlo, u kumbulula, uixi: Nga muene monʼa Jese kiejile ku Nobe, kua Ahimeleke monʼa Ahitube.

¹⁰ Muene anga u mu zambuila kua Jihova, u mu bhana huta, u mu bhana ue o xibhata ia Ngoliia mukua Fidíxia.

¹¹ Muenexi bhenhobho u tuma kuixana nganga Ahimeleke monʼa Ahitube, ni dibhata dioso dia tatʼâ, ni jinganga joso ja kexi mu Nobe. Anga eza ene oso, emana bhu pholo ia muenexi.

¹² Saúlo anga u zuela, uixi: Ivua-ze, u monʼa Ahitube. Muene uixi: Kuku, emʼiú, ngana!

¹³ Saúlo u mu ambela, uixi: Mu ngi kanenenʼahi, ni eie ni monʼa Jese? Kia bhingi eie ua mu bhana huta, ua mu bhana xibhata, ua mu zambuila kua Nzambi, phala a ngi kitukile, a ngi batamene, kala ki tua mu ki mona kizuua kia lelu.

¹⁴ Ahimeleke anga u vutuila muenexi, uixi: Ku makuenze mé moso-phe nanhi ua ku kala fiiele, u soka ni Davidi, muene holomiʼê eie u muenexi, ua tumaka kiambote mu kionge kia jitata, muthu ua ujitu ku mbanza?

¹⁵ Kifua lelu-ki nga mateka o ku mu zambuila kua Nzambi? Kiene kisunji ki nga diuana! Muadi, ku ngi fike ni kima kiaiibha ngi mubhikʼé, mba ufikila o dibhata dioso dia tatʼetu. Kuma ima ioso iii, eme ngi mubhikʼê, ki nga ijiia, né ngó kima kiofele mba kia dikota.

¹⁶ Muenexi-phe, uixi: Ufua muene Ahimeleke, ni eie ni dibhata dioso dia tatʼenu.

¹⁷ Muenexi anga u ambela Makuenze a mu imanena, uixi: Endelenu-ku, mu jibhe jinganga joso ja Jihova; mukonda a te kikutu kumoxi ni Davidi, a mu ijiia kuma ua lenge, maji ka ngi jimbuila-kiu. Maji akua mbèle ia muenexi-phe ka ẋikina kuzangula lukuaku luâ mu kubalukila jinganga ja Jihova.

¹⁸ Muenexi anga u ambela Doueki, uixi: Bhixila eie, u kitukile jinganga. Doueki, mukua Edomo, anga u bhixila, u balukila jinganga, muene anga u jibha kizuua kienhokio makuinhi nake a muthu ni kitanu, ene oso jinganga a zuata efodi ia linho.

¹⁹ Ni Nobe, o dibhata dia jinganga, Saúlu u tuma ku di beta ue ku mazu a xibhata, ni mala, ni ahatu, ni ana-ndenge ni anʼauisu ku mele, ni jingombe, ni jibulu, ni jimbudi, ene oso, buí.

Abiiatale u lengela kua Davidi

²⁰ Anga bu kala mona umoxi ua Ahimeleke monʼa Ahitube, monʼa diiala dijina diê Abiiatale, u a xa bhu maku anga u lengela kua Davidi.

²¹ Abiiatale anga u tengela Davidi kuma Saúlu ua jibha o jinganga joso ja Jihova.

²² Davidi anga u ambela Abiiatale, uixi: Nga ki ambe kizuua kienʼokio, ki nga mono Doueke mukua Edomo iú bhobho, ngixi ua-nda kua ki tangela Saúlo. Eme muene nga bheka divuua dia kujibha athu oso a dibhata dia tatʼenu.

²³ Kala kiá kunu bhu kinama kiami, ku kale ni uoma. Kuma uoso u bhindamena muenhu uami, ua bhindamena muenhu ué. Bhu ngalʼeme-phe, eie ue u kala bhua kondama.