I Samuuele 21 - O Mikanda Ikola

Davidi u bhita ku Nobe kua nganga Ahimeleke

¹ Davidi anga uia ku Nobe, kua nganga Ahimeleke; Ahimeleke anga uiza kutakana ni Davidi ni kuteketa, u mu ambela, uixi: Uejila-hi ubheka ué, kuende ni muthu?

² Davidi anga u ambela nganga Ahimeleke, uixi: Sai kua ngi tumu muenexi, uixi: Ki bhu kale muthu u kʼijiia kioso ki nga ku katuila ni kuoso ku nga ku tumu; makuenze nga a xindila ididi bhuoso bhu tu takanena, kuila bhobho ni bhobho.

³ Kiki-phe o bhu lukuaku ua kuata-hi? Ngi bhane makende ma jimbolo, mba kioso-kioso ki ua kuata.

⁴ Nganga anga u vutuila Davidi, uixi: Mbolo ia tokala athu oso-oso ku i dia ki ngala na-iu bhu lukuaku luami; bhuala ngó jimbolo jangene jikôla; o makuenziʼê ki alʼiki, o kuila mba a fulu muene kuenda ni ahatu mu ku di kasanesa-nâ?

⁵ Davidi anga u vutuila nganga, uixi: Tua fulu muene, lelu tatu kizuua ki tuende ni ahatu; o ki nga katuka mikutu ia makuenzeʼami iazele muene, sumbala njila i tuala kuenda ki i bhingi ngó ku tu bonza; lelu-phe tu zela kiengi ki tuanda kudia o jimbolo jikôlʼiki!

⁶ Kienhiki nganga u mu bhana o jimbolo jikôla; kuma kana-bhu jimbolo jengi, bhuala ngó jimbolo jólumbe, józalule bhu pholo ia Jihova, kizuua kia ta-ku jimbolo jengi jatema.

⁷ Sai-phe muthu ku mbèle ia Saúlo u kala-bhu ue kizuua kienʼokio, a mu kingisa bhu pholo ia Jihova; dijina diê Doueki mukua Edomo, muene dikota ku abidi a Saúlo ene mu kuinga ibhaku iê.

⁸ Davidi anga u ambela Ahimeleke, uixi: Kuala-bhu ni sosa mba mukuale bhua butu? kuma ngeza ngó sé mukuale, sé kumaneka felu ioso-ioso, kuma muenexi ua ngi tumu lusolo.

⁹ Nganga-phe, uixi: Mukuale ua Ngoliia mukua Fidíxia, ua mu jibhidile eie mu honga ia Elá, iu-ê-iú, uófute mu dituaia kuema dia efodi; ki u u mesena, tambula-u, kuma uene ngó uala-bhu, kana-bhu uengi. Davidi uixi; Uenhó-phe ki uala mukuâ; ngi bhane-u.

Davidi u lengela kua Akiji sobha ia Ngate

¹⁰ Davidi anga u zanguka, u lenga kizuua kienʼokio, mukonda dia uoma ua Saúlo, uia kua Akiji sobha ia Ngate,

¹¹ Akua mbèle ia Akiji anga a mu ambela, exi: Davidiʼú, ki muene muenexi ko kuâ? Ki muene a mu te ku mukûmbi mu kuimba ni kukina, exi: Saúlo ua jibha jimidi Davidi-phe makuinhi a jimidi?

¹² Davidi anga u lunda makʼama mu muẋima uê, u kala ni uoma uavulu ua Akiji sobha ia Ngate.

¹³ Anga u bilula kífua kiê bhu pholo iâ, u di bhanga kala dilaji bhu maku mâ, u aza ku mabhitu a kimbaka, u di zezela mathe ku muezu.

¹⁴ Akiji anga u ambela akua mbèle iê, uixi: Muthu iú-ze dilaji, ki mu mu mono? Mua mu bhekela-hi bhu pholo iami?

¹⁵ Kífua mua ngi mono ngala ni ukambu ua malaji, kuila mu ngi bhekela iala kala iú, nʼende ni ku ngi bhangela ima ia ulaji uê? Ialʼú ki fua u bokona mʼonzo iami?