I Samuuele 20 - O Mikanda Ikola

Davidi u di mona ni Jonata

¹ Kienhokio-phe Davidi anga u lenga ku Naiote mu Lama, uiza kua Jonata, u mu ambela, uixi: Kima kiahi ki nga bhange? Nga bholomona mulonga uahi mba nga bhukumukina bhebhi? Kituxi kiahi ki nga te kua tatʼenu, phala muene ku ngi bhindamena kiki ku ngi jibha?

² Muene u mu vutuila, uixi: Ki kala kisunji; tatʼetu ka tena ku ku jibha! Mukonda muene kene kubhanga kima kia dikota mba kiofele, nʼa kambe ku ngi tangela-kiu. Hé kiki-phe, tatʼetu u ki suekela-hi? Nga fika makutu.

³ Davidi anga u ta-ku kuloka, uixi: Tatʼenu ua kʼijiia kiambote kuma eme nga sange ngalasa ku mesu mé; iú uambe uixi: Jonata ka kʼijiie kienhiki, imoxi ki mu bhekela dilamba. Kia kidi kiene-phe, ngi loka muene kuila: Kala kiala Jihova ku muenhu, kala ué kiala o muenhu ué eʼmuene moxi, eme kiene ki ngalʼiki, dikanda dimoxi ngó dia ngi xala-ku ni kuia mu alunga.

⁴ Jonata anga u ambela Davidi, uixi: Eie uandalaʼhi? Kioso kiandala muẋma ué eme ngi ki bhanga.

⁵ Davidi anga u ambela Jonata, uixi: Mungu-ze mbeji ia thethama, eme ki nga tokala ngi fula kuxikama ni muenexi ku meza; ngi bhane-phe disesa, ngiie ngi suame mu iangu katé mu kizuua kia katatu mu ngoloxi.

⁶ Tatʼenu ki ebhula kioso kia ngi kambesa-bhu, eie ua kèla uixi: Davidi ua ngi bhingi disesa dia kuia ni lusolo ku Beleme, ku bhata diâ; kuma kuala sata ia muiji uâ, ene mu i sata ku mivu ioso.

⁷ Kia kèla, uixi: Kiauabha; eme-phe ngi mubhikʼé, ngi kala ni kutululuka, o kia kà kala-phe ni njinda iavulu, ijiia na-kiu kuma ua bhindamena ku ngi bhanga phulu.

⁸ Hé kiene, ngi kuatele henda ngi mubhikʼé, kuma mubhikʼé ua mu bheka mu kikutu kia Jihova ki ua te eie ni eme; o ki kala-phe ua ngi mono kubhukumuka, ngi jibhe kiá eie muene, u ngi bhekela-hi ngó kua tatʼenu?

⁹ Jónata uixi: Lu ku suke; eme se nga kʼijidile kuila tatʼetu ua bhindamena ku ku bhanga phulu, manhi ngi kamba ku ku tangela-kiu?

¹⁰ Davidi anga u ambela Jónata, uixi: Nanhi-phe u ngi tangela-kiu, se o mu kuiza-ku mungu tatʼenu u ku vutuila ni kutema?

Kubangana kua Jónata ni Davidi

¹¹ Benhobho Jónata anga u ambela Davidi, uixi: Tuie hanji mu iangu. Anga aia kiiadi kiâ mu iangu.

¹² Jónata anga j u ambela Davidi, uixi: Jihova, Nzambi ia Izalaiele, a kale mbangi: Mungu mu kumbi kala mumu, mba mungu diná, se nga zubha kutola muẋma ua tatʼetu, anga ngi mona kuma kua mu kala mbote, ngi kamba kiebhi kutuma ku kuʼijidisa-kiu?

¹³ Jihova-phe a ki bhange kua Jónata, a mu tele-ku dingi, se ngi mona tatʼetu ua mesena ku ku bhanga phulu, eme anga ngi kamba ku kuʼijidisa-kiu ni ku ku xinjikila phala eie nʼuié ni ku tululuka; Jihova-ze a kale ni eie, kala kia kexile ni tatʼetu.

¹⁴ O ki kala eme ngi kala hanji ni muenhu, manhi eie kua kà ngi kuatela henda ia Jihova, phala eme ngi kambe kúfua?

¹⁵ Né ngó bhófele o kubatula henda ié monzo iami katé ku hádia ni hádia, mba ngó ue kioso o Jihova kia-nda kuvuza mu ngongo o nguma joso ja Davidi, mu umoxi-umoxi.

¹⁶ Kienhiki Jónata anga u ta kikutu ni dibhata dia Davidi, uixi: Jihova a ki tongolole, a kʼibhule ku jinguma ja Davidi, a a fute kia tokala.

¹⁷ Jónata anga u bhangesa Davidi ku mu lokela dingi, mukonda dia henda ia mu kuatela; kuma ua mu zola ni henda ioso ia muenhu uê.

¹⁸ Jónata anga u mu ambela, uixi: Mungu mbeji ia thethama; eie-phe ka kambe ku kuʼibhula, mukonda o kididi kié ku meza kia ka kala ngoho.

¹⁹ Mu kizuua kia katatu-phe, sé ngó kufula, ua kà kulumuka bhu kididi kiná bhu ua suamene mu kizuua ki tua bangana, ua kà xikame benhobho bhu mbanduʼa ditadi dia Ezele.

²⁰ Eme-phe nga kʼasela-bhu jihunji jitatu, kala ngala mù kuasa mu ku di longa pondo.

²¹ Nga kà tuma-phe kaiala, kuila: Ndeie kà sote jihunji. Se uívua ngi tangela kaiala, ngixi: Jihunji ua ji somboka, jala kuema kunu; bongaju uize na-ju; kua ku kala-phe paze, kana-ku u ku bhanga kiaibha. Nga loka muene kuila kia kidi, kala Jihova ki ala ku muenhu.

²² Ki uívua-phe ngi tangela kaiala, kuila: Jihunji-ze ja ku kala ku pholo koko muene; eie-phe ila njila ié, kuma Jihova muene ua ku muanganesa.

²³ Ku kima-phe kioso ki tua bangana, mudietu, talesa, Jihova muene u kala mu kaẋi ketu ni eie ni eme sé dizubhilu.

²⁴ Kienhiki Davidi u suama mu iangu, o kia thethama mbeji, muenexi u xikama ku meza mu kúdia.

²⁵ Muenexi anga u xikama ku kialu kiê, kiene kuxikama kiá, kiálu kia kexile bhu kididi kiê ku phalelu; Jonata anga u imana, Abinele u xikama bhu mbandu ia Saúlo; o kididi kia Davidi-phe kia xala ngoho.

²⁶ Saúlo-phe kà zuela kima kizuua kienʼokio; ua fika, uixi: Sai kioso kia mu bhiti, iu ua kasana; ua bhingi hangi ku di bonza.

²⁷ Ki kúkia-phe kia zubha mbeji kuthethama, kizuua kia kaiadi kiá, kididi kia Davidi hanji kiala ngoho. Saúlo anga u ambela Jonata, monʼê uixi: Monʼâ Jese ihi kia mu kambesa kuiza mu kúdia ni mazá ni lelu?

²⁸ Jonata anga u vutuila Saúlo, uixi: Davidi ua ngi bhingi disesa dia kuia ni lusolo ku Beleme.

²⁹ Uambe, uixi: Ngehele, nga ku diondo, kuma muiji uetu uala ni sata ku bhata, kota diami iú ua ngi tumu kuiza; kiki-phe se nga sange ngalasa ku mesu mé, ngehele, nga ku diondo, nga kà di mone ni phange jami; kiene kia mu fudisa kuiza ku meza a sobha.

Saúlo u thathamena Jonata

³⁰ Bhenhobho njinda ia Saúlo i uamena Jonata, uixi: Eie u monʼa muhatu uathathamana, ua xibhaka, kifua eme nga kambe ku kʼijiia kuila eie ua solo monʼa Jese muenhó ku ukamba, phala ku di bhekela jisonhi eie muene, ni kubhekela jisonhi ku tuẋi ia mamʼenu.

³¹ Kuma kioso kiala hanji monʼa Jese kʼulu dia munduʼiki eie muene muenhu ué ki u kolo, o utuminu ué ki u kuata. Kiki-phe, mu tume, u ngi bhekele-nê bhabha; kuma ni kidi muene, ua bhingi úfua.

³² Jonata anga u vutuila Saúlu, tatʼâ, uixi: Phala-hi-phe ki bhinga ku mu jibha? ua te kituxi kiahi?

³³ Saúlo anga u mu zengela sosa iê phala ku mu toma na-iu; Jonata anga u xala ni ku kʼijiia kuma tatʼâ ua bhindamena muene kujibha Davidi.

³⁴ Kienhiki Jonata anga u balumuka ku meza ni njinda iavulu, u fula kúdia kizuua kiosuʼokio kia kaiadi ku mbeji; kuma kia mu iibhila kia Davidi, mukonda tatʼâ ua mu kuatesa jisonhi ni dilamba diavulu.

Jonata u di lekela ni Davidi

³⁵ Kúkia ni kimene-phe, Jonata uia mu iangu bhu kididi bhuoso bhua bangana ni Davidi, ni kaiala kofele uela-nê kumoxi.

³⁶ Muene anga u ambela kaiala kê, uixi: Lenga kiá u sote jihunji joso ji nga-nda kuasa. Kioso-phe kiala kulenga kaiala, muene u asa hunji iamukuá ia mu somboka ku pholo.

³⁷ Kia tula bhu hunji ia dianga kuasa Jonata, Jonata anga u kolela kaiala, uixi: Hunji ki ia ku kala kuná dingi ku pholo?

³⁸ Jonata anga u kolela dingi kaiala, uixi: Endelà-ku, lusolo, ku laleke! Kaiala ka Jónata-phe anga u bonga jihunji, u ji bhekela muadiʼê.

³⁹ Kaiala-phe kʼejiia kima. Jonata ni Davidi ene ngó a kʼijiia.

⁴⁰ Jonata anga u bhana (uta uê ua) mufula ni jihunji ku kaiala, anga u mu ambela, uixi: Ndé, imʼii ka i bheke ku bhata.

⁴¹ Kia zubha-phe kaiala kukatuka, Davidi u balumuka bhu kididi bhuoso bhua kolokele, ku mbandu ia sulu, anga u bhetama pholo bhoxi, u bhetama lutatu luosuʼulu, anga a di bhana jibeju. Anga a kala hanji mu dila kumoxi kiiadi kiâ, katé Davidi ua tundu mukuâ mu kudila kuma lamba dia mu vudila.

⁴² Jonata anga u ambela Davidi, uixi: Ndeie kiá ni paze, mukonda tua di lokela kiiadi kietu mu dijina dia Jihova, tuixi: Jihova u kala bhu kaẋi ka eme ni eie, bhu kaẋi ka luvalu luami ni luvalu lué, sé dizubhilu.

⁴³ Muene bhenhobho anga u balumuka hé u katuka; Jonata-phe anga uia ku bhata, mu mbonge.