I Samuuele 2 - O Mikanda Ikola

Muimbu ua Hana

¹ Hana bhenhobho anga u samba, uixi: Muẋima uami ua tanena kua Jihova; pholo iami ia zangalala mua Jihova; dikanu diami u sanga dia kulu mu kuolela o jinguma jami; mukonda nga sangulukila mu kubhuluka ku tunda kokuê.

² Ua kambe ituxi kala Jihova ka moneka, kuma eie u Nzambi ku moneka mukuenu a ku fika-nê; kana-ku ndánji iengi i soka ni Nzambi ietu.

³ Kana kuvudisa dingi kuzuela kuenu kua ukumbu, ki mu tunde dingi ima ia izala mu kanu dienu, kuma Jihova muene Nzambi ia unjimu ni kuijiia, ima i bhanga athu Muene uene ku i pezala ku dipezalelu

⁴ Mifula ia mazonda i bukujuka, a kexile kiá mu ku di bhukajana-phe a a zuika ni nguzu iengi.

⁵ Oso ekutile lelu ʼidi aii ku di umba mu sota kia kúdia, a kexile ni nzala a nhoha-ku kuma ekuta. Katé ni kisula uavuala sambuadi dia mona, o kivadi kia ana avulu leluʼidi ua zoza,

⁶ Jihova muene u katula o muenhu, muene u bhana o muenhu; u tulula athu katé mu mbila, anga u balumuna athu kuʼalunga.

⁷ Jihova u bheka muthu mu uadiama, o ngadiama u mu bheka mu umonhi; u sebukisa muthu, u bhana muthu kijingo.

⁸ U zangumuna o ngadiama mu mavu, u katula phulungu bhu dixita nʼa mu xikamesa ni anʼa jingana phala a lundule kiandu kia fuma; kuma o jiphiladi ja ixi, jangene ja Jihova, o Ngongo ua i xikika ku thandu diâ.

⁹ Muene u langa inama ia athuʼê abhu o ituxi; o a ta ituxi-phe u a bheka muʼalunga mua vundu, anga muenhomo a di xibha muene hudi! kuma nguzu ki iene i lendesa muthu nʼa tundu akuâ.

¹⁰ Oso a bhânga ni Jihova a kà tolojoka; muene u a numinina tunde mu diulu. Jihova uà fúndisa maẋokololo a jixi. Sobha iê ua kà mu bhana o nguzu ni kutumina ua kà zangeleka o kutena kua muthu uê ua mu undu ni maji.

Anʼa Eli abhukumuka

¹¹ Kiabhiti imʼiii Elikana anga uia ku Lama ku bhata diê. O mona u xala mu xibhidila Jihova bhu pholo ia Eli, o Nganga.

¹² Anʼa Eli-phe, a mala, anga a sekala kiavulu kuma a kexile anʼa kadiaphemba; a lembua kuijiia ngó Jihova.

¹³ Mukonda o kífua kia kexileku ni jinganga ni mundu, muthu uoso kia bheka sata, selevende ia nganga u tula, kioso kiala kufuluka o xitu mʼombia, ni ngalufu iê ia mazu atatu bhu lukuaku luê,

¹⁴ anga a toma na-iu mu mbasinha, mba mombia, mba mu kalelá, mba mu kienga mualu kanga o xitu, ioso kiá ia zaula ni ngalufu iii, nganga u i tambula, i kala iê. Kiene kia kexi mu bhanga bhu Silo, ku akua Izalaiele oso a kexi mu kuiza-bhu.

¹⁵ Kioso ue kiluua a ximika o banha, selevende ia nganga uiza ku muthu uoso ua sate, uixi: Beka xitu iii phala nganga, iê ia kuzuza; mukonda muene kokué ka mesena-ku xitu iólambe, ua mesena ia uisu.

¹⁶ Muthu-phe se u kumbulula, uixi; A diange hanji kuximika o banha, phala u katule kiua kioso kia Seme o muẋima ué; muene-phe uila, uixi: Kana, nguamiʼ ʼami! U ngi bhane-iu kiá kindala muene, o ki uila kana, ngi i tambula mu nguzu.

¹⁷ O kituxi kia minzangala iii anga ki vula dingi kinéne bhu pholo ia Jihova, kuma mala enhá a tobhesa jinga o sata ia Jihova.

O Kuxibhidila kua Samuuele

¹⁸ Samuuele anga u kala mu xibhidila bhu pholo ia Jihova, hanji monandenge muene, ua zuata efodi ia linhu.

¹⁹ Manhʼiâ anga u mu tungila kambinza, uia ni ku mu bhekela-ku, kuiza muvu kiene, kuiza muvu kiene, kieza jinga ni munumʼiê ku sata iene mu bhana ku mivu ioso.

²⁰ Eli anga u benzela Elikana ni mukajiʼê, uixi: Jihova a ku bhane mbutu ku muhatu iú, bhu kididi kia ujitu ua bhingile muene kua Jihova. Anga aia ku bhata diâ.

²¹ Jihova anga u bhana dibesá kua Hana, muene u imita, anga u vuala anʼatatu a mala, ni anʼaiadi a ahatu. Kamona Samuuele anga u kala mu kudila bhu pholo ia Jihova.

Eli u bazela o tuana tuê

²² Kiki-phe Eli ua kuka kiá kiavulu; anga u ivua ioso iala mu bhanga anʼê ku akua Izalaiele oso, ni kioso anʼê ki ala mu zeka ni ahatu ene mu bhongoloka bhu muelu ua balaka ia ditakanenu mu kubhanga kikalakalu.

²³ Anga ua: ambela, uixi: Enu mua-lu bhangela-hi ima kala iii? Mukonda o ima iaiibha i mua-lu bhanga, ngala ku ivua ku mundu uoso.

²⁴ Kana tata, anʼami! Fuma iii i ngala ku mʼivua na-iu ki ia uabha; mundu uangene ua Jihova muala ku a tondalesa.

²⁵ Muthu se u ta kituxi kua mukuâ, Nzambi u mu fundisa; muthu-phe se u ta kituxi kua Jihova, u mu zuelela nanhi? Sumbala tatâ ua zuela kiki, maji ene kʼevu dízui dia tatʼâ, mukonda Jihova ua mesena kiá ku a jibha.

²⁶ Mona Samuuele anga uia ni kukula, ni kuuabhela Jihova, ni kuuabhela ue athu.

Eli a mu bazela kuala polofeta. O kusenguluka kuê

²⁷ Anga kuiza muthu mukua Nzambi kua Eli, uixi: Eme Jihova uambe kiki: Kifua, ni kidi muene, ki nga di tukuluile ku dibhata dia tatʼenu, kia kexile hanji mu Ijitu mu ubhika ku mbanza ia Falaó?

²⁸ Kʼeme nga mu solo muene mu miiji ioso ia Izalaiele mu ku kala nganga iami ia kubanda bhu kalatódio kami, ni kubhanga fumasa ia uasu ua dizumba, ni kuzuata efodi bhu pholo iami? Kʼeme nga bhana dibhata dia tatʼenu o jisata joso ja anʼa Izalaiele ja kuoha mu túbhia?

²⁹ Muala kudiotela-hi bhoxi ni kutitidila jinga o jisata jami ni ilumbu iami, ia kijila ki nga bhana kubhangela mʼonzo iami, anga ki bhinga anʼé eie u beta ku a xila, eme ndenge, hé mu di netesa enʼuenu ni kutuama kutambula jixitu jambote ku jisata joso ja mundu uami ua Izalaiele.

³⁰ Mukonda dia kiki Jihova, Nzambi ia Izalaiele uambe, uixi: Nga ki ambele muene ngixi o dibhata dié ni dibhata dia tatʼenu, dià xalela-ku kiá mu kuimajana jinga ni kubhanga ujitu bhu pholo iami; maji kiki-phe, eme Jihova, ki ngʼambeleʼokio nga ki texi dikanga; kuma oso a ngi xila eme, ene uâ eme ngʼa xila, oso-phe a ngi tènde, a kà jingunuka katé kia sebuluka muene.

³¹ Talesa, kua-nda kuiza izuua, nga kà ku batula lukuaku lué, ni lukuaku lua dibhata dia tatʼenu, mu bhata dié ki mua moneka dingi muadiakimi ua kuka.

³² Ua kà mona divuua mʼonzo ié, anga uà kala ni luimbi muʼaxaxi ka jimbote joso ji ngi bhanga Izalaiele; maji eie ku izuua ioso mu bhata dié ki mua kà moneka muadiakimi.

³³ Uoso diiala momué nga kà kamba ku mu batula bhu kalatódio kami, ua kà kala muthu ua ku ku jidisa mesu, ni ku ku tatesa muẋima moxi; oso a sokoloka mu bhata dié, a kà fuila mu kubhiẋila ngó ku ukota.

³⁴ Kijimbuete kiki kia ku idikiza, kia-nda kuiza ku thandu dia anʼé aiadi Hofini ni Finehase; a kà fuila kizuua kimoxi ene oso kiiadi kiâ.

³⁵ Nga kà zangeleka nganga iami iengi ia fiiele, uà kala muthu ua kukumbidila ioso ia ngi kala ku muẋima ni mu kilunji kiami; muene nga ka mu tungila dibhata diakolo, uà kala mu kuenda jinga bhu pholo ia muthu uami nga mʼundu ni maji sé dizubhilu.

³⁶ Kia kà bhita-phe kuma, uoso uà kà subhuka mu dibhata dienu, uà keza ku mu fukamena muene, mu ku mu bhinga kakitadi ka phalata ni kadikende ka mbolo; hé ua kèla kuma: Nga ku diondo, ngi te bhu kididi kia kukalakala ku unganga, phala eme ue ngi tene kumona-ku kakibhasu ka mbolo, ngi die ka dikoka.