I Samuuele 19 - O Mikanda Ikola

Jonata u luulula tatʼâ ni Davidi

¹ Saúlo anga u ambela monʼê Jonata ni jiselevende jê joso kuila a jibhe Davidi. Jonata-phe, monʼa Saúlo, ua zolele kiavulu Davidi.

² Jonata anga u tangela Davidi, uixi: Saúlo, tatʼetu, ua mesena ku ku jibha. Nga ku diondo-phe, dimuka! Ki kúkia, u kala kididi kiakondama kia kusuama.

³ Eme-phe mungu ngi tunda ni tatʼetu, hé ngʼimana-nê mu mukáu, bhuazukama ni bhuoso bhu uala, anga tatʼetu ngi di kunda-nê maka mé eie phala ngi mu ívue; kioso-phe dingi ki ngi mona-ku ngi ku tangela-kiu.

⁴ Jónata bhenhobo u tumbula Davidi kiambote kua Saúlu tatʼâ, uixi: Sobha ku te kituxi kua mubhikʼê Davidi, kuma muene ka te kituxi ko kué. Imbamba iene ioso iene kubhanga muene kó kuê, ia uabha muene.

⁵ Kuma muene muenhu uê ka u suu, kifua ua u ambatele bhu lukuaku, anga u jibha mukua Fidíxia, Jihova iu ua bhesa kikóue kia dikota kua Izalaiele; eie-muène ue u mbangi kuma ua ki muene, anga u kala mu sanguluka; eie ua mu edile: Tanaku! Kiki-phe u tela-hi kituxi kia kuzunza manhinga a kambe mulonga, hé Davidi u mu jibhʼê ngó sé kikuma?

⁶ Saúlo anga u ívua dízui dia Jonata; Saúlo anga u loka, uixi: Kala Jihova kiala ku muenhu, Davidi ka mu jibha, kana.

⁷ Jonata anga u ixana Davidi, u mu tangela ima ioso iii. Jonata anga u bheka Davidi kua Saúlo, u kala bhu pholo iê kala kia kexile mʼokulu.

Davidi u lenga dingi Saúlo

⁸ Anga ku kala dingi ita: Davidi anga u tunda, u lua ni akua Fidíxia, u a jibha ni kihaẋi kia dikota; ene anga a mu lenga.

⁹ O nzumbi iaiibha-phe anga i tunda kua Jihova hé i kala ku thandu dia Saúlo. Kioso kia xikama mʼonzo iê, ni sosa iê ia kuata bhu lukuaku; Davidi anga u kala mu xika mbànza ni lukuaku luê,

¹⁰ Saúlo anga u sota kukuba Davidi nʼa mu batele ku mutôto ni sosa. Saúlo kia takula o sosa, muene-phe ua i ebha, anga u tunda ni lusolo bhu pholo ia Saúlo, o sosa anga i kuata mu mutôto, Davidi anga u lenga, ua bhulaka usuku uenhó.

¹¹ Maji Saúlo u tuma athu kʼonzo ia Davidi, phala ku mu batamena nʼa mu jibhe mu kimene. Mikala-phe, mukaji a Davidi, anga u mu dimuna, uixi: Se u kamba kulenga ni usuku iú nʼu bhulula o muenhu ué, mungu ki kúkia mu kimene, a ku jibha!

¹² Kienhiki Mikala u kuatekesa Davidi, u mu zozela bhu njanena; muene anga u lenga, kienhókio hé u bhulaka.

Mikala u nganala tatʼâ, u kuatekesa David

¹³ Mikala-phe anga u kuata kiteka u ki zekesa mu hama, u ta phetu ia ndemba ja hombo ku mutuelu, u ki futa dibeka.

¹⁴ Saúlo-phe kia tumu athu kukuata Davidi, muene-phe uixi: Uala kukata.

¹⁵ Saúlo anga u tuma dingi athu kutakana David, uixi: Ngi bhekedienunê ni hama iê muene, ngi mu jibhe.

¹⁶ Athu-phe a a tumu, kia zubha kubokona, a sanga kiteka kiki kia zeka mu hama, ni phetu ia ndemba ja hombo ku mutuelu.

¹⁷ Saúlo anga u ambela Mikala, uixi: Eie ua ngi nganalela-hi kiki, nguma iami ua mu dimuna, iu ua lenge? Mikala anga u ambela Saúlo, uixi: Muene ua ngʼambela, uixi: Ngehe ngiie; eie se uila kana, ngi ku jibha.

¹⁸ Kienhiki Davidi-phe u lenga, u mu xia, anga u bhulaka hé uia kua Samuuele bhu Lama, u mu kunda iene ioso ia mu bhange Saúlo. Ni muene ni Samuuele-phe anga aia a xikama mu Naiote.

¹⁹ Anga a ki jimbuila Saúlo, exi: Davidi-ze uala mu Naiote ku Lama. Saúlo anga u tuma athu kukuata Davidi phala ku mu bhekela-nê.

²⁰ Kia zubha-phe kusanga o kilunga kia jipolofete ala mu ximana ni kutanga uanji ua upolofeta, ni Samuuele uemana kuma muene mesene iâ, Nzumbi ia Nzambi hé uiza ku thandu dia jiphunga ja Saúlo, ene uâ anga a kala mu ximana ni kutanga uanji ua upolofeta.

²¹ Kia ki jimbuila Saúlo, muene u tuma-ku dingi athu amukuá, ene ua a kala mu ximana ni kutanga uanji ua upolofeta. Saúlo anga u tuma athu luamukuá lua katatu, ene ua a kala mu ximana ni kutanga uanji ua upolofeta.

²² Anga Saúlo u di endela muene ku Lama, hé u tula bhu kixima kia dikota bhu Seku, anga u ibhula, uixi: O Samuuele ni Davidi ala kuebhi? Bhu kala muthu u mu kumbulula, uixi: Ala ku Naiote bhu Lama.

²³ Muene anga u katuka kuia ku Naiote bhu Lama; o Nzumbi ia Nzambi anga uiza ue ku thandu dia muene, anga uia ni kuximana ni kuzambuila ue mu upolofeta, katé kia bhixila ku Naiote bhu Lama.

²⁴ Anga u zula ue izuatu iê, u ximana ni kutanga uanji ua upolofeta bhu pholo ia Samuuele, hé u zeka ni tuẋi kumbi diosuʼodio ni usuku uê. Mukonda dia kiki a ki ta dingi ku mukûmbi, exi: Saúlo manhi ua di bundu ué mu jipolofeta?