I Samuuele 18 - O Mikanda Ikola

Ukamba ua Davidi ni Jonata

¹ Bhenhobho anga ki bhita kuila, kia zubha Davidi kuzuela ni Saúlo, muẋima ua Jonata u takana ni muẋima ua Davidi, Jonata anga u zola Davidi kala kia di zolo muene.

² Saúlo anga u mu tambula kizuua kienʼokio, ka mu ehela kuvutuka dingi ku bhata dia tatʼâ.

³ Ni Jonata ni Davidi-phe anga a ta kikutu kia ukamba, mukonda o Jonata ua zolele Davidi kala kia di zoloʼê muene.

⁴ Mukonda dia kienʼiki, Jonata anga u zula divunga diê-muène dia zuata, u di ta kua Davidi, ni ibhakatu iê katé ni xibhata iê, ni mufula uê, ni phonda iê.

⁵ Davidi anga uia ni ku tunda kuoso kua mu tumu Saúlo, u kumbidila ni kilunji u bhanga unjimu mu ima ioso. Saúlo anga u mu bhana kijingo kia kutumina makuenze a ita, anga ki uabhela mundu uoso katé ni akua mbele ia Saúlo ene ue kia a uabhela.

Mukûmbi ua ahatu u iibhila Saúlo

⁶ Anga ki bhita-phe kuila, kilômbo kioso kia ita mu kubhongoloka ku bhata kia tundu Davidi mu kujibha Ngoliia dia mukua Fidíxia, kuma ahatu oso a tunda mu mbahata moso ma izalaiele, ni kuimba ni kukina mu kauidila sobha Saúlu, ni kusanguluka ni kuxika tungoma ni isaka.

⁷ Ahatu anga a di tambuijila mu kuimba, kioso kiala kuxika, exi: Saúlo ua jibha jimidi, Davidi-phe makuinhi a jimidi.

⁸ Saúlo anga u kala ni njinda iavulu, kuma mukumbi iú ua mu iibhila; mbata uixi: Davidi a mu fika makuinhi a jimidi, eme jimidi ngó! Kua ngi xala-hiphe dingi mu ku ngi tambula o ungana?

⁹ Saúlo anga u kala mu toka mesu kua Davidi, tunde bhu kizuua kienʼokio.

¹⁰ Ki kuákie, mu kizuua kiamukuá, nzumbi iaiibha i tunda kua Nzambi anga i kuata Saúlo ni nguzu, anga u kala mu xingila mʼonzo. Davidi-phe anga u kala mu xika mbànza ni lukuaku luê, kala kiene mu bhanga kiá izuua iamukuá. Saúlo anga u kala ni sosa bhu lukuaku luê.

¹¹ Saúlo anga u zenga o sosa iê, hé u i takula kua Davidi kuma uambe, uixi: Davidi ngi mu kuba dionga, ngi mu phaphela ku mutôto. Davidi anga sosa u iebha luiadi, u tunda bhu pholo iê.

¹² Saúlo anga u kala ni uoma ua Davidi, mukonda Jihova uala-nê; maji o kua Saúlo Jihova ua tundu-ku kiá.

¹³ Kienhiki Saúlo ua katula Davidi mu mbèle iê, anga u mu bhanga kabhitangu ka kutumina midi ia muthu; anga u kala mu tunda, u kala mu bokona bhu pholo ia mundu.

¹⁴ Davidi anga u kumbidila ni kilunji mu jinjila jê joso; Jihova anga u kala-nê.

¹⁵ Saúlo-phe kia mu mono kuma ua kumbidila ni kilunji, o ima ioso ia mu tunda kiambote, u mu kala ni hele.

¹⁶ Izalaiele ioso-phe ni Juda anga a zola Davidi; kuma Davidi u kala mu tunda, u kala mu bokona bhu pholo iâ, ni ku a tuamenena kuene kuoso mu ita.

Saúlo uixi Davidi ngi mu jibhila mu ndunge

¹⁷ Saúlo anga u ambela Davidi, uixi: Eie-ze, monʼami ua muhatu, Melabe o dikota, ngi ku bhana-nê mu kusakana, kabasa ua kolokota ngó ni uzonda ua ku ngi bhângela, mu kúlua ita ia Jihova. Kuma Saúlo uambe ku muẋima uê, uixi: Lukuaku luami ki lu mu tule, mukonda o ku mu jibha eme, ki ki uabha; kota a fuile ku lukuaku lua akua Fidíxia.

¹⁸ Bhenhobho Davidi anga u ambela Saúlo, uixi: Eme-phe nanhi? O kikexilu kiami ngoho kiahi? Mba o familia ia tatʼetu akuahi mu Izalaiele, phala eme ngi kale lelu ngi holome ia muenexi?

¹⁹ Kubhixila-phe bhu thembu, kuila Melabe monʼa Saúlo ua muhatu a tokala ku mu bhana kiá kua Davidi, a mu bhanʼê kua Andidiiele, mukua Mehola kukala mukajiʼê.

Davidi holome a Saúlo

²⁰ Maji Mikala, monʼa Saúlo ua mukuá ua muhatu, anga u zola Davidi; hé a kitangela Saúlu, Saúlu anga ki mu uabhela.

²¹ Kuma Saúlo, uixi: Ngi mu bhana-nê phala a kale mubhetu ua ku mu kuatela mbé o lukuaku lua akua Fidíxia lu mu tule ku thandu a jime o mbutu. Kienhiki Saúlo anga u ambela dingi Davidi lua kaiadi, uixi: Lelu u kala u holomeʼami.

²² Saúlo anga u ambela akua mbèle iê, uixi: Muenda ni kuzuela ni Davidi ku mbandu, mu mu ila kuma: Eie-ze muenexi ua ku uabhela, ni akua mbèle iê oso a ku zola; kala-phe u holomeʼa muenexi.

²³ Akua mbèle ia Saúlo anga a zuela maka enhá mu mátui ma Davidi, Davidi-phe uixi: Enu kifua kia mi tolela o kukala holomeʼa muenexi, eme muene ngi ngadiama ia hatu, ngi muthu a ngi tènde?

²⁴ Akua mbèle ia Saúlo anga a mu tangela, exi: Kia zuela Davidiʼiki.

²⁵ Saúlo anga u zuela, uizi: Davidi mu mu ambela kiki: Muenexi ka mesena kilembu mukonda ua mesenʼé ngó hâma ia inhûnga ia akua Fidíxia, mu ku mu vutuila phonzo ku jinguma jê. Saúlophe ua zuela kiki mukonda ua fika kuma Davidi ua-nda ku dibhala bhu lukuaku lua akua Fidíxia.

²⁶ Akua mbèle kia tangela Davidi makʼama, Davidi kia mu uabhela kiambote kukala holomeʼa muenexi. Izuua-phe ia mu xindi kiluua ibhua.

²⁷ Davidi anga u katuka kiá, ni muene ni makuenze mê a mu tokala, anga a jibha ku akua Fidíxia, hâma jiiadi ja mala. Davidi anga u bheka inhunga iâ, hé u thelekala kua muenexi konda ia mu xindi ia tena, phala a kale holomeʼa muenexi. Saúlo anga u mu bhana Mikala, monʼê ua muhatu, mu kala mukajiʼê.

²⁸ Saúlo anga u tongolola, hé u kʼijiia, kuma Jihova uala ni Davidi; Mikala monʼa Saúlo ua muhatu, anga u zola Davidi.

²⁹ Saúlo kia ki mono, anga u bandekeza dingi o kukala ni uoma ua Davidi; Saúlo anga u kala nguma ia Davidi izuua ioso ia muenhu uê.

³⁰ Jisobha ja akua Fidíxia anga ji kala mu tunda ku izuua-izuua phala kúlua-nâ; maji kioso-phe kia tunda, Davidi u beta kukala ni kilunji kia kulenda o kutolola jisobha ja akua Fidíxia, makuenze oso a Saúlo ndenge; dijina diê anga di fumana dingi kiavulu.