I Samuuele 17 - O Mikanda Ikola

Ita íbaza dingi ni akua Fídixia. Ngoliia dia Ngate

¹ Kiki-phe akua Fídixia a bhongolola dingi ilombo iâ mu kúlua ita; anga a bhongolokela bhu Soko, bhua tokala kua Juda, a ta kibangu kiâ mu kaẋi ka Soko ni Azeka mu Efesedamimu.

² Saúlo ni mala ma akua Izalaiele anga a bhongoloka uâ, a ta kibangu kiâ mu honga ia Ela, a di iudika mu kúlua ni akua Fidíxia.

³ Aku Fidíxia anga emana ku mulundu ku sámbua dimoxi, akua Izalaiele emana uâ ku mulundu ku sámbua diamukuá, mu kaẋi mua bhiti honga.

⁴ Bhu kibangu kia akua Fidíxia anga bhu tunda dizonda, dijina diê Ngoliia mukua Ngate; muenhú o kitala kiê kóvado jisamanu ni phalumu imoxi.

⁵ Ku mútue ua zuata kapasete ka ngôndo iólunge ni utadi uengi, mu mukutu u zuata mbinza ia utadi, ua di sokejeka kala ibhela ia mbiji; mbinza ienhiʼii i pezala midi jitatu ja xikulu ja ngôndo.

⁶ Mu inama u zuata jixapa ja ngôndo, ngubu ia ngôndo iene ia di xitila na-iu isuxi.

⁷ O mubhinhi ua dionga diê u soka ni muẋi ua mulongo, o mútue uene ua sosa iê u pezala hâma jisamanu ja xikulu ja felu; kibese kiê ua mu ambatela o ngubu iê u mu tuamekesa ku pholo.

⁸ Anga u imana, u handekela mu kolela o kilômbo kia Izalaiele, uixi; Mua di tela-hi ku minono mu kúlua? Eme ki emʼiú, ngi mukua Fidíxia, enu-phe ki mu abhika a Saúlo? Solenu uoso diiala phala eze kunu a ngi sange, nda ngi di ẋine-nê.

⁹ Se muene ua tena kubhânga ni eme, ni a ngi jibhe, etu-phe tu kala tu abhikʼenu; eme-phe se nga mu lende, ni ngi mu jibha, enu mu kala mu abhikʼetu, mu tu bhikila jinga.

¹⁰ Mukua Fidíxia muenhú anga u zuela dingi, uixi: Nga lebhula lelu a kilômbo kia Izalaiele, nga mi luisa kaẋu, ngi bhienu diiala ngi bhânga-nê.

¹¹ Saúlophe ni Izalaiele ioso, ki evu kia zuela mukua Fidíxia iú, a diuana, a kala ni uoma uavulu.

Jese u tuma Davidi kubhekela makotʼê huta

¹² Davidi-phe monʼa mukua Efalata mu Beleme ku Juda, dijina diê Jese; muenʼiu anga u kala ni nake dia ana a mala; muadiakimi kiá mu izuua ia Saúlo, ua kuka kiá muene muʼaxaxi ka athu.

¹³ Anʼê atatu a makota kienhiki aii ni Saúlo ku ita. Anʼatatu aii ku ita, majina mâ enhá: o dikota Eliiaba, kiubha kiê Abinadabe, kiubhata kiâ Xama.

¹⁴ Davidi kifua kasule kâ; o makota kitatu a kaiela Saúlo.

¹⁵ Davidi anga u kala mu kuila, hinu u kala kua Saúlo, hinu u kala ku bhata mu kuinga jimbudi ja tatʼâ mu Beleme.

¹⁶ Mukua Fidíxia muenhú anga u kala mu tunda jinga kimeme ni ngoloxi, hé u dʼidikiza mu makuinhi auana a izuua.

¹⁷ Kizuua kimoxi Jese anga u ambela monʼê Davidi, uixi: Ndoko, tambula efa ia masa mókange, ni kuinhi dia mbolo didi, uie lusolo u bhekele makotʼé bhu kibangu.

¹⁸ O kuinhi dia hejuʼidi u di bhekela kaphitangu ka jimidi jâ, u kunde o makotʼé kioso kia zekele se ala kiambote, uize-ku ni njimbu iâ u tu tudile se a bhindamena ue kima.

¹⁹ Thembu iii ni Saúlo, ni ene, ni mala oso a Izalaiele a kala mu honga ia Ela, mu kúlua ni akua Fidíxia.

²⁰ Kúkia ni kimene Davidi anga u dimeneka, jimbudi jé u ji xa ni kafunga, u zangula kimbamba kiê, uia kala kia mu tumu tatʼâ Jese. Anga u tula bhu kibangu mu kithangana kioso kiala kutunda o kifuẋi, ala ku ta nzòngo phala ku di lua.

²¹ Ni Izalaiele ni akua Fidíxia a di ta ku monono, kilômbo ni kilômbo a di bhana jipholo.

²² Davidi anga u xa muhamba uê kua iú ua tambula konda ia imbamba, u lengela kuala kuia kilômbo, u sanga phange jê, hé ua menekena.

Kiiala Ngoliia u xinga akua Izalaiele

²³ Davidi kioso-phe kiala kuzuela ni phange jê, talesa, o dizonda dia mukua Fidíxia bhu Ngate, dijina diê Ngoliia, u tukuluka, ua tundu ku kilômbo kia akua Fidíxia, anga u zuela kala kiene mu kuzuela kiá. Davidi anga u mu ivua.

²⁴ Bhenhobho mala ma izalaiele oso kia mu mono, a lenga, a kala mu teketa ni uoma uavulu.

²⁵ Mala ma Izalaiele anga a zuela, exi: Enu mua mono, kiiala kia zaúka? Ua zaúka muene mu lebhula Izalaiele. Uoso-phe diiala di tena ku mu jibha, muenexi uetu ua-nda ku mu bhana jimbongo javulu, u mu bhana monʼe ua muhatu mu kusakana, o dibhata dia tatʼâ di kala ku ufolo mu Izalaiele, ka futu dingi díjimu.

²⁶ Davidi anga u zuela ni mala a mu imanena, uixi: A mu bhanga kiebhi, uoso u jibha mukua Fidíxia iú, anga u katula o dilebhu dioso dia te muene kua Izalaiele? Kiiala kienhiki kia mukuadibôlo ku Fidíxia, mukua-hi muene, phala a tene kulebhula kiki o kilômbo kia Nzambi ia muenhu?

²⁷ Mundu anga a mu kumbulula kiki, exi: Kienʼiki ni kienʼiki kia mu bhanga, uoso u tena ku mu jibha.

²⁸ Bhenhobho kota diê Eliiaba u mu ivua kioso kiala kuzuela ni athu, njinda anga i mu kuata ia Davidi, uixi: Eie ueza bhabha kubhanga-bhu Ohi? O tumbudi tuofele kiá tunhá eie ua tu xila nanhi mu iangu? Eme nga ku ijiia o ukumbu ué, ni kuiibha kua muẋima ué. Ueza ngó kutala o ita iene.

²⁹ Davidi-phe uixi: Nga te kituxi kiahi? Ngebhulʼami ngó lumoxi luene.

³⁰ Anga u sondoloka bhuala phangʼiê, u bhana pholo ku muthu uengi, u kuata dingi kuzuela-nê. Mundu anga a mu vutuila kala kia dianga ku mu vutuila kiá.

Davidi uixi ngiia kubhânga ni kiiala

³¹ O athu ki evu kioso kiala kuzuela Davidi, a ki kunda Saúlo; muene anga u tuma ku mu ixana.

³² Davidi anga u ambela Saúlo, uixi: Ki bhu kale muthu u botomoka muẋima mukonda dia kiiala kiki kia mukua Fidíxia. Eme-muène ngi mubhikʼé, ngiia kubhanga-nê.

³³ Saúlo anga u ambela Davidi, uixi: Eie ku tena kuia kutakana ni mukua Fidíxia iú, mu kubhànga-nê, kuma eie u mona-ndenge hanji, muene-phe diiala dia ita tunde undenge uê.

³⁴ Davidi anga u ambela Saúlu, uixi: Eme ngi mubhikʼé, nga kexile mù kuinga jimbudi ia tatʼetu, anga bhuiza hoji ni úlusu hé i kuata kambudi mu kilunga,

³⁵ anga ngi i kaia, ngi i beta, ngi ka tambula mu kanu diê; o kia ngi lungulukila kuala o kiama, ngi ki kuata mu muezu, ngi ki ẋuua dikanu, ngi ki jibha.

³⁶ Eme ngi mubhikʼé, kienhiki ki nga jibha o hoji ni úlusu; kiiala kiki-phe kia mukua-dibôlo ku Fidíxia, kiene ue ki ngi mu bhanga; mukonda muene ua lebhula kilômbo kia Nzambi ia muenhu,

³⁷ Davidi, uixi dingi: O Jihova ua ngi kudila ku iala ia hoji, ni ku iala ia úlusu, muene ue u ngi kudila bhu maku ma mukua Fidíxia iú. Saúlu anga u ambela Davidi, uixi: Kuabhu! Ndeie, Jihova muene a ku bande.

³⁸ Saúlo anga u zuika Davidi ibakatu iê, u mu ta kapasete ka ngôndo ku mútue, u mu ta mbinza ia ibhela ia utadi.

³⁹ Davidi anga u maneka xibhata ku thandu dia mbinza iii, anga u sota kuenda; mukonda ima iii ki ia mu ijidila luua, ua lémbua. Davidi anga u ambela Saúlo, uixi: Ki ngi tena kuenda ni imʼiii, mukonda ki ia ngʼijidila. Davidi anga u i zula.

⁴⁰ Anga u kuata dikoue diê bhu lukuaku, u sola tumatadi tutanu mu ngiji, tua ẋanana kiambote, u tu ta mu mbuenge iê ia kabhila; u kuata ni mbala-fundu iê bhu lukuaku, anga uia ni kuzukama kua mukua Fidíxia.

Davidi u di bonga ni mukua Fidíxia

⁴¹ Mukua Fidíxia anga uiza ni kuzukama kua Davidi; o kibese kiê ua mu ambatela ngubu, ua mu tuamenena ku pholo.

⁴² Mukua Fidíxia-phe ki edi suí, u mona Davidi; anga u mu xikulula, u mu toka mesu bhenhobho; kuma hanji uala monʼa ndenge, ua kusuluka, uala hanji ni pholo ia uabha ia undenge.

⁴³ Mukua Fidíxia anga u ambela Davidi, uixi: Kifua ua ngi mono ngi ímbua, uala ku ngʼendela ni mbangala? Mukua Fidíxia anga u xinga Davidi jindaka ni ku di hambelela ku jinzambi jê.

⁴⁴ Mukua Fidíxia anga u ambela Davidi, uixi: Ngi bhiẋile bhabha, lelu xitu ié ngi i bhana jinjila ji bhita bhulu, ni iama ia mukau.

⁴⁵ Davidi bhenhobho u ambela mukua Fidíxia, uixi: Eie ua-lu ngi bhixila ni mukuale ué, ni sosa, ni ngubu; eme-phe ngi ku bhixila mu dijina dia Jihova dia ifuẋi, Nzambi ia kilômbo kia Izalaiele, ió ua mu lokalala eie ni ku mu lebhula.

⁴⁶ Lelu muene Jihova ua-nda ku kubhakula bhu lukuaku luami; ngi ku nemeka, ngi ku batula mútue; o imbi-phe ia kifuẋi kia akua Fidíxia ngi i bhana lelu ku jinjila ji bhita bhulu ni iama ia mukáu, phala mu ngongo ioso a kʼiji-ie kuma sai-ku Nzambi mua Izalaiele.

⁴⁷ O mundu uoso iú ua bhongoloka bhabha nda u ijiie ue kuila Jihova ka bhulula ni xibhata mba sosá, kuma o ita, ita iangene ia Jihova. Muene lelu ua-nda ku mi bhakula bhu maku metu.

Davidi u jibha kiiala

⁴⁸ Bhenhobho anga ki bhita kuila, kia zanguka mukua Fidíxia mu kuia kubhiẋila kua Davidi, Davidi ue u lenga mu kuia ku kilômbo kia jinguma mu kutakana ni mukua Fidíxia.

⁴⁹ Davidi anga u ta lukuaku mu mbuenge iê; u katula-mu ditadi dimoxi, hé u di takula ni mbala-fundu, anga, di kuata mukua Fidíxia bhu dibhomo. Ditadi anga di bokona bhu dibhomo diê, kiiala hé u di bhala ni pholo bhoxi.

⁵⁰ Kienʼiki Davidi kia lende o mukua Fidíxia, ni mbalafundu ni ditadi, anga u kuama mukua Fidíxia, u mu jibha. Davidi-phe ka kuatele xibhata bhu lukuaku luê.

⁵¹ Davidi anga u lenga, hé u sambela mukua Fidíxia ku thandu, u fuomona o xibhata iê-muène mu kizu, u mu zubhidisa, hé u mu batula o mútue. Akua Fidíxia-phe kia mono kuma dizonda diâ diafu, a lenga.

⁵² Mala ma akua Izalaiela ni Juda anga a balumuka ni ku ta nzòngo ia kibulukutu kia ita, a kaia akua Fidíxia katé bhua suku o honga, bhu Ngate, katé bhu mielu ia kimbaka kia Ekolone. Ku akua Fidíxia, oso a a kuama anga aia ni ku dibhalabhala, mu njila mu izala ni imbi iâ tunde bhu Salaíme katé bhu Ngate ni bhu Ekolone.

⁵³ Anʼa Izalaiele-phe ki a vutuka mu kukaia akua Fidíxia, a di lukula mu ku bhûnda o kibangu kia jinguma jâ.

⁵⁴ Davidi anga u zangula mútue ua mukua Fidíxia u u ambata, u u bheka mu Jeluzaleme; o ibhakatu iê-phe Davidi anga u i ta mu balaka iê.

⁵⁵ Saúlu kia mono Davidi kutunda mù kuia kubhanga ni mukua Fidíxia, u ambela Abinele, kabhitangu ka kifuxi kiê, uixi: Abinele, monʼú, monʼa nanhi? Abinele, uixi: Kuku, Kalè-ku kala ki uala ni muenhu uê moxi, ki nga kʼijiia.

⁵⁶ Kuala sobha: Ibhula mba munzangala iú monʼa nanhi?

⁵⁷ Davidi-phe kia vutuka mu kujibha mukua Fidíxia, Abinele u mu kuata, u mu bheka bhu pholo ia Saúlo, ni mútue ua mukua Fidíxia bhu lukuaku luê.

⁵⁸ Saúlo anga u mu ibhula, uixi: Eie munzangala ua kime, u monʼa nanhi? Davidi uixi: Eme ngi monʼa mubhikʼé Jese, mukua Beleme.