I Samuuele 16 - O Mikanda Ikola

Samuuele a mu tuma ku Beleme mu kuunda Davidi

¹ Jihova anga u ambela Samuuele uixi: Ua-nda kusuka bhebhi ni kudila Saúlo, se ki tualʼiki eme nga mu ditunu ku ungana ua Izalaiele? Izalesa lumbinga lué ni maji, uize. Eme nganda ku ku tuma kua Jese, mukua Beleme; mukonda nga solo sobha iami muʼaxaxi ka anʼê.

² Samuuele-phe, uixi: Ngiia-ku kiebhi? Mukonda Saúlo se u kʼivua, u ngi jibha. Jihova uixi: Uia ni seseme ia ngombe, ua kèla kuma ngeza mu satela Jihova.

³ Ua kèxana Jese ku sata, eme-phe ngi ku idikiza dingi kioso ki u bhanga. Ua kà unda ni maji muthu uami uoso ngi ku ambela-nê dijina diê.

⁴ Samuuele anga u bhanga kioso kia mu ambela Jihova, u iza bhu Beleme. Adiakimi a bhata anga eza kutakana-nê ni kuteketa, exi: Ki uezʼiki ueza ni paze?

⁵ Muene uixi: Paze iene; ngeza mu satela Jihova. Di bônzienu, mu ize kumoxi ni eme ku sata. Anga u bonza Jese ni anʼê, anga u a exana ku sata.

⁶ Anga ki bhita kuila kia zubha ene oso kubokona, u talesa Eliiaba, uixi: Kidi muene, o muthu ua Jihova a solo ku mu unda ni maji, mueʼiú kiá, uala bhu pholo iê.

⁷ Jihova-phe u ambela Samuuele, uixi: Kana kutala o pholo iê, mba o kitala kiê kialebha, mukonda eme nga mu ditunu. Kuma Jihova kene kutala kala ki tala o muthu; mbata o muthu u tala kidifua kia kanga, Jihova-phe u tala ku muẋma.

⁸ Jese bhenhobho anga u ixana Abinadabe, u mu bhitisa bhu pholo ia Samuuele. Samuuele uixi-phe: Iú ue ki muene a mu tungula kuala Jihova.

⁹ Jese anga u bhitisa-bhu ue Xama. Samuuele uixi-phe: Iú ue ki muene a mu tungula kuala Jihova.

¹⁰ Kienhókio Jese anga u bhangesa kuila o sambuadi dioso dia mona a mu tokala u a bhitisa bhu pholo ia Samuuele. Samuuele anga u ambela Jese, uixi: Iá ki ene a a tungula kuala Jihova.

¹¹ Samuuele anga u ambela Jese, uixi: Anʼé oso a tenena bhenhabha? Jese uixi: Kua xala hanji o kasule kâ, muene-phe uala mu kuinga jimbudi. Samuuele anga u ambela Jese, uixi: Tuma ku mu takana; kuma ku meza ki tu xikama-ku katé muene ki eza.

¹² Anga u tuma ku mu takana. Muene-phe ua kusuluka kiambote, ua uabha pholo, ki ku uabhela ku mu tala mesu. Jihova phe uixi: Balumuka, u mu unde; muene kiabhʼú.

¹³ Samuuele bhenhobho u sunga lumbinga lua maji, u mu unda muʼaxaxi ka jiphange jê. Nzumbi ia Jihova anga u tula ni nguzu ku thandu dia Davidi tunde kizuua kienʼokio. Kienhiki Samuuele u balumuka, hé u vutuka ku Lama.

Saúlo u kala mu tata ni nzumbi iaiibha

¹⁴ Nzumbi ia Jihova anga kua Saúlo i tunda-ku; anga bhu kala nzumbi iaiibha ia tundu kua Jihova hé i kala mu mu kuatesa uoma.

¹⁵ Akua mbèle ia Saúlo anga a mu ambela, exi: Talesa, tua mono kuma nzumbi iaiibha i tunda kua Nzambi iala ku ku tatesa kinéne.

¹⁶ Muadiʼami, tu tume kiá, tu mbele ié, tua ku imanena bhabha,, tu ku sotele muthu, mesene ia kuxika mbànza; phala ki kale jinge kuila kioso ki ku tula o nzumbi iaiibha i tunda kua Nzambi, muene u xika ni lukuaku luê, eie-phe u sembuluka.

¹⁷ Saúlo anga u zuela, uixi: Kiauabha. Ngi sotedienu-phe muthu uejiia kuxika kiambote, mu ngi bhekele-nê.

¹⁸ Dikuenze diê diamukuá anga u kumbulula, uixi: Eme-ze ngejiia muthu, monʼa Jese bhu Beleme, mesene muene ia kuxika, diiala dia nguzu, dikuenze dia ita, mujitu mu kuzuela, muthu ua kuuabha, o Jihova ue uala-nê.

¹⁹ Mukonda dia kiki Saúlo u tuma jiphunga kua Jese, uixi: Ngi tumikise monʼé Davidi, uala mu kuinga jimbudi.

²⁰ Jese anga u kuata bûlu iê u i longa, ni jimbolo, ni kisudi kia vinhu, ni monʼa hombo, anga u i tumikisa ni Davidi monʼê kua Saúlo.

²¹ Kienhiki Davidi anga uiza kua Saúlo, u mu imanena jinga bhu pholo iê; muene anga u mu zola kiavulu, u mu bhanga kibese kiê kia ku mu ambatela mata mê ma ita.

²² Saúlo anga u tuma kuambela Jese, uixi: Nga ku diondo, Davidi a xale kunu bhu pholo iami, kuma ua ngi uabhela muene.

²³ Anga aia ni kuila o nzumbi iaiibha ki i tunda kua Nzambi se i kuata Saúlo, Davidi u katula mbànza jê, u kala mu xika ni lukuaku luê. Saúlo anga u nhoha, u sembuluka, o nzumbi iaiibha i mu xia hanji.