I Samuuele 15 - O Mikanda Ikola

Saúlo a mu tuma kubuikisa Amaleke

¹ Samuuele anga u ambela Saúlo, uixi: Jihova ua ngi tumu ku ku unda ku ungana ua mundu uê Izalaiele; kiki-phe ívua dízui dia kizuelu kia Jihova.

² Eme Jihova dia ifuẋi, uambe kiki: Nga xinganeka o konda ia usuéia ua bhangele Amaleke kua Izalaiele, kioso Amaleke kia bhângele-nê mvunda mu ku mu fudisa o njila mua kexe ma kuendela kioso Izalaiele kia tundile mu Ijito.

³ Kiki-phe ndeie, ua kà bete Amaleke, nda ua kà buikise ioso iala na-iu, sé ngó ku a lendukila. Ua kà jibha ni mala ni ahatu, ni tuana tua ndenge, ni tuana tua uisu ku mele, ngombe ni mbudi, kamelu ni bûlu, ki ku subhuka kima.

⁴ Saúlo anga u kasa mundu, u a kuata konda bhu Telaíme, hâma jiiadi ja midi akua kuendela bhoxi, ni kuinhi dia midi ia akua Juda.

⁵ Saúlo kia bhiẋila bhua zukama ni mbanza ia Amaleke, u a tela athu phala ku a batamena mu honga.

⁶ Saúlo anga u ambela akua Kene, uixi: Ndokuenu, tundenu, mu muangane muʼaxaxi ka akua Amaleke, phala ki ngi mi buikisile-nâ kumoxi; kuma enu mua bhangele ujitu ku ana oso a Izalaiele, kia tundile ku Ijito. Kienhiki akua Kene anga a tunda muʼaxaxi ka akua Amaleke.

⁷ Saúlo anga u beta akua Amaleke ku mazu a xibhata tunde ku Havila katé mu kuia ku Xudi, kua zukama ku Ijito.

⁸ Anga u kuata Akake sobha ia akua Amaleke, u mu kuika ni muenhu; maji mundu uoso ua u buikisa ku mazu a xibhata.

⁹ Ni Saúlo-phe ni mundu anga a lendukila Akake, ni ku jimbudi joso ja beta kudisanza, ni ku jingombe, ni ku ibhaku iamukuá, ioso ia nete kiambote, ni ku tuana tua jimbudi, ima ioso ia uabha kiambote ka ẋikina ku í buikisa ioso. O ioso-phe iaiibha, ki i uabha kiambote ia tènde ene, iene ia zubha ni ku i buikisa ku mazu a xibhata.

Nzambi u tuma Samuuele kubazela Saúlu

¹⁰ Kia bhiti imʼiii, kizuelu kia Jihova anga kʼiza kua Samuuele, kiexi:

¹¹ Nga dielesa kiá o kuta Saúlu ku ungana, kuma muene ua ngi bhana dikunda, ua di tunu ku ngi kaiela eme, iú ua fulu ku kumbidila ioso i nga mu tumu. Samuuele anga ki mu iibhila kiavulu; hé u dikola kua Jihova usuku uoso uenhó.

¹² Ki kúkia ni kimene Samuuele u dimeneka mu kubatuila Saúlo. Samuuele anga a mu kunda, exi: Saúlo uejile bhu Kalumelo, ua iudika-bhu kitatamu kiê iu ua tembuka, ua bhiti, iu ua kulumbuka bhu Jidingale.

¹³ Samuuele anga u mu kaiela kunhoko hé u bhiẋila bhuala Saúlo, o Saúlo kia mu mono anga u mu ambela, uixi: Tana-ku, eie u muthu ua Jihova. Nga kumbidila kioso kia ngi tumu Jihova.

¹⁴ Samuuele-phe, uixi: O kudila kuku-phe, kuahi ku nga-lu kuívua kua jimbudi ni kua jingombe mu mátui mami?

¹⁵ Saúlo-phe, uixi: Eza na-ju ku akua Amaleke; kuma mundu a xi-ku ku jimbudi ni ku jingombe joso ja disanze kiambote, phala ku ji satela Jihova Nzambi ié; o jamukuá tua ji buidisa joso.

¹⁶ Samuuele anga u ambela Saúlo, uixi: Imana, ngi ku tangele kioso kia ngʼambela Jihova usuku iú ua lelu. Muene u mu ambela, uixi: Zuela-kiu.

¹⁷ Samuuele uixi: Sumbala eie ua tolele ku mesu mé eʼmuene, maji a ku zangeleka-ze mù kala u mutue ua miji ioso ia Izalaiele; Jihova iú ua ku undu kukala u sobha iâ?

¹⁸ Jihova-phe iú ua ku tumu njila iii, uixi: Ndeie, ua kà buikise akua ituxi ió abhukumuka akua Amaleke, ua kà lua-nâ katé a buila ene oso muene.

¹⁹ Kima kiahi-phe kia ku kambesa kutumaka o dízui dia Jihova, ki bhinga u suína ni kubhûnda imbamba, anga u bhanga kima kiaiibha ku mesu ma Jihova?

²⁰ Saúlo anga u ambela Sammuuele, uixi: Kiene muene-ze. Nga tumaka dízui dia Jihova, njila ia ngi tumu Jihova nga i ende. Akake sobha ia Amaleke ngʼeza-nê, akua Amaleke oso nga a buikisa muene.

²¹ Maji o mundu-phe ene a bhûndu, jimbudi ni jingombe joso ja disanze kiambote ku ibhaku ieji kubuika, phala ku ji satela Jihova Nzambi ié bhu Jidingale.

²² Samuuele-phe, uixi: Kifua ki uabhela kiavulu Jihova maujitu ma kuoha ni jisata, inga ki mu uabhela o kutumaka dízui dia Jihova? Mukonda, o kutumaka kota, kusatela ndenge, o kubelesela ue kota ki ku soko ni banha ia jimbudi.

²³ Kuma o kuxibhaka mukuâ ni kituxi kia uoloji; o kubhukumuka, mukuâ ni kudianguka ni iteka mba kubheza mahamba mʼonzo. Kaia kiki, mukonda eie ua ditunu kuíva o kizuelu kia Jihova, muene ue ua ditunu ku ku bhaka ku usobha phala ku kale dingi ku ungana.

²⁴ Saúlo anga u ambela Samuuele, uixi: Nga te kituxi; kuma nga tondala kia ngi tumu Jihova, ni kizuelu kié-eie; mukonda nga kexe ni uoma ua mundu, eme ngevu dízui diâ.

²⁵ O kiki-phe, nga ku diondo, ngi loloke kituxi ki nga te, u vutuke nʼeme, nda u ngi bheke, ngi bheze Jihova.

²⁶ Samuuele anga u ambela Saúlo, uixi: Eme ki ngi ku bheka; mukonda eie ua ditunu kizuelu kia Jihova, Jihova ue iu ua ku ditunu, ka mesena ku ku bhaka dingi ku ungana ni u kale u sobha ia Izalaiele.

²⁷ O Samuuele-phe kia lunguluka iu ua bhana dikunda kua Saúlo phala kuiʼê, Saúlo u mu naminina mu pondo ia divunga diê, anga di tanduka.

²⁸ Kienhoko Samuuele anga u mu ambela, uixi: Jihova ua ku tandula lelu ungana ua Izalaiele, iu ua u bhana mukuenu uengi ua ku tundu mu kuiuka.

²⁹ O Kutende ió ua di bhana muene fuma ia Izalaiele, ka ẋikina kuta makutu mba kudiela; mukonda muene ki muthu kuila u diela.

³⁰ Muene bhenhobho uixi: Nga te kituxi; kiki-phe ngi bhange kia ngó ujitu, nga ku diondo, bhu pholo ia adiakimi a mundu, ni bhu pholo ia Izalaiele, nda uize u ngi bheke, phala ngi bheze Jihova Nzambi ié.

³¹ Kienhiki Samuuele hé u vutuka dingi, uia mu bheka Saúlo; Saúlo u bheza Jihova.

Samuuele u jibha Akake

³² Samuuele anga u zuela, uixi: Ngi bhekedienu bhabha, Akake, sobha ia akua Amaleke. Akake anga uiza ni kudikenha. Kuma Akake, uixi: Kidi muene kulula kua kalunga kua ngi somboka kiá.

³³ Samuuele-phe, uixi: Kuma o xibhata ié ia bhangesa ahatu kukamba anʼâ, kiene ue kimoxi mamʼenu ua-ndu kamba ana muʼaxaxi ka akuâ. Samuuele anga u sesa Akake, u mu bhanga ku idiandu-idiandu, bhu pholo ia Jihova bhu Jidingale.

³⁴ Kia zubha kubhita imʼiii, Samuuele anga uia ku Lama; o Saúlo anga uia ku bhata diê bhu Ngibeia ia Saúlo.

³⁵ Tundé kiá bhu Kizuua kienhókio, plofeta Samuuele ka tona dingi kuiza mu kudimona ni Saúlo katé bhu kizuua kiê kia kúfua. Samuuele-phe anga u kala mu dila Saúlo, kuma o kia Saúlo kia mu bhekela jinga henda. O Jihova ue u diela mu ku ta Saúlo ku ungana ua Izalaiele.