I Samuuele 14 - O Mikanda Ikola

Jonata u kaia akua Fidíxia

¹ Anga bhu kala kizuua, Jonata monʼa Saúlo u ambela kibese kiê ua mu mu ambatela o ibhakatu iê ia ita, uixi: Ndoko, tu zaúke ku sámbua bhuala poxto ia akua Fidíxia. Tatʼâ-phe ka mu lekela.

² Saúlo-phe ua tula ku hota ia Ngibeia, mu kilembeketa kia mulomela uala bhu Mingolone, ni mundu uala-mê kumoxi, hâma jisamanu ja mala.

³ Ni Ahija monʼa Ahitube, phangʼia Ikabode, monʼa Finehase, monʼa Eli, nganga ia Jihova bhu Silo, iú bhobho, ua zuata efodi. Mundu-phe ka kʼijiia kuila Jonata ua tundu-bhu.

⁴ O bhu jiphaka-phe bhua-lu bhitila Jonata mu sota kuzaúka ku sámbua bhualela o poxto ia akua Fidíxia, bhu kala ndanji ialebha kipena mbandu ni mbandu. Iii dijina diê ndânji ia Bozeze, iii dijina diê ndánji ia Sene.

⁵ Ndánji imoxi iemanena ku mbandu ia norte bhua lulama ni Mikimaxi, ndánji iamukuá iemanena ku mbandu ia sulu bhua lulama ni Ngibeia.

⁶ Jonata anga u ambela kibese kiê kia mu mu ambatela o ibhakatu ia ita, uixi: Ndoko, tuie ku sámbua bhu poxto ia akua mabôlo enhá, amoxi Jihova u kalakala mu ku tu kudila; kuma Jihova ki bhuala ki mu fudisa kubhulula mundu uê ni athu avulu mba kubhulula mundu uê ni athu atolo.

⁷ Kibese kiê anga u mu ambela, uixi: Bhanga kioso kia ku kala ku muẋma; kabasa eie-muène u tuamena, eme-phe ngi ku banda ngó kala kia solo o muẋma ué eʼmuene.

⁸ Jónata-phe anga u mu ambela, uixi: Talesa, tu zauke ku sambua, tu di tukulule ku mala enhó.

⁹ Ene kia kèla: Imanenu bhobho tu mi sange; etu-phe tu imana bhu kididi kietu, ki tu bande bhuoso bhuala ene.

¹⁰ Kia kèla-phe: Bhiẋilenu kunu; etu-phe tu a bhiẋila muene, kuma Jihova ua tu bhakuila-nâ bhu makuʼetu. Kienhiki kiene ki tu kala o kijimbuete.

¹¹ Ene kiiadi kiâ anga a di tukuluila bhu poxto ia akua Fidíxia: akua Fidixia anga a zuela, exi: Talenu Jihebeleu ala kufomoka kiá mu makungu muoso mua kolokele.

¹² Mala ala bhu poxto anga a kumuna Jonata ni kibese kiê, exi: Bhiẋilenu kunu, tu mi longe disa diambote, Jonata anga u ambela kibese kiê, uixi: Tu bande; ngi kaiele ku kunda diami, kuma Jihova ua a thelekala bhu maku ma Izalaiele.

¹³ Jónata anga u sambela ni kuavula ku maku ni inama, o kibese kiê ua mu mu kaiela. Jifilisteu anga aia ni ku dibhala bhu pholo ia Jónata, o kibese kiê anga uiza ni ku a jibhila ku dima diê.

¹⁴ O kibetu kiki mu kumateka-kê, makuinhi aiadi a muthu a a jibha kiá kuala Jonata ni kibese kiê, mu kadikanga ka kuila mavu a dima junda ia jingombe mu kizuua kimoxi, a suka ngó mu kaẋi.

¹⁵ Anga bhu kala kuteketa bhu kibangu kia akua Fidíxia, ni mu mukau, ni ku mundu uoso; akua poxto, ni akua kubhûnda, a teketa uâ; ni mavu a zamba mukonda kuteketa kuavulu kiki kua tundu kua Nzambi.

¹⁶ Makuenze a Saúlu-phe ala ku ilangidilu mu Ngibeia ia Bejamí, a tala, hé a mona kifuxi kia jifilisteu kiala kuia ni ku di muanga, a botomoka, iá ela kuku, iá ela kuku, ni kuingajaka.

¹⁷ Saúlu anga u zuelela o mundu ualanau u a tangela, uixi: Kuatenu o konda tu tale uoso ua tundu-bhu. Kia zubha kukuata o konda, Jónata ni kibese kiê ene a kambe-bhu.

¹⁸ Saúlu anga u ambela Ahija, uixi: Bheka kunu o álaka í ia Nzambi. Kuma thembu ioio álaka ia Nzambi iala bhuʼamoxi ni anʼa Izalaiele.

¹⁹ Anga ki bhita kuila, kioso kiala kuzuela Saúlo ni nganga, kibulukutu bhu kibangu kia akua Fidíxia, kiala kuia ni ku di bandekeza. Saúlo anga u ambela nganga, uixi: Eie tunda-ku! Mukonda ki mua bhingi ngoho kuiza ni álaka.

²⁰ Ni Saúlu-phe, ni mundu uoso aia-nê, a bhongoloka hé eza ue ku ita, Anga a sanga ene oso ala ku di jibha-jibha kiá mu diâ, hé bhu bhita kibuika kia dikota ku jifilisteu.

²¹ Kienhokio-phe ni Jihebeleu ue mʼokulu a zuamene ku akua Fidíxia, ia bhongolokele-nâ kumoxi bhu kibangu, ene kia tundu ku matutu, enhá ue a kituka ia a di te mù banda akua Izalaiele, ala kumoxi ni Saúlu ni Jónata.

²² Kiene kimoxi ue ni akua Izalaiele oso a suamene mu milundu ia Ifalaíme, ki evu kuila akua Fidíxia a lenge, ene uâ a di te-mu ni ku kaia kiá akua Fidíxia ku ita.

²³ Kienhiki Jihova ua bhulula Izalaiele mu kizuua kienʼokio, ita anga i somboka bhu Betavene.

Kuloka kua Saúlo kua kubhanga lusolo

²⁴ Mala ma akua Izalaiele anga a tata kizuua kienʼokio; a iokojoka ni kihongo kia nzala mukonda Saúlo o mundu ua u tendelela ni kuloka, uixi: A mu bhubhidile uoso u dia dikoka lelu, tunde kiki katé mu ngoloxi, phala ngi diange hanji kutata phonzo ku jinguma jami. Kienhiki ku athu oso, kana muthu ua tena ku lola kúdia.

²⁵ Mundu uoso uenhó anga a bhita mu ditutu diala ni uiki bhoxi.

²⁶ Mundu kia bokona mu ditutu, a sanga uiki iu zunzumukú, maji kana muthu-phe ua te lukuaku ku dikanu, kuma mundu ala ni uoma ua kubula o muloko ua Saúlo.

²⁷ Jonata-phe ka kʼivu, kioso tatʼâ kia tendelela o mundu ni muloko; kienhiki mbangala iê ia kuata bhu maku, u i bonda o pondo mu uiki, anga u ta lukuaku ku dikanu; mu mesu anga mu mu zela.

²⁸ Muthu ku mundu anga u mu kumuna, uixi: Tatʼenu ua tendelela o mundu uoso ni kuloka, uixi: A mu bhubhidile uoso udia dikoka lelu. Mundu-phe a bhuila kiá ni nzala.

²⁹ Jonata-phe uixi: Tatʼetu ua tatesa oxi: talesenu eme mu mesu mua ngi zele, mukonda eme nga lola-ku ngó o tuuikiʼutu.

³⁰ Kuambe dingi se o mundu a dile kiambote ku kúdia kua bhûndu ku jinguma jâ; akua Fidíxia hinu tua a bûba kiengi.

³¹ Anga a beta akua Fidíxia mu kizuua kienʼokio tunde bhu Mikimaxi katé ku Aihalone. Mundu anga a bhuila muene kiavulu, a iokojoka.

³² Anga a di lunduluila mu kubhunda ibhaku ku jinguma ni kuhama, a kuata jimbudi ni jingombe, ni anʼa jingombe, a ji jibhila bhoxi; o mundu anga a kuata kudia xitu ni manhinga.

³³ Anga a ki ambela Saúlo, exi: Mundu-ze ala kuta kituxi kua Jihova, mu kúdia kumoxi o xitu ni manhinga. Muene uixi: Mua bhange ufe; kundumunenu ditadi dia dikota, dʼize bhabha bhu ngala mu kizuua kia lelu.

³⁴ Saúlo anga u a ambela, uixi: Muanganenenu muʼaxaxi ka mundu, mu a ambele, kuila kala muthu a bheke kunu o ngombe iê ni mbudi iê, mu i jibhile bhabha ku ditadi didi, nda mu die kiua; kana kuta kituxi kua Jihova mu kudia xitu kumoxi ni manhinga. Mundu uoso anga a bheka kala muthu o ngombe iê, usuku uenhó, anga a i jibhila bhobho.

³⁵ Saúlo anga u tunga kalatódio ka Jihova bhenhobho; kene kalatódio ka dianga muene kutungila Jihova.

Jonata ambe ku mu jibha, mundu a mu tambula

³⁶ Saúlo anga u a ambela o mundu, uixi: Tu kulumukienu mu kaiela akua Fidíxia ni usuku, tu a bhûnde katé kuáki, ki tu xie-ku muthu. Exi: Eʼmuene kiá uala-mu; bhanga kioso kia ku uabhela. Kuala nganga-phe: Tu zukame hanji bhabha kua Nzambi.

³⁷ Saúlo anga u ibhula kua Nzambi, uixi: Ngi kulumuka mu kaiela akua Fidíxia-â? U a telekala lelu bhu maku mami? Muene-phe ka mu vutuila kuala Jihova kizuua kienʼokio.

³⁸ Saúlo anga u zuela, uixi: Bhiẋilenu bhabha enu oso mu makota a mundu, tu te hasa mu tungula uoso lelu ua te kituxi.

³⁹ Saúlo anga u loka, uixi: Kalé-ku Jihova ku muenhu, mukua kubhulula Izalaiele, némbé ki kala monʼami Jónata muene uate kituxi, ufua kidi muene. Ku mundu uoso-phe kana-ku muthu ua mu vutuila.

⁴⁰ Muene anga u ambela Izalaiela ioso, uixi: Kalenu ku mbanduʼoko, eme ni monʼami Jonata tu kaie ku mbandu kunu. Mundu anga ambela Saúlo, exi: Eʼmuene kiá uejiia, bhanga kioso kia ku uabhela.

⁴¹ Saúlo anga uila kua Jihova, uixi: Tu tetuluile Kiambote, eie Nzambi ia Izalaiele. O hasa anga i kuata Saúlo ni Jonata, mundu a tundu-mu.

⁴² Saúlo anga uila, uixi: Tenu dingi hasa bhu kaẋi ka eme ni monʼami Jonata. Anga hasa i kuata Jonata.

⁴³ Saúlo bhenhobho anga u ambela Jonata, uixi: Ngi tangele kioso ki ua bhange. Jonata anga u mu tangela, uixi: Nga lola ngó tuuiki ni pondo ia mbangala i nga kuatele bhu maku, kiki kua bhingi ngi fua? Kuabhu! Emʼiú!

⁴⁴ Saúlo anga u zuela, uixi: Nzambi a ngi bhange-kiu, a ngi tele-kiu dingi, se ki kamba ku kubhita; u fua muene, Jonata!

⁴⁵ Mundu anga ambela Saúlo, exi: Kifua Jonata ufua, muthu ua kalakala lelu o kikoue kiosoʼiki mu Izalaiele? Lu ku suke, Saúlo! Mundu anga a loka ue, exi: Kale-ku Jihova ku muenhu, ni lundemba luê ngó lumoxi ku mútue ki lu sonoka bhoxi; kuma muene ua kalakala ni Nzambi kizuua kia lelu. Kienhiki mundu a tambula Jonata bhu maku a Saúlo, a fudisa phala ka fue.

⁴⁶ Saúlo anga u vutuka mu kaiela akua Fidíxia; aku Fidíxia anga a bhiẋila ko kuâ.

Saúlo u tolola jinguma ja Izalaiele mu jimbandu joso

⁴⁷ Kienhiki Saúlo kia zubha kutambula ungana ua Izalaiele, u lua ni jinguma jê ku mbandu joso. U lua ni Mouabhe, u lua ni anʼa Amone, u lua ni Edomo, u lua ni jisobha ja Zoba, u lua ni akua Fidíxia; kuoso-phe kua lungu ni ita jinguma jê u ji kaia.

⁴⁸ Anga u bhanga uzonda, u beta akua Amaleke, u kudila Izalaiele bhu maku ma oso a kexile ku a bhûnda.

O Dibhata dia Saúlo

⁴⁹ Anʼa Saúlo-phe a mala eneʼá: Jonata, ni Ixivi, ni Malekisuua; anʼâ aiadi a ahatu-phe o dikota Melabe, o ndenge Mikala.

⁵⁰ Mukajiʼa Saúlo dijina diê Ahinouamu monʼa Ahimaze. O Kabhitangu ka kifuẋi kiê, Abinele, monʼa Nele, sekulu a Saúlo.

⁵¹ Mukonda o Kiji tatʼâ Saúlo, ni Nele tatʼâ Abinele, kiiadi kiâ anʼa Abiiele.

⁵² Anga kukala ita iatema ni akua Fidíxia izuua ioso ia muenhu ua Saúlo. Saúlo anga u kala mu kuila uoso diiala dia nguzu a mu mono, uoso dizonda dia kubhânga, u mu bhongolola hé u kalanê kumoxi.