I Samuuele 13 - O Mikanda Ikola

Ita iamukuá ni akua Fidíxia

¹ Saulo-phe ki eza ku ungana, kia zubha kubhanga mivu iiadi ku ungana ua Izalaiele,

² Saúlo u nona midi jitatu ja mala mu Izalaiele, o ku midi jitatuʼiji, midi jiiadi ji kala ni Saúlo bhu Mikimaxi ni mu mulundu ua Betele, midi imoxi i kala ni Jonata bhu Ngibeia ia Bejamí; Mundu ua subhukaku ua mukuá hé u a muanganesa kala muthu ku balaka iê.

³ Jonata anga u beta kú mazu a xibhata o poxto ia akua Fidíxia bhu Jibeia; akua Fidíxia anga a kʼivua. Saúlo anga u xikisa koloneta mʼoxi ioso ia Izalaiele, uixi: Jihebeleu joso ni jʼivue.

⁴ Izalaiele ioso anga evua hundu kuma Saúlo ua beta ku mazu a xibhata o poxto ia akua Fidíxia, mukonda dia kiki Izalaiele-phe ala mu kizembu kia akua Fidíxia. Mundu uoso anga a bhongoloka kua Saúlo bhu Jidingale.

⁵ Akua Fidíxia ue anga a di bhongolola mu kúlua ni Izalaiele, makuinhi atatu a midi ia makalu ma ita, ni midi jisamanu ja akua kumondala jikabalu, o mundu uamuká ua iá endela bhoxi a soko ni kisèkele bhu ndúndu ia kalunga mu kuvula. Anga a banda, a ta kibangu kiâ bhu Mikimaxi; Betavene a i somboka anga aia ku pholo ku mbandu ia mu tundila dikumbi.

⁶ Mala ma akua Izalaiele-phe kia mono kuma ala bhu kíbhidi, mundu ua tate (mukonda a a bhondeleka kiá) mundu a kuata kusuama mu mabanda, mu mixitu, mu matadi, mu imbaka ia matala, ni mu makungu.

⁷ Jihebeleu jamukuá ja zaúka ku sámbua dia Njolodá kʼoxi ia Ngade ni Ngiliiade. Saúlo-phe hanji uala bhu Jidingale, mundu uoso anga u mu kaiela ni kuteketa mukonda dia uoma.

Saúlo u tondala, Samuuele u mu bazela

⁸ Saúlo anga u kinga mu sambuadi dia izuua, iene izuua ia mu xindi Samuuele; Samuuele-phe kʼeza bhu Jidingale; mundu-phe a kala mu kuenda ni ku mu muangana bhuofele-bhuofele.

⁹ Saúlo anga u amba, uixi: Bekenu sata ia kuoha ni sata ia paze. Anga u sata o sata ia kuoha.

¹⁰ Kioso-phe kia zubha kusata o sata ia kuoha, Samuuele ue iú u izʼú; Saúlo anga u tunda mu ku mu kauidila, ni ku mu menekena.

¹¹ Samuuele anga u zuela, uixi: Eie ua bhange kiebhi? Kuala Saúlo: Mukonda nga mono mundu ua mu ngi muangana, eie-phe ua kambe kuiza mu i izua i ua xindi, o akua Fidíxia-phe ki nga a mono a bhongolokela bhu Mikimaxi,

¹² ngixi-phe: Akua Fidíxia a-ndu ngi lundumukina bhabha bhu Jidingale, eme-phe Jihova kiluua ngi mu uabhessa o pholo, kiene kia ngi bhangesa o ku di bidikalela kubhakula o sata ia kuoha.

¹³ Samuuele anga u ambela Saúlo, uixi: Ua bhange uoua; ua kambe kubhaka o kijila kia Jihova Nzambi ié, kioso kia ku tumu; kuma Jihova hinu ueje kukolesa o utuminu ué mu Izalaiele ni u nangenena.

¹⁴ Kiki-phe o utuminu ué ki ua-nda kunanga. Jihova ua di sotela kiá muthu ua mu zelela ku muẋima uê, muene ua-nda ku mu tumbika kukala mutuameneni ua mundu uê, mukonda eie kua bhake kijila kia ku tumu.

¹⁵ Samuuele anga u balumuka, u tunda bhu Jidingale hé u banda ku Ngibeia ia Bejamí. Saúlo anga u kuata konda ia mundu ala kumoxi ni muene, hâma jisamanu ja mala.

¹⁶ Ni Saúlo-phe ni monʼê Jonata, ni mundu aia-nâ kumoxi a tula bhu Ngibeia ia Bejamí a ta kibango kiâ bhenhobho; akua Fidíxia-phe a te kibangu kiâ ue bhu Mikimaxi.

¹⁷ Akua kubhûnda anga a tunda bhu kibangu kia akua Fidíxia, a di uanununa mu ibuka itatu; kibuka kimoxi kʼila ia Ofala katé ku ixi ia Saúlo;

¹⁸ kibuka kiamukuá kʼila njila ia Beteholone; kibuka kiamukuá kʼila njila ia mbámbe, i iala mu honga ia Nzeboíme ku mikáu ia hatu.

¹⁹ Thembu ienhiʼii mʼoxi ioso ia Izalaiele ki muala muthu ukala musudi-athumba; kuma akua Fidíxia, exi: Tu fudisa Jihebeleu o kusula, phala mungu ka Sule mikuale ni jisosa.

²⁰ Mukonda dia kienhiki akua Izalaiele-phe anga a kala mu kulumuka ku akua Fidíxia, mu kuzuika ni kusudisa kala muthu o pá iê ni omvo iê, ni kisesu kiê ni ditemu diê.

²¹ Kienhókio iá a kexi ni ma-dima mâ ma kuzuikila matemu, ni jimvu, ni jiphandanda ja kuvotela ja mazu atatu, ni makuua, ni jisongo ja kutukila; o akuetu anʼa Izalaiele, imiʼii se ia xibhi, kikale aia kua ene.

²² Mukonda dia kiki, kia bhiẋila bhu kizuua kia ita, ku mundu uoso ua mu kuenda ni Saúlo ki bhuala ngó muthu ua kuata mukuale mba sosa, kikale Saúlo muene ngó ni Jonata dia monʼê ene ngó a i kuata.

²³ Kibuka kia akua Fidíxia anga a ta upoxto uâ bhu phaka ia Mikimaxi.