I Samuuele 12 - O Mikanda Ikola

Samuuele u tendelela mundu ua Izalaiele

¹ Samuuele anga u ambela Izalaiele ioso, uixi: Talesenu, kala ki mua di muena-kiu, eme nga mʼivu dízui dienu mu ima ioso i mua ngʼambela, mu ku mi bhana sobha ienu phala ku mi tumina.

² Kiki-phe talenu, sobha iú ua-nda ku mi kala ku pholo; eme-phe nga kuka kiá, ni jimvi kiá mu mútue; anʼami muala-nâ muʼaxaxi kenu; eme-phe ngendela bhu pholo ienu tunde mu undenge uami katé mu kizuua kia lelu.

³ Emʼiú: anuenu bhanenu umbangi bhu plo ia Jihova, ni bhu pholo ue ia muthu uê ua mu undu ni maji. Eme nanhi nga mu tambula ngombe iê? Nanhi nga mu tambula bûlu iê? Nanhi nga mu di mangonha? Nanhi nga mu zukutisa? O ku milonga nanhi nga mu tambula kitadi bhu maku mê, phala ku ngi xitisa na-kiu mu mesu? Ambenukiu, phala imʼii ngi mi fute-iu.

⁴ Ene a mu vutuila, exi: Kana, eie kua tu di mangonha oso-oso, kua tu zukutisa, kua tambula ue kitadi bhu maku a muthu.

⁵ Muene u a ambela, uixi: Jihova uala mbangi, ni muthu uê a mu undu ni maji ue uala mbangi, mu kizuua kia lelu, kuma enu ki mua ngi sange ni kima bhu maku mami, ki nga tambula ku muthu uoso-uoso. Ene exi: Nzambi Muene mbamgi, kidi muene.

⁶ Samuuele anga u ambela o mundu, uixi: Kiene-phe muene, Jihova a kale mbangi kuma muene ua sola Mozé ni Alá, iu ua katula o jitata jetu mʼoxi ia Ijito, iu ua a bheka kunu.

⁷ Kiki-phe imanenu, ngi funde ni enu bhu pholo ia Jihova, ku thandu dia ikalakalu iaiuka ia Jihova, ioso ia mi bhange enu, ni ioso ia bhanga ku jitata jenu.

⁸ Jakobo kioso kia kulumuka mu Ijito, akua Ijito a mu bhondeleka; jitata jenu anga ji dikola kua Jihova, Jihova kienʼokio u tuma Mozé ni Alá, hé a katula jitata jenu mu Ijito, anga a a bheka kutunga mʼoxi mumu.

⁹ Ene-phe anga a jimba Jihova, Nzambi iâ; muene anga u a sumbisa bhu maku ma Xixela kabhitangu ka kifuẋi kia Hazole, ni bhu maku ma akua Fidíxia, ni bhu maku ma sobha ia Mouabhe; hé a kala mu ku a lua ita.

¹⁰ Ene anga a dikola kua Jihova, exi: Tua te kituxi, mukonda Jihova tua mu baluka, etu tua bhikila Jibaale ni Axitalote; kala kiki-phe tu kudile bhu maku ma jinguma jetu, ni tu ku bhikile kiá eie.

¹¹ Kienhokio-phe Jihova anga u tumikisa Jelubaale, ni Bedani, ni Jefeta, ni Samuele, hé u mi kudila bhu maku ma jinguma jenu ku mbandu joso; anga mu tunga bhua kondama.

¹² Maji o ki mua mono-phe Nahaxi, sobha ia anʼa Amone, ueza ku mi lua, enu mueza ko-kuami, muixi: Kana, kikale tu kala kiá ni sobha iia ni ku tu tumina; sumbala Jihova muene sobha ienu.

¹³ Kiki-phe talenu sobha ienu mua mu solo iú, muene mua mu bhingi; o Jihova ue muene ua tumbika o sobha i kala mu ku mi tumina.

¹⁴ Se mu kala ni uoma ua Jihova, se mu mu bhikila muene, se mu mu ívua dízui diê, se mu kamba kuxibhaka o kijila kia Jihova Nzambi ienu, kixi enu kixi o sobha uala ku mi tumina, kiauabha! Mu disanza mu di hiha bhu pholo ia Jihova Nzambi ienu.

¹⁵ Maji phe se mu kamba kuíva o dizui dia Jihova, anga mu xibhaka kijila kia Jihova, lukuaku-phe lua Jihova mu kala mù bhanga-na-lu, kala kia bhitile ni jitata jenu.

¹⁶ Kiki-phe imanenu, mu mone madiuanu ma-nda kubhanga Jihova ku mesu menu. Bhu kumbiʼabha manhi ki kixibhu, thembu ia kubhongolola tiliku?

¹⁷ Ngi dikola-phe kua Jihova phala a tumikise o inuminu ni mvula; phala mu kʼijiie nda mu mone kuma kubhukumuka kuenu kua vulu ku mua bhange mu mesu ma Jihova, mu ku mu bhinga sobha phala enu.

¹⁸ Bhenhobho Samuuele anga u dikola kua Jihova; Jihova anga u tumikisa inuminu ni mvula kizuua kienʼokio. Mundu uoso anga a kala kiavulu ni uoma ua Jihova, ni uoma ua Samuuele.

¹⁹ Mundu uoso anga ambela Samuuele, exi: Tu sambele, tu abhikʼé, kua Jihova, Nzambi ié, phala tu kambe kúfua; mukonda ku ituxi ietu ioso tua bandekeza-ku dingi kiki, kia kubhinga sobha.

²⁰ Samuuele-phe u ambela o mundu, uixi: Ki mu kale ni uoma. Mua bhange kiá kiaiibha, kidi muene; kana-phe dingi kuabhuka mu kukaiela Jihova, bhikilenu kiá Jihova ni muẋima uenu uoso.

²¹ Kana kuabhuka mu kukaiela mahamba, mukonda se mu ki bhanga muandu kaiela ima ia ngoho, ki i tena kubhandulula, ki i tena kukudila muthu, kuma ima ia kingoho.

²² Mbata Jihova ka ẋikina ku ambudisa mundu uê, mukonda dia dijina diê dikola, mukonda Jihova kia mu uabhela o ku mi bhanga mu mundu uê-muene.

²³ Eme bhabha ue, ki ngi tena kukala ngi muthu uengi, ni ngi te kituxi kua Jihova mu kuzumbuka ku mi sambela. Eme ngenda jinga muene ni ku mi longa mu njila iauabha, ia kuiuka.

²⁴ Kima kimoxi ngó: kolokotenu kukala ni uoma ua Jihova, mu mu bhikile mu kidi ni muẋima uenu uoso; endenu ni kuxinganeka jinga o ima ia makota ia mi bhange muene.

²⁵ Se mu jijila-phe kubhanga ima ia kubhukumuka, mua kà buika, ni enʼuenu ni sobha ienu.