I Samuuele 10 - O Mikanda Ikola

Samuuele unda Saúlo mu kala muenexi ua Izalaiele

¹ Bheneʼobho Samuuele anga u sunga thenda ia maji, u ma lunduluila ku mútue ua Saúlo, u mu bhana nzóbole, uixi: Nga ki bhangela mukonda Jihova ua ku undu mu kukala u muenexi mu undundu ué.

² Ki ua-nda ku ngi xia bhabha lelu, ua ka takana ni malʼaiadi bhu mbila ia Lakele, bhu mbámbe ia Bejamí bhu Zeliza; ene a kà ku ambela, kuma: Jibûlu ji uele mu sota, a ji bongo kiá; tatʼenu ua zumbuka kiá muẋima uê kukatela jibûlu, uala kiá ni hele ié eie, uixi:

³ Monʼami olʼiii a mu bhange kiebhi? Mu Kutunda bhobho, mu kuia dingi ku pholo, ua kà tula bhu mulemba ua Tabola, bhenhobho ua kà takanena-bhu ni malʼatatu ala mu banda kua Nzambi bhu Betele, iú u ambata tuana tutatu tua jihombo, iú u ambata makende matatu ma jimbolo, iú u ambata kisudi kia vinhu.

⁴ A kà ku menekena, hé a kà ku bhana makende maiadi ma jimbolo; eie-phe ua kà ji tambula bhu maku mâ.

⁵ Kutunda bhobho ua kà bhita kalundu ka Nzambi, bhuala o kibangu kia akua Fidíxia; kia kà bhita-phe kuila, mu kutula bhu bhata bhobho, ua ka takana ni kibuka kia jipolofeta, ala mu tunda ku thala ni kuxika kakoxi, ni ngoma, ni mbéndu, ni mbanza, a kà kala mu zuela ni uanji ua upolofeta.

⁶ Bheneʼobho-phe Nzumbi ia Jihova ua kà tula ni nguzu ku thandu dié, eie ua kà zuela ue ni uanji ua upolofeta, ua kà biluka kiá u muthu uengi.

⁷ Ki ua kà mona-phe kuma ijimbuete iii ia ku bhiti, bhanga kiá kioso ki ua mono kia tokala; kuma Nzambi u kala bhu mbandu ié.

⁸ Ua kà ngi tuamenena mu kulumuka ku Jidingale; nga kà ku sanga kuenhoko, mu bhana jisata ja kuoha ni jisata ja kutululuka; eie ua kà kinga sambuadi dia izuua, katé ki ngi ku sanga, ngi ku tangele kioso ki u bhanga.

Saúlo mu ʼaxaxe ka Misesedi

⁹ Anga ki bhita kuila, muene kia lunguluka dikunda mu kutunda bhuala Samuuele, Nzambi ua mu bhana muẋima uengi. O ijimbuete ioso iii anga i bhita muene kizuua kienʼokio.

¹⁰ O kia bhixila bhu kalundu, kibuka kia jipolofeta kiki, anga u takana na-kiu; Nzumbi ia Nzambi anga uiza ni nguzu ku thandu diê, muene hé u kala mu zuela ni uanji ua upolofeta muʼaxaxi kâ.

¹¹ Bhenhobho athu a mu ijiia mʼokulu kia mu mono, kuma iú zuela ni uanji kumoxi ni jipolofeta, mundu a di ambela mudiâ, exi: Monʼa Kiji, ihi kia mu bhiti? Saúlo manhi ua di bundu ue kumoxi mu jipolofeta?

¹² Mukua-bhata uamukuá anga u kumbulula, uixi: O tatʼâ-phe mukuahi? Kienhiki kia xalela mu Sabhu, exi: Manhi Saúlo ua di bundu ue mu jipolofeta?

¹³ O Saúlo kia zubha kuzuela ni unanji ua upolofeta, u bhixila kiua ku thala.

¹⁴ Sekulu a Saúlo anga u mu ibhula, ni mukua-mbele iê, uixi: Muele kuebhi? Muene uixi: Mu sota jibûlu; o ki tua lémbua ku ji mona, tua bhixila kua Samuuele.

¹⁵ Sekuluʼê anga u mu ambela, uixi: Ngi tangele-phe hanji, nga ku diondo, mba Samuuele ua mi zuelesa kiebhi?

¹⁶ Saúlo anga u ambela sekuluʼê, uixi: Ua tu tangela muene kidi kuma jibûlu a ji bongo kiá. Maka mamukuá-phe ma ungana, ma mu kundu Samuuele, muene ka mu jimbuila-nâ.

Saúlo a mu tungula kuala o mundu phala kukala sobha iâ

¹⁷ Samuuele anga u bhongolola mundu uoso kua Jihova, bhu Mixipa;

¹⁸ angu u ambela anʼa Izalaiele, uixi: Eme Jihova, Nzambi ia Izalaiele, uambe, kiki: Nga katula Izalaiele mu Ijitu, nga mi kudila bhu maku ma akua Ijito, ni bhu maku ma maungana moso mamukuá ma kexe ku, mi bhikisa,

¹⁹ Enu-phe kizuua kia lelu mua ditunu Nzambi ienu uene ku mi kudila mu mavuua menu moso ni mu malamba menu; mua mu ambela, muixi: Kana, tu bhane sobha i tu tumina. Kiki-phe di tienu ku minono bhu pholo ia Jihova, mu di tungule kala kioso ki mua di kaiejela mu miji ienu ni mu jimidi jenu.

²⁰ O Samuuele anga u zukamesa miiji ioso ia Izalaiele, anga a kuata-bhu o muiji ua Bejamí.

²¹ Anga u zukamesa muiji ua Bejamí mu jifamília jê, anga a kuata-bhu Saúlo monʼa Kiji; o kia mu soto-phe, ka moneka.

²² Kienhiki ebhula dingi kua Jihova, exi: Muthu iú manhi kiluua eza bhabha? Jihova anga u vutula, uixi: Muene ió, ua suama mu imbamba ieza na-iu athu.

²³ Anga a lenga, a mu takana momo, o kiemana mu axaxi ka mundu, ku kitala ene oso a mu suku ngó mu isuxi,

²⁴ Samuuele anga u ambela mundu uoso, uixi: Mu tadienu, mueneʼó a mu solo kuala Jihova. Mu mundu uoso ki muala muthu uedi kala muene. Mundu uoso anga a dikola, exi: Muenexi a kole muenhu!

²⁵ Samuuele anga u ambela mundu kioso kia tokala kuenda o utuminu ua sobha, anga u ki soneka mu divulu, hé a di lunda bhu pholo ia Jihova. Samuuele anga u muanganesa mundu, kala muthu ku bhata diê, kala muthu ku bhata diê.

²⁶ Saúlo ue anga uia ku bhata diê bhu Ngibeia; anga ku mu kaiela kibuka kia mala, Nzambi ua a babata mu miẋima iâ.

²⁷ Bhu kala-phe ue ni anʼa Kadiaphemba, exi: Iú ue muthu uahi? Manhi utena ku bhulula? Anga a mu tènda, a fula ku mu bhekela maujitu. Muene-phe ua di xibhʼê kala ka kʼivu.