I Phetele 5 - O Mikanda Ikola

Kutendelela o adiakime, ni minzangala. O kubatâma, ni ku di langa

¹ Kiki-phe adikime mudienu nga a longesa, ngi muadikime ua Ngeleja ni mukuâ. Kuma ngi mbangi ia jiphaxi ja Kristu, ngi muthu nga tokala ue mu fuma ia kà tukuluka.

² Kuila ingenu o kilunga kia Nzambi ku mualʼoko, ni ku ki tambula konda, kana ni usudi, maji ni vondadi ioso, kioso kia mesena Nzambi. Ki mu ki bhangela nganhu iaxidi, maji mu ki bhangela o muẋima ua mi tumu ku di bheka mu kusedivila.

³ Ki mu kale mu jingana ja kutumina ió ene a mi bhana-nâ ku a enga, maji mu kala mù atuameneni mua bhana phangu ku kilunga.

⁴ Kioso o Mubhidi ua Dikota-phe kia kà tukuluka, mu tambule kitundu ki kia kà lela dingi.

⁵ Enu mu minzangala ue kiene, beleselenu adiakime. Katé ni enʼuenu oso di kutienu o kubatama kua ku di bhikila mudienu, kuma o Mikanda ia Ngana, iambe iexi: Nzambi u bhânga ni akua izala, u bhana-phe ujitu oso a batâma.

⁶ Uila kiki, batâmenu bhoxi dia lukuaku lua Nzambi lua suina, muène a mi zangeleke bhu kitangana kiatokala.

⁷ Héle ienu ioso xilenu-iu Nzambi, kuma muène ua mi kuatela muanu.

⁸ Kalenu ku mesu azele, mu di lange! Kuma o nguma, Diabhu, ua di bhange, mukuâ ni hoji iala mu zuma, u nhunga jinga mu jimbamndu jenu mu kusota uoso a mu dia.

⁹ Kolokotenu-phe mu kuxikana, mbé mu tene kubhânga ni Diabhu, kuma mua kʼijiia kuila jiphaxʼojo jene jimoxi ni jala kubhita-naju o jiphange jenu ja xikana, jala mu ngongo.

¹⁰ O Nzambi-phe ia kiadi kioso, ua mʼixana mua Kristu ku fuma iê ia kalelà-ku, ki mua kà zubha kathangana ka kutala hadi, muène-muene u mi tenesa, u mi kuatesa, u mi suinisa.

¹¹ O kutumina ku kale kua muène katé ku hádia ni hádia! Amén.

Kulekela

¹² Nga mi sonekena kamukanda kofediʼaka kua Sila, phangeʼietu ia fiiele, kala ki nga mu mono eme. Tumaka ki tua vulu, mukonda ngandala ku mi longesa, ni ku mi bhana umbangi kuma o kiadʼiki kiene kia kidi kia Nzambi, kolokotenunu muenhumu.

¹³ O Ngeleja kunu ku Babilonha, iòsole ue kua Nzambi kumoxi ni enʼuenu, ia mi menekena. Ni monʼami Marku ua mi menekena.

¹⁴ Di menekenienu mudienu ni beju ia henda. O kutululuka kukale ni enu oso muala mua Kristu.