I Phetele 4 - O Mikanda Ikola

O ku di abhula mu akua ituxi Kukumbidila uthu ua Kristu

¹ Ki tualʼiki-phe kuma Kristu mu xitu ua tale hadi, enu uenu kuatenu kilunji kimoxi ni kia muène, mu kutala hadi uila kia i tale muène. Kuma ió uoso ua tale hadi mu xitu, ua zumbuka kiá ku ituxi.

² Kala kiki, o thembu ienu ia mi xala-ku mu xitu, ki mu ende dingi mu jihânji jaiibha ja athu, maji kiá mu vondadi ia Nzambi.

³ Kuma o thembu ia bhiti-ku ia soko kiá ia kubhanga ioso ia uabhela kubhanga o matumbu, kejiia Nzambi. Mukonda mu thembuʼomo enu uenu mua kexi mu kuenda mu jiphànda, ni mu jihânji ja xitu, ni mu uhôlua, ni mu ufusa, ni mu jifesa ja kukodiua, ni mu isunji iaiibha ia kubheza o iteka.

⁴ O kiki-phe akua mundu a mi diuana, hé a kala mu ku mi tobhesa ni ku mi lebhula, kioso enu ki mu kamba kudibunda-nâ mu muenhu uâ ua ufusa ni kudianguka.

⁵ A kà ki bhela konda-phe kua ió uala polondo ia kufundisa athu a muenhu ni madifundu.

⁶ Mukonda kiene kia bhekela ue kuboka o Njimbu Iambote kua iá a fua kiá, phala ió ue oso a a fundisa kiá ku muenhu uâ kiala hanji mu ngongo mumu, mukuâ ni kiene kufundisa athu oso. O Njimbuʼiii ia a a tangela-iu ua ene, phala ku muenhu uâ mu nzumbi a kale mu laia kala kia mu laia Nzambi.

⁷ Disukilu-phe dia ima ioso dia zukama. Kuatenu-phe kilunji, mu kale ku mesu azele, mu kale mù samba.

⁸ Mu ima ioso kotʼèlele o henda ienu mudienu i fulujuke, kuma henda i sueka nzungule ia ituxi.

⁹ Dʼidikizienu usonhi mudienu, kala muthu a tambulule mukuâ mu bhata diê sé kuditata.

¹⁰ Muthu uoso uhete uê ua tambula kua Nzambi a u kumbidile mudienu, kala mufuni ua mbote ua kiadi kia Nzambi kia vula o matelu phala mbote ue ia akuâ.

¹¹ Uoso u zuela, a zuele kala kia fuama o maka ma Nzambi. O uoso u sedivila, a sedivile ku nguzu ia mu bhana Nzambi. Mu bhanga jinga kienhiki phala Nzambi a fumane mu ima ioso kua Jezú Kristu uavu o fuma ni unéne mu mivu ni mivu sé dizubhilu! Amén.

Kulenda o jipolova

¹² Enu akuetu makambʼami a kazola, ki mu di uane o polova ia dikota ia-lù bhita muʼaxaxi kenu, ieza ku mi lola, ki mu ki fike kuma mua-lù bhita ni kisunji.

¹³ Inda kiosuʼiki-phe a mi bhana-ku mbandu ku jiphaxi ja Kristu, tanenu-ku, phale bhuoso bhua kà tukuluka o fuma iê, enu uenu mua kà tana ni ngalasa iavulu.

¹⁴ Kuma se a mi bhana malebhu mu kukaiela o dijina dia Kristu, mua zediua. Mukonda kia lombolola kuila o Nzumbi ia fuma, Nzumbi ia Nzambi, ua mi tula ku thandu.

¹⁵ Ki bhu kale muthu-phe mudienu u tala hadi mu kukala kijibhanganga, mba muii, mba muti a ituxi, mba kitoka mu imbamba ia akuâ.

¹⁶ Maji muthu-phe se u tala hadi mu kukala Kidistá, ka kale ni jisohi, inda a sakidile Nzambi mukonda ua tambula o dijina dia Kristu.

¹⁷ Kuma o tembu ieza kiá ia kufundisa, kua-nda kumatekena kua ió oso a tokala mu dibhata dia Nzambi. O kufundisa-phe se kua matekena ko kuetu, kua kà kala kiebhi mu kuzumbukila kua ió oso a xibhaka o Jingolokela Jambote ja Nzambi?

¹⁸ Kala kiambe o Mikanda Ikôla, iexi: O ku muiuki se kia bhonzo o kubhuluka, o ku muthu ua bhumu, ni mukua ituxi, kia kà kala kiebhi?

¹⁹ Uila kiki, oso a tala hadi mu vondadi ia Nzambi, o mienhu iâ ende ni ku i lundisa kua Bhanga dia Bhanga dia fiiele, mu ʻkubhanga jinga imbamba ia mbote, kuma Muène kene kufula mu kukumbidila o kizuelu kiê.