I Phetele 2 - O Mikanda Ikola

O ditadi dia muenhu, ni muiji ukôla

¹ Uila kiki-phe, ehenu o usueia uoso, ni makutu, ni mangonha, ni luma, ni kabódio, ka kulongolola athu.

² Muila kala mu anʼ auisu a mi vuala-ke, mu sema jinga o lete ia disanze ia nzumbi, phala ki mu i nua, mu kole muenhu, mu kule.

³ Mukonda kala kia tange o Mikanda Ikôla, enu Ngana mua mu lola, mua mu ivu kiá o kuuabha kuê.

⁴ Zenu-phe kua Ngana, o ditadi dia muenhu, diotende kidi ku athu, maji o kua Nzambi-phe diosole, dia ujitu.

⁵ Enu uenu kala mu matadi ma muenhu, ehelenu-phe Nzambi phala a mi Uzale mu kutunga o Tembulu ia nzumbi, ni ku mi bhanga kibuka kia jinganga jolumbile Nzambi, ji bhana o jisata ja nzumbi, ji uabhela Nzambi, mukonda dia Jezú Kristu.

⁶ Mukonda a ki soneka mu Mikanda Ikôla, exi: Talesa, eme nga solo ditadi dia te kiavulu, diene nga di xikika kindala mu Ziione mu kukala ditadi di kuatesa bhu thungi ia inzu. Uoso u mu xikana Muène, jisonhi ki ja kà mu kuata.

⁷ O ditadi didi dia te kiavulu, phala enu oso mua xikana. Maji phala ió a kambe kuxikana: Ditadi dia ditunu o jimesene kuila ki di uabha, dia biluka diene dia kuatesa bhu thungi.

⁸ O bhua mukuá Mikanda Ikôla, iexi: Didi diene o ditadi dianda kubhangesa athu kudibhukana, o ndànji ianda ku a bhangesa o kudibhala. Ene a di bhukana, mukonda o maka ka ma xikana, kienʼiki kia a xindile o vondadi ia Nzambi.

⁹ Maji enu-phe mu muiji uosole, mu jinganga ja sobha, kifuẋi kiazele, mu mundu uangene ua Nzambi muène. A mi tungula phala muende ni kujimbula o imbamba ia madiuanu iene mu bhanga Nzambi ió ua mi katula muavundu, iú ua mi bheka mu mukengeji uê u diuanesa.

¹⁰ Mʼokulu ki mua kexile mu mundu ua Nzambi, kiki-phe muala mu mundu uê. Mʼokulu o henda ia Nzambi ki mua ijidile luua, kiki-phe mua tambula o henda iê.

Uendelu ua athu a Kristu muʼaxaxi ka akua jixi. Ku di tuma ni jingana

¹¹ Enu akuetu, phange jami, nga mi diondo, mu asonhi, mu jingenji mua tundu mu ixi ienu enu muala ku jixi jengi, kulenga jinga jihânji ja xitu ji lua ita ni muenhu ua muthu.

¹² Kalenu ni uendelu uenu uafuama, muʼaxaxi ka akua jixi jengi a kambe kuijiia Nzambi phala kioso kia a mi âmba, exi mua mu bhanga kiaiibha, mu kumona dingi o ikalakalu ienu iambote, hinu a kala mu ximana Nzambi, mu kizuua kiê kia ku a zungila.

¹³ Mukonda dia Ngana, athu oso a a bhana kijîngu, a belesedienu: kixi muenexi, ua suku ku pholo;

¹⁴ mba jinguvulu, a ji tumu kuala muène mu kubhesa kaxtiku ati a ituxi, ni mu kusuinisa abhangi a mbote.

¹⁵ Kuma iene o vondadi ia Nzambi, kuila enu mu kubhanga kiambote mu belesa jisemenhi ji tanga o uoua.

¹⁶ Kia di kalela mu jifôlo, ufolo uenu ki u kale divunga dia kusueka usueia, maji mu kala-phe mu abhika angene a Nzambi.

¹⁷ Mu xila athu oso. Di zodienu ni jiphange jenu mu kuxikana. Mu kala ni uôma ua Nzambi. Mu kala ni ujitu ua muenexi.

O phangu ia jiphaxi ja Kristu

¹⁸ Enu abhika, beleselenu jingana jenu ni uôma uoso; kana ngó iá a kala athu a mbote, a tetuluka, maji katé ni iá a thathamana.

¹⁹ Kima kiauabha se muthu mukonda dia uôma ua Nzambi u bonga malebhu sé kukala ni kikuma, kabasa muijiia kuila kiene kiandala muène.

²⁰ A ki ximana kiebhi, se mua bhange kiaiibha, nʼa mi bhana jihuxi, anga mu xididika? O ki kala-phe mua bhange kiambote, anga mu tala hadi, anga mu xididika, kienhiki, Nzambi u mi bhela-kiu dibesá.

²¹ Mukonda enʼuenu Nzambi kiene kia mʼixanena. Mbata Kristu kiene kia tu talela hadi, iú ua tu xila o phangu, phala tu mu kaiele mu makanda.

²² Muène muthu ka tele kituxi, mu kanu diê ki mua monekene makutu.

²³ O kia mu xingile, ka vutuile ndaka. Kia mu kuamene, ka tele ndumu, maji mulonga uê-phe ua u ehela Nzambi muenhó mukua kufundisa kiaiuka.

²⁴ Kristu muène ku mukutu uêmuène, ua tu ambatela o ituxi ietu katé ku kimuẋi, phala etu tu jituke ku ituxi, tu kuate muenhu ua kuiuka. O italakanha iê iene ia mi sake.

²⁵ Kuma enu mua jimbidile kala mu jimbudi ja jimbila o njila. Maji kiki-phe a mi vutula dingi mu bhongolokela kukaiela o Mubidi, Muingi ua mienhu ienu.