I Phetele 1 - O Mikanda Ikola

Umenekenu

¹ Eme Phetele, Poxolo ia Jezú Kristu, nga sonekena asonhi a muanganena mu jixi ja Ponto, Ngalásia, Kapadósia, Ázia, ni Bitinia.

² Enu oso a mi sola kuala Nzambi Tata mu kuijiia kuê kua ima ia kèza-ku, a mi bhana o kuzela kua muẋima kua kalakala o Nzumbi iê, phala ku mi longa o kutumaka Jezú Kristu, ni ku mi sangela o manhinga mê. O kiadi ki di xale dingi kiavulu mudienu, kumoxi ni kutululuka kua Nzambi.

Kusakidila o kubhuluka

³ Tu sakidilienu jinga Nzambi, Tata ia Ngana ietu Jezú Kristu! Mukonda muène mu kulenduka kuê kuavula kinéne, ua tu bhana dingi muenhu uobhe, kia fukununa Jezú Kristu mu madifundu. Kienʼiki o miẋima ietu iezala ni kudielela kua kidi.

⁴ Uila kiki, tua kinga kutambula kua Nzambi o mabesá ma bhakela o mundu uê. Muanda kumona o undundu ki uene kubola, ki uene kuxila, ku uene kulela, ua mi xikamena ku diulu.

⁵ O mabesá enʼiâ phala enu oso mu kutena kua Nzambi, a mi lange mu kuxikana, ni mu kukinga o kubhulukʼ oko kua-ndù tukuluka mu kithangana kia kà suka-ku.

⁶ Mukonda dia kiki, mua fuama mu sanguluka, sumbala kiosuʼiki kua bhingi mu di kuata mukondo, mukonda dia malamba ma vudila-ku, u muala kubhita na-u.

⁷ Malamba iá mu bhita na-u, ihi o ku mi lola o kuxikana kuenu, kuala kota mù kuta, o ulu ndenge, kuma ulu u di bota, sumbala a u lola mu tubhia, phala kibhua o ku mi lola, muà sanga o diximanu, ni fuma, ni ujitu, bhuoso bhua kà tukulukila Jezú Kristu.

⁸ Sumbala Kristu muene kiluua mu mu mona, maji mua mu zola. Sumbala kiki ki mua mu mono, maji mua mu xikana. Kienʼ iki, enu mua sanguluka kiavulu ni ngalasa ki i ẋikina ku tanga, ngalasa iavulu o uuabhelu.

⁹ Enu-phe muala ni kusanguluka kuku, kuma mu kuẋikana kuenu mua tambula dilau diê, kuene o kubhuluka kua mienhu ienu.

¹⁰ O kubhuluka kuenhuku, o jipolofeta ja sotele jinga ku juijiia, ja tunguile jinga ni kutokuesa ni muanu kioso kia kexile mù zambula o kubhuluka ku muandù tambulʼ enu kua Nzambi.

¹¹ Ene a bhindamenene kuijiia mba thembuʼ oio i bhixila kithangana kuẋi, ni kuiza kuê mba kubhita kiebhi. O Nzumbi ia Kristu ia kexile moxi diâ, ia edikisa jinga o thembuʼiii, ki ia tuamene ku a ejidisa o jiphaxi janda kubhita na-ju Kristu, ni jimbote joso janda kukaiela-ku.

¹² Kioso o Jipolofeta ki ja zuela jinga ku mbandu ia kidi ki mua mu kuivua lelu, Ngana Nzambi ua a jingunuine kuila o kikalakalu kia kexi mù bhanga o misesedi ki phala mbote iâ ene, maji phala mbote ineuʼenu. O akunji a Jingolokela Jambote, a zuela jinga mu kutena kua Nzumbi Ikôla ió a mu katula ku diulu, ene a mi tangela o kidi kia ima ienʼiii. O ima ienʼiii ni ji-anju jʼendile ku i tongolola kiambote.

Akua Ngana kikale a zela

¹³ Uila kiki, kalenu polondo. Mu kilunji di kutienu inhonga, mu kale ku mesu a zele, mu suime ni kudielela o kiadi kia kà mi bhekela, bhuoso bhu tukulukila Jezú Kristu.

¹⁴ Mu kala mu ana mua tumaka Nzambi; ki mu kaiele o funza ia maluimbi menu mokulu mu thembu ia uoua.

¹⁵ Kuma-phe o Nzambi ua mʼ ixana ua zela, enu uenu ki kale mu zela mu uendelu uenu uoso.

¹⁶ Mukonda kiene kia soneka mu Mikanda Ikôla, uixi; Ki kale mu zela, kuma Eme nga zela.

¹⁷ Se muedi mu hingila Nzambi, kuma Tata, mukua kufundisa oso sé ngó kathômbo ka athu, kala muthu kia tokala mu ikalakalu iê, thembu ioso i muala kunu mu inhunginu, mu enda ni uôma uê.

¹⁸ Kuma enu mua kʼijiia kuila a mi kula ku muenhu uenu ua usemenhi, u mua tambula ku jitata jenu, kana mu itadi i di bota, ia phalata ni ulu,

¹⁹ maji a mi kula mu manhinga ma te kiengi, kifua ma kambudi ki ka moneka kisému, mba dixaka, o manhinga ma Kristu.

²⁰ Muène kidi a mu sola kuala Nzambi mʼukulu munhá, oxi kiluua i kala ni dimatekenu diê, maji ua tukulukila kiá ku dizubhilu dia jithembu kunu, mukonda dia mulonga uenu.

²¹ Muène iú ua mi bhangesa kukala mu axikani a Nzambi, ió ua mu fukununa muène mu madifundu, iú ua mu bhana o ungana. Mu kienʼiki, o kuxikana kuenu, ni kudielela, ku muala na-ku, kua kuatenena kua Nzambi.

²² O ki mualʼ iki, kuma mua di zelesa kiá o mienhu ienu mu kutumaka o kidi, o henda ienu ue ia jiphange ki i moneka kádia, di zodienu-phe mudienu ni muẋima ua fulujuka.

²³ Mbata enu, mukonda dia maka ma Nzambi, ma xalela-ku, muala ni muenhu, muala mu athu a mi vuala dingi, kana ku mbutu ia kumbama ia jitata ji fua, maji ku mbutu ia disanze, ia Tata, ki itena dingi kufua.

²⁴ Kala ki ambe o Mikanda Ikôla, kuma: Athu oso mukuá ni iangu ia mukau, o unéne uâ; kuuabha kuê kua kitulu kia iangu. O iangu i lela, o itulu i lalumuka,

²⁵ maji o Maka ma Ngana-phe ma xalelà-ku. Mene-phe o makʼama ma Jingolokela Jambote ja mi tudila enu.