I Nzuá 5 - O Mikanda Ikola

Kuxikana Jezú kubhekela kubhuluka

¹ Uoso u xikana kuma Jezú muène Kristu ió muthu a mu vuala kua Nzambi. Uoso-phe u zola o tata ua vuala, u zola ue ni mona a mu vuala kuala o tata ienhoio.

² Bhene bhu tu kʼijidila, kuma tua zolo anʼa Nzambi, se tuedi ni kuzola Nzambi ni kualuka o ijila iê.

³ Kuma o henda ia kuzola Nzambi ienhiʼii, o kualuka o ijila iê. O ijila iê-phe ki ia bhonzo ku i aiuka,

⁴ mukonda oso a a vuala kuala Nzambi, a lenda o mundu. O uzonda-phe u tolola o mundu, o kuxikana kuetu.

⁵ Nanhi u tena kutolola o mundu? Kikale uoso ngó ua xikana kuma Jezú Monʼa Nzambi.

O umbangi ua Nzambi kua Jezú, Monʼ ê

⁶ Jezú Kristu muenhó uejile ni menha ma batizu iê, ni manhinga ma kúfua kuê. Muène kejile ngó ni menha, maji kiiadi kiâ ni menha ni manhinga. O kienhiki, Nzumbi ua ki kexila umbangi kuma kidi. Mukonda o Nzumbi, iene o kidi.

⁷ Mbata sai kitatu a bhana umbangi mu diulu: Ni Tata, ni Diambu, ni Nzumbi Ikôla; ene kitatu kiâ a di bhanga Umoxi.

⁸ Kitatu ue kia bhana umbangi mu ngongo: Ni Nzumbi, ni menha, ni manhinga; kitatu kiâ a dʼivisa kumoxi.

⁹ Etu tuene mu xikana o umbangi ua athu, maji o umbangi ua Nzambi phe uala kota mu nguzu. O umbangi ua Nzambi uenhú, uene-phe ua bhela Monʼê.

¹⁰ Uoso u xikana Monʼa Nzambi, u kala ni umbangi uenhú moxi diê. Maji uoso ua kambe kuxikana, Nzambi ua mu kuatesa makutu, mukonda ua kambe kuxikana umbangi ua Nzambi ua bhela Monʼê.

¹¹ O umbangi uê uenhú: Kuma Nzambi ua tu bhana muenhu ki uàbhua, o muenhu uenhú-phe tu u tambuila kua Monʼê.

¹² Uoso uala ni Mona, uala ni muenhu; uoso ua kambe kukala ni Monʼa Nzambi, ni muenhu kala na-u.

Uoso u bhinga Nzambi u mu ivua

¹³ Imʼiii nga mi sonekena-iu, phala mu kʼijiie kuila muala ni muenhu ki uàbhua, enu oso mua xikana mu dijina dia Monʼa Nzambi.

¹⁴ Kuene kubhua uôma ku tuala na-ku bhu pholo ia Nzambi, kuma kima kioso ki tu mu bhinga, se kia xikina mu vondadi iê, muène u tu ivua.

¹⁵ Mu kienhiki, etu tua kʼijiia kuma muène u tu ivua mu ioso i tu mu bhinga. O ki tuejiia kuila kiki kidi, tua kʼijiia ue kuma ioso i tu mu bhinga tu i tambula.

¹⁶ Se muthu u mona phangʼiê uala mu ta kituxi, maji ki kituxi kia kúfua, a mu bhingile, Nzambi nda a mu bhane muenhu muenhó uoso u ta kituxi, ki kituxi kia kúfua. Sai-ku kituxi kia kúfua; ki kiene-phe eme ki nga mi ambela kuila mu ki bhingila.

¹⁷ Mangonha moso, ituxi; sai-phe ituxi, ki ituxi ia kúfua.

¹⁸ Tua kʼijiia kuma muthuu uoso uala monʼa Nzambi, ka xikina kuta ituxi, mukonda muthu uoso a mu vuala kua Nzambi, Monʼa Nzambi u mu langa, o Diabhu ió mukua kutondalesa ka tena ku mu kuata.

¹⁹ Tua kʼijiia kuma etu tua tokala Nzambi, maji o mundu uoso-phe ua zeka mua Kadiaphemba ió mukua kutondalesa.

²⁰ Tua kʼijiia ue kuila Monʼa Nzambi ueza kiá, iú ua tu bhana kilunji, phala ió, o Nzambi ia kidi, tu mu ijiie. Kiki mienhu ietu iala mu ukamba ni Muène, o Nzambi ia kidi, kumoxi ni Jezú Kristu, Monʼê. Kienhiki ki kala o Nzambi ia kidi, kienhiki ki kala ue o muenhu ki uàbhua.

²¹ Enu tuana tuami, o nzambi ja makutu lengenu-ju!