I Nzuá 4 - O Mikanda Ikola

Jipolofeta ja Makutu

¹ Enu akuetu, nga mi zola, kana kuxikana jinga ku athu oso a tanga kuila ala ni Nzumbi ia Nzambi. Athu kala iá mu a lola jinga phala ku a mona se ni kidi kiene ala ni Nzumbi ia Nzambi, mba kana. Mukonda Jipolofeta ja makutu javulu ja tubhuka mu ngongo.

² O bhabha bhene bhu mua-nda kuijidila se o Nzumbi íii ia tundu kua Nzambi mba kana: Uoso u tanga kuma Jezú Kristu ueza mu mukutu ua xitu, ió uala ni Nzumbi ia tundu kua Nzambi.

³ Maji o uoso u kamba kutanga kiki kua Jezú, kala ni Nzumbi ia tundu kua Nzambi. Ioio iene o Nzumbi ia tundu kua Nguma ia Kristu. Enu muevu kuila O iene hadia iza, kindala ieza-phe kiá mu ngongo.

⁴ Enu, tuana tuami, mua tokala Nzambi, o jipolofeta ja makutu mua ji tolola kiá, mukonda o Nzumbi uala moxi dienu, uala kota mu kutena, ka tena kusoka ni nzumbi iala mua ió a tokala ku mundu.

⁵ O polofetʼ ʼojo ja makutu, ji zuela ima ia mu ngongo, o mundu mu ngongo ua evua, kuma ene a tokala ku mundu.

⁶ Maji etu-phe tua tokala Nzambi. Uoso uejiia Nzambi, u tu ivua; maji uoso ka tokala Nzambi, ka xikina ku tu ivua. Mu kiki, bhene bhu tu ijidila o Nzumbi ia kidi ni nzumbi ia makutu i bhekela kutexika.

Nzambi henda. Ua zolo Nzambi, u zola mukuá

⁷ Enu akuetu, tu di zodienu mudietu, kuma o henda ia tunda kua Nzambi. Uoso u zola, muenhó muthu a mu vuala kua Nzambi, uejiia ue Nzambi.

⁸ Uoso ua kambe kuzola, kejiia Nzambi, kuma Nzambi henda.

⁹ Muene mua tu tukuluila Nzambi o henda iê ia tu kuatela, Nzambi kia katula Monʼê umoxièlele, anga u mu tumikisa mu ngongo, phala etu ni tu mone muenhu kua muène.

¹⁰ Muenhumu mua kala o henda, mu kuila: Etu ki etu tua zola Nzambi, maji muène-ku ua tu zola, iú ua tumikisa Monʼê mu kukala kiluuluilu kia ku tu lolokesa o ituxi ietu.

¹¹ Enu akuetu, tua mi zola, Nzambi se ua tena ku tu zola kiki, etu uetu tua fuama tu di zola mudietu.

¹² Nzambi kiluua a mu mona mesu ku muthu. Etu-phe se tua di zolo mudietu, Nzambi u kala ku ukamba ni etu, o henda iê i kala ia tenena moxi dietu.

¹³ Kiene ki tu kʼijidila, kuma tuala ku ukamba ni Nzambi, ni muène ua tungu momuetu, mukonda ua tu bhana o Nzumbi iê.

¹⁴ Etu tua ki mono, tua ki kundila ue akuetu kuila, Nzambi ua tumikisa Monʼê mu kukala Kibhamuenhu kia mundu.

¹⁵ Uoso u tanga kuila Jezú Kristu muène Monʼa Nzambi, muthu ió Nzambi ua tungu mua muène, ni muène mua Nzambi.

¹⁶ Etuene ue tuejiia o henda ia Nzambi ia tu kuatela, etu tua i xikana. Nzambi henda. Uoso ua tungu mu henda, ua tungu mua Nzambi, o Nzambi ua tungu mua muène.

¹⁷ O henda iatenena mo muetu se tuala naiu ia soko, i bhuisa uôma mu Kizuua kia kufundisa. Mukonda kioso ki ala muène Kristu, etu ue kiene ki tuala mu ngongʼumu.

¹⁸ Henda ki i moneka uôma. O henda ia tenena kiasoko, i kaiesa uôma. Kala kiki, uoso uala ni uôma, kiluua a kala ni henda iasoko, ia tenena, mukonda o uôma u talesa hadi.

¹⁹ Etu tu zola, mukonda Nzambi muène ua diangela ku tu zola.

²⁰ Muthu se uedi: Nga zolo Nzambi, hé u kala-phe mu zemba phangʼiê, muène mukua makutu. Kuma uoso u kamba kuzola phangʼiê, ua mu mono ni mesu, ka tena kuzola Nzambi kiluua a mu mona.

²¹ Kijilʼiki tua ki tambula kua Kristu muène, kuma: Uoso ua zolo Nzambi, a zole ue phangʼiê.