I Malunda 5 - O Mikanda Ikola

A tokala ku muiji ua Lubene

¹ O ku ana a Lubene, o phandekumbi ia Izalaiele, mukonda muene ua kexile phande-kumbi, maji mukonda dia ku katula o ujitu ua hama ia tata iê, iú ua i fukuila, uphande-kumbi uê a u bhana ana a Zuze, mona Izalaiele. Maji o Zuze ka mu soneka mu divulu dia Ingo-ia-Vumo kuila muene phandekumbi.

² Sumbala o Juda ua kexile kindanda muaxaxe ka jiphange jê, o kua muene kuene kutunda o Dikota, maji o uphande-kumbi uangene ua Zuze.

³ Ana-phe a Lubene phande-kumbi ia Izalaiele enhá: Hanoko, ni Palu, ni Hezelone ni Kálumi.

⁴ O ana a Jouele: Semaia, ni monʼê Ngongo, ni monʼê Simei, ni monʼê

⁵ Mika, ni monʼê Lekaia, ni monʼê Bahale, ni monʼê

⁶ Behela, ni monʼê iú uakexe kilamba kia akua Lubene, anga a mu amabata ku upelezu kua Tilikate-Pilinesele, sobha ia Asídia.

⁷ Mu kutanga o jiphange jê, ku majiku mà, kioso kia ate bhu kixina bhua tunda o miji iâ, Jehele ni Zakadiia ene a kexile atuminʼâ.

⁸ O Bela, mona a Azaze, mona a Sema, mona a Jouele ua tungile bhu Alouele hé uia katé bhu Nebo kumoxi ni Bahale-Meone.

⁹ Uatungu ue ku mbandu ia thunda, bhu kididi kia kukutukila mu kikangalakata, tunde ku ngiji ia Eufalate. Mukonda o ibhaku iê ia divualele kiavulu mu ixi ia Ngiliiade.

¹⁰ O mu izuua ia Saúlo anga alua ita ni akua Hangale, anga a a tolola ni nguzu ia lukuaku luâ. Ene-phe anga a tunga mu jibalaka jâ, mu mbambe ioso ia ixi ia Ngiliiade, ku mbandu ioso ia mutundila-kumbi.

A tokala ku muiji ua Ngade

¹¹ O ana a Ngade anga a tunga bhua lulama ni ene, mu ixi ia Basane katé ku Sálaka.

¹² O Jouele muene uakexe mutumini uadianga, kaiela Safane: O Janai-phe ni Safate a kexi ue mu Basane.

¹³ O jiphange jâ ja mala ku mabhata ma utata uâ, jenhiji: Mikaiele, ni Mezulame, ni Seba, ni Jolai, ni Jakane, ni Ziia, ni Hebele, sambuadi.

¹⁴ Enhá o ana a Abiaili mona Hudi, mona a Jaloua, mona Ngiliiade, mona a Mikaiele, mona a Jezisai, mona a Jadu, mona a Buze.

¹⁵ O Hai, mona a Abidiiele, mona a Nguni, muene uakexi mutumini ua dibhata dia jitata jâ.

¹⁶ Hé a tunga mu Ngiliiade, ni mu Basane, ni mu ididi ia utuminu uâ. Kumoxi ue ni mu jimbandu joso ja Salone, katé mua suku o jimbambe jê.

¹⁷ Ene osoʼâ a a sonekene mu madivulu a muiji, tunde bhu kixina kia miji iâ mu izuua ia Jotamu, sobha ia Juda, ni mu izuua ia Jelobouamu, sobha ia Izalaiele.

Ilombo ia Masoladi ma Miji ia akua-Thunda

¹⁸ Ku ana a Lubene, ni akua Ngade, ni ku kaxaxi ka muiji ua Manasa, mala a undanda ua ita, a tenene kukuata o ngubu, ni xibhata, olekele jinge o mufula, hé akala ilolo ia ita; kua kexile makuinhi a uana a midi ni midi jiuana ni hama-sambuadi ni makuinhi a samanu, a tunda jinga mu kúlua.

¹⁹ Anga alua ita ni akua Hangale, ni Jetule, ni Nafi, ni Nodabe.

²⁰ Anga a a kuatekesa mu kúlua-nâ, o akua Hangale ni oso kiá a kexile-nâ, ene oso hé a a bhana bhu maku mâ, mukonda a dikolele kua Nzambi, kiala mu kúlua o ita, Nzambi hé u a bhana mátui, kuma a dielela kua muene.

²¹ Anga a ambata o ibhaku iâ; o jikamelu jâ ja tena makuinhi a tanu a midi, ni hama jiiadi ja midi ni makuinhi a tanu a jimbudi, ni midi jiiadi ja jibhulu, ni hama ia midi ia mienhu ia athu.

²² Mukonda athu a vulu a a jibha, mbata o Nzambi muene ua a bhângela; hé a tunga mu ixi bhu kididi kiâ, katé kia a tumikisa ku ubhika.

²³ O ana a kaxaxe ka muiji ua Manasa, a tungile mu ixi ienhoio: tunde bhu Basane katé bhu Bahole-Helemone, kumoxi ni Senile, ni mulundu ua Helemone. Enhá anga a divualulula, a kala ndumba.

²⁴ Akexile mítue ia mabhata ma utata uâ, enhá: Efele ni Izi, ni Ediiele, ni Azibiiele, ni Jelemiia, ni Hodaviia, ni Jadiiele, maiala a nda, mala a majina, ene o ilolo iktumina o mabhata a jitata jâ.

²⁵ Maji-phe a-ta mulonga, atondala kua Nzambi ia jitata jâ; akaiela jinzambi ja matumbu, akua jixi jengi ió a a jikinisa kuala Nzambi bhu pholo iâ.

²⁶ Kiabhekela Nzambi ia Izalaiele ku a balumuina o nzumbi ia Phulu, sobha ia Asídia, ni nzumbi ia Tikalate-Pilinesele, sobha ia Asídia, ua a kuika, iu ua ambata ku uhutile, o ana a Lubene ni ana a Ngade ni kaxaxe ka muiji ua Manasa; ia a a balakala ku Hala, ni ku Hambole, ni ku Hada ni ku ngiji ia Ngozane, ia ala kuenhoko katé mu kizuua kia lelu.