I Malunda 4 - O Mikanda Ikola

Atokala ku muiji ua Juda

¹ O ana Juda enhá: Peleze, ni Hezelone, ni Kalmi, ni Hulu, ni Sobale,

² o Lehaia, monʼa a Sobale, uvuala Jahate, o Jahate uavuala Ahumai ni Lahade: iá ene o jindandu ja jizolatita.

³ Enhá ene o ana a tata ia Etame: Jizeleele, ni Ijima ni Idiba; o dijina dia phangeʼiê ia muhatu Hazeleleponi.

⁴ Kua di-te dingi Penuuele, tata ia Ngedole, ni Ezele, tata ia Huza: Iá ene o ana a Hulu, phande-kumbi ia Efalata, tata ia Beleme.

⁵ Azulu tata ia Tekoa, uakexile ni ahatu aiadi: Hela ni Nahala.

⁶ Nahala hé uvuala Auzame, ni Hefele, ni Hasatadi; enhá ene o ana a Nahala.

⁷ O ana a Hela: Zelete, Jesobale, ni Etinane.

⁸ O Khoji, uavuala Anube ni Zobeba; ni jindandu ja majiku a Ahalele, mona a Halume.

⁹ O Jabeze hé uditungula muʼaxaxe ka jiphange jê, o manhi-â hé u mu luka dijina dia Jabeze, kifua uambe kiki, kuma: O mona iú nga mu vuala ni misusu.

¹⁰ Mbata Jabeze uadionda Nzambi ia Izalaiele, kuila: Se u ngi zediuisa kiavulu kinéne, o jimbambe jami ni u ji kudisa dingi muene, o lukuaku lué hé lu ngʼendesa, hé ubhangesa kuila o dibhebhu ki di ngi tule anga u ngi konda o malamba! Nzambi anga u mu bhanga kioso kia mu bhingi.

¹¹ O Kelube, phangeʼa Suua u vuala Mihele; iú muene o tata ia Estone.

¹² O Estone u vuala Betelafa, ni Peseia, ni Teina, tata ia mbonge ia Nahase. Iá ene o mala ma Leka.

¹³ O ana a Kenaze: Otoniiele ni Selaia: o ana a Otoniiele: Hatate.

¹⁴ O Meonotai uvuala Ufala, o Selaia u vuala Jouabe, tata ia akua dikôlo dia akua maufunu; mukonda akexile momo akua maufunu.

¹⁵ O ana a Kalebe, mona a Jefune, enhá: Ilu, Ela, ni Nahame; o mona a Ela a mu ijiia, exi; Kenaze.

¹⁶ O ana a Jehalelele: Zife, ni Zifa, ni Tiliia, ni Azaliiele.

¹⁷ O ana a Ezala: Jetele, ni Melede, ni Efele, ni Jalone; iu ua vualele dingi Midiiana, ni Samai, ni Izebá, tata ia Estemoua.

¹⁸ Muhatuʼê uatokala ku mbutu ia Juda hé uvuala Jelede, tata ia Ngedole, ni Hebele, tata ia Soko, ni Jekutiiele, tata ia Zanoua; enhá ene ana a Bitiia mona ua Falaó ua muhatu a mu sakanene kuala Melede.

¹⁹ O ana a muhetu ua Hodiia, phange ia muhetu ia Nahame, enhá: Abikeila, o mukua Ngalami, ni Estemoua, mukua Mahaka.

²⁰ O ana a Ximinhá, enhá: Amone, ni Dina, ni Bene-Hanane ni Tilone; O ana a Izi, enhá: Zouete ni Bene-Zouete.

²¹ O ana a Sela, mona a Juda: Hele, tata ia Leka, ni Lada, tata ia Malesa; Sela ue muene o tata ia jifamília ja bhata dia akalakadi a linu, mʼonzo ia Azebeia.

²² Kumoxi ue ni Jokine, ni mala a Kozeba, ni Jouaji, ni Salafe, (a toluele akua Mouabe hé a kala ni kua a tumina), ni Jasubi-leme. Maji o ima ienhiʼii ió kulu kiá.

²³ Enhá akexile ombia-jímbia, ia a tunga jinga mu Mábhia a jihonga, ni mu ikonzo mu ixi ia Netaíme ni mu Jedele; ia xalele muenhomo ni sobha iâ mu ku mu kalakela ku kikalakalu kiê.

A tokala ku muiji ua Ximinhá

²⁴ O ana Ximinhá enhá: Nemuuele ni Jamine, ni Jadibe, ni Zela, ni Saúlo.

²⁵ Uavu monʼê Salume, ni monʼê Mibesame, ni monʼê Míjima.

²⁶ O ana a Míjima, enhá: Hamuuele, monʼê ua diiala, monʼê Zakule, ni monʼê Simei.

²⁷ O Simei uakexile ni kuinhi ni kisamanu dia ana-a-mala, ni kisamamu kia ahatu, maji o jiphange jâ ja mala-phe ka kexile ni ana avulu; o família iâ ioso ka di sokolola kiavulu kala o jifamília ja majiku ma ana a Juda.

²⁸ Hé a tunga bhu Beleseba, ni bhu Malada, ni bhu Hazele-Suuala,

²⁹ ni mu Bila, ni mu Ezene, ni mu Tolade,

³⁰ ni mu Betuuele, ni mu Holoma, ni mu Zikalake,

³¹ ni mu Bete-Malekabote, ni mu Hazale-Suzine, ni Bete-Bili, ni mu Sahalaíme, enhá ene akexile o madiembu mâ, Davidi kia hingi o ungana ua kutumina.

³² O tusanzala tuâ tuofele tua kexe na-tu, tuenhutu: Etame, ni Aime, ni Dimone, ni Tokeme ni Azane; madiembu a tanu.

³³ Ni jisanzala jâ joso, jakexile mu jimbandu ja madiembu atanu iá katé ku Bahale. Menhama o mabhata mâ moso, ni miji iâ, kala kia i soneka mu Ingo-ia-Vumu.

O ilamba mua Ximinhá

³⁴ O Mesobabe-phe, ni Jamileke ni Joza, mona a Amaziia,

³⁵ ni Jouele, ni Jehu mona a Josibiia, mona a Selaia, mona a Aziiele,

³⁶ ni Eliohuenai, ni Jahakaba, ni Jesouaia, ni Azaia, ni Adiiele, ni Jesimiiele, ni Benaia.

³⁷ Ziza, mona a Sifi, mona a Alone, mona a Jedaia, mona a Nzidi, mona a Semaia,

³⁸ enhá, kia a soneka ku majina mâ mu Ingo-ia-Vumu, akexile ilamba mu undandu ua jifamilia jâ; O mu undandu ua jifamilia ja jitata jâ anga a di sokolola muene ni kuvula kuoso.

³⁹ Hé a bhixila muene katé bhu mbambe bhu dibokuenu dia Ngedole, ku thandu ia dikôlo mu kusota sabhelela phala kudisa o jimbudi jâ.

⁴⁰ Hé a sanga o sabhelela iambote ni ixi iadixala, ia tululuka, ia nhoha, mukonda, akua Hame, atungile muenhomo mʼokulu.

⁴¹ Iá-phe, a a soneka ku majina mâ, abhiẋila mu izuua ia Ezekiia, sobha ia Juda, ia a muanga-muanga akua-xi a tungile muenhomo kumoxi ni jibalaka jâ, ia a a jikinisa ene oso muene, katé mu kizuua kia lelu, ia a tungu-mu ene bhu kididi kiâ, mukonda muenhomo mua kexile sabhelela iambote phala o jimbudi jâ.

⁴² Muʼaxaxe kâ ene ue, ku ana a Ximinhá kukala hama jitanu ja mala, aia ku milundu ia Seíle; anga ambata Pelatiia, ni Nehadiia, ni Iefaia, ni Uziiele, o ana a Izi hé a ata ku pholo mu kukala jikabhitangu ja ku a tuamenena.

⁴³ Oso a subhukile kua iá a bhulaka ku akua Amaleke ene a a buba ene oso muene, ia a tungu ene muenhomo katé mu kizuua kia lelu.