I Malunda 13 - O Mikanda Ikola

O álaka a í bha ka mʼonzo ia Obede-Edomo

¹ Davidi hé uta phangu ni kaiula X ni jikabhitangu ja jimidi, ni ja jihama, ni ilamba ioso.

² Davidi anga uambela ene oso abhongoloka, akua Izalaiele, uixi: Se ki mi uabhela, anga ki tunda ue kua Jihova Nzambi ietu, tu tumiʼenu lusolo jiphunga jiie ku jiphange jetu joso ja mukuá, mu jixi joso ja Izalaiele, ni ku jinganga, ni ku akua Levi, atungu kumoxi ni ene, mu mabhata, ni mu jimbandu joso, phala a dibhongolole kumoxi ni etu.

³ Ni tubheke kunu ku tuala, o álaka ia Nzambi ietu; mukonda kiluua tu i takana tunde mu izuua ia Saúlu.

⁴ Ene oso abhongoloka-phe exi, kienhiki kiene muene ki tu bhanga; mukonda o phangu iii a i mono ia iuka ku mesu ma mundu uoso.

⁵ Davidi-phe, hé ubhongolola Izalaiele ioso, tundé ku Sihole ia Ijitu katé mu kubhiẋila ku Hamate, phala kuia mu kutakana o álaka ia Nzambi ku Kidiate-Jadimi.

⁶ Bhenhobho, o Davidi-phe, anga ubanda ni Izalaiele ioso ku Bahalá, mu kutunda bhobho-phe aia katé ku Kidiate-Jadimi, mu ixi ia Juda, phala kuenhoko kubandesa o álaka iangene ia Nzambi, Jihova ua tunga muʼaxaxe ka jikelubini, uabhingi o ku thandu dia álaka iê kuene kua diondela o dijina diê.

⁷ O álaka ia Nzambi anga a i ambatela ku thandu dia dikalu diòbhe, tunde ku dibhata dia Abinadaba. O Uza ni Ahiiu ene a-lu kuendesa o dikalu.

⁸ Davidi-phe, ni Izalaiele ioso, anga akala mu sanguluka enhoso kumoxi bhu pholo ia Ngana Nzambi, ni nguzu iâ ioso, ala mu kuimba, ni tukoxi, ni isàka, ni isanji, ni tungoma ni tumingeia, ni jikoloneta.

⁹ Kioso kia bhixila bhu kididi kia dizanzu dia kuvundila dia Kidone, Uza usunununa o lukuaku luê, phala kufikidila o álaka; mukonda o jingombe ja dibhukanene, o álaka anga izendalala.

¹⁰ Njinda ia Jihova anga i uama, ubilukila Uza, anga u mu jibha, mukonda dia kusunununa o lukuaku luê ku álaka; muene hé ufuila bhenhobho, bhu pholo ia Nzambi.

¹¹ Davidi inga uizala ni dilamba, kuma Jihova ua jikula musula kua Uza; kia bhekela o kuixana kididi kienhokio Paleze-Uza, katé mu kizuua kia lelu.

¹² Kizuua kienhokio Davidi ukala ni uoma ua Nzambi, uixi: O álaka ia Jihova nga kʼèza na-iu kiebhi mʼonzo iami?

¹³ Kienhiki Davidi ka bheka dingi o álaka mu dibhata diê, ku mbanza ia Davidi; maji ua i tumikisa ku dibhata dia Obede-Edomo, mukua Jete.

¹⁴ Mu kienhiki o álaka ia Nzambi i bhanga mbeji jitatu mu inzo ia Obede-Edomo ni akua dibhata diê; Jihova anga uta o dibesá diê ku dibhata dia Obede-Edomo, ni ima iê ioso iakexile na-iu.