I Malunda 12 - O Mikanda Ikola

O athu eza kua Davidi mu Zikilake

¹ Enhá-phe ene eza kua Davidi, mu Zikilake, kioso muene kia mu di sueka hanji mukonda dia kulenga Saúlu monʼa Kixi; iá ene akexile o mazonda mu akuâ a mu kuatekesa jinga mu ita iii.

² Abhakata jinga o mifula, o mu kutakula o matadi atakula ni lukuaku lua kúdia ni lua kiasu, ni kuona madionga ni mifula, Enhá akua Bejamí, jiphange ja Saúlu.

³ Ahiiezele, o kilolo kiâ uakexe mutumini, ni Jouaji, mona a Semaha, o mukua Ngibeia, ni Jezeiele, ni Pelete, ana a Azemavete, ni Belaka, ni Jehu, mukua Anatote.

⁴ Ni Ijimaia, mukua Ngibiione, muene o dizonda mu akuá o makuinhi a tatuʼo, muene kabhitangu ka makuinhi a tatu, enhó, ni Jelemiia, ni Jahaziiele, ni Jozabade, o mukua Jedele,

⁵ Ni Eluzai, ni Jedimote, ni Behadiia, ni Samadiia, ni Sefatiia, mukua Haluge,

⁶ ni Elekana, ni Isiia, ni Azadiiele, ni Jouezelė, ni Jasobeianu, akua Kola.

⁷ Ni Jouela, ni Zebadiia, ana a Jelouamu, mu Ngedole.

⁸ O ku akua Ngade, adibande kua Davidi, a mu sange bhu kididi kia nguzu, mu kikangalakata, mala a mazonda a ita, abhebhuluka kiambote mu kubhânga, abhakata o madionga ni jingubu, jipholo jâ mukuâ ni ja jihoji, o mu lusolo mukuâ ni jimbambi ku milundu.

⁹ Azele muene o kilolo kiâ, Hubadiia, uakaiela, Eliiabe muene ua katatu,

¹⁰ Mijimana, ua kauana Jelemiia, ua katanu,

¹¹ Atai, ua kasamanu, Ediiele, ua Kasambuadi,

¹² Johanane, ua kanake, Elizabade, ua Kávua,

¹³ Jelemiia ua kakuinhi, Maxanai, ua kakuinhi ni umoxi.

¹⁴ Iá, ku ana a Ngade, ene akexile o jikabhitangu ja kifuẋi kia masoladi; umoxi ku jindenge mudiâ utolola hama ia muthu, o dikota muʼaxaxe kâ utolola midi.

¹⁵ Iá ene a zauka Njolodá ku mbeji ia dianga, kioso o ngiji ii ki iezala kiavulu i ia dibhange masenza ku jimbandu ja mijinga iê ioso, ia a kaiesa ni kumuanga-muanga ene oso atungile mu jihonga ni mu makôlo, ku thunda ni ku luiji.

¹⁶ Ku ana a Bejamí ni Juda, kuiza ue athu kua Davidi, bhu kididi kia nguzu, mu mabànda mua suamene,

¹⁷ Davidi hé u tunda mu ku a sangesa, anga ua a zuelela, uixi: Se enu mua ngendela ni muẋima ua kutululuka kuoso, mbé ku ngi kuatekesa, o muẋima uami udibanda kukouenu; maji-phe se mueza phala o ku ngi bhakula ku jinguma jami, sè kima kiaiibha ki nga bhange bhu maku mami, Nzambi ia jitata jetu u ki mona hé u ki bazela.

¹⁸ Bhenhobho Nzumbi anga i bokona mua Amasai, o kilolo uala mutumini a makuinhi a tatu, uixi: Etu tua kutokala eie, Davidi! Etu tualʼetu kumoxi ni eie, u monʼa Jese! O kutululuka, kutululuka kukale nʼeie! O kutululuka kukale ni ió oso ala ku ku kuatekesa! Kuma-ze, o Nzambi iê, u ku kuatekesa muene! Davidi anga u a a tambulula, anga u a bhanga jikabhitangu ja kifuẋi kia masoladi mê.

¹⁹ Amoxi-mu ku akua Manasa a bhiti ue kua Davidi, kioso Davidi kieza kumoxi ni akua Fidíxia mu kúlua ita, ia kukitukila Saúlu. Sumbala kiene, maji ene ka kuatekesa dingi akua Fidíxia, mukonda o ilamba ia jifidíxa, mu kuta kikutu a mu vutulʼé, kuma edi, exi: Kia-ndo kala kiluezu kia kuila etu udianga ku tu batula o mítue ietu, muene hé ua kà bhitʼê kua ngana iê Saúlu.

²⁰ Muene, mu ku vutuka-phe ku Zikilake, akua Manasa, abhiti kua muene enhá: Adina, Jozabade ni Jediiale, ni Mikaiela, ni Jozabade, ni Elihú, ni Ziletai, ene o atumini a jimidi ja Manasa.

²¹ Enhá anga a kuatekesa Davidi mu kubhânga ni kifuẋi kienhókio kia masoladi a ingumba, kuma ene oso akexile ilôlo, mazonda, akexile jikabhitangu ja ilôlo ia masoladi.

²² Mukonda, o thembu ienhoio, ku kizuua ni kizuua, eza jinga kua Davidi, phala ku mu kuatekesa katé kia dibhange kifuẋi kionéne, kala kifuẋi kia Nzambi.

Athu eza kua Davidi bhu Hebolone

²³ Talesa kienhiki kiene o kialuilu kia atumini, abhakata phala kúlua ita, eza kua Davidi, bhu Hebolone, phala kulungulula o ungana ni utuminu ua Saúlu phala ku u bhitisa kua Davidi kala kia ki zuela Jihova.

²⁴ O ku ana a Juda, a bheka o tungubu tuofele ni jisosa, midi jisamanu ni hama nake, abhakata phala kúlua.

²⁵ Ku ana a Ximinhá, mala a mazonda la kubhânga akexi sambuadi dia midi ni hama.

²⁶ Ku ana a Levi, midi jiuana ni hama jisamanu.

²⁷ O Joiada-phe muene uakexile mutumini ku akua Alane, akexile ni muene midi jitatu ni hama jisamanu.

²⁸ O Zadoke, kiala hanji munzangala, iala dia nguzu, o ku undandu ua tatʼâ, makuinhi aiadi a ilamba ni kiiadi akexe-nâ.

²⁹ O ku ana a Bejamí, o jiphange ja Saúlu, midi jitatu ngó, mukonda, katé bhenhobho avulu hanji muʼaxaxe kâ akexile ku mukutu ua Saúlu.

³⁰ O ku ana a Ifalaimi, makuinhi aiadi a midi ni hama nake dia mala a mazonda, mala fuma mu dibhata dia jitata jâ.

³¹ O ku kaxaxe ka muiji ua Manasa, kuinhi dia midi ni nake, a atungula muene ku majina mâ, phala kuiza mu kuhingisa Davidi ku usobha.

³² O ku ana a Isakale, aditungula mu uijidilu ua kuijiia kiambote o ithangana, phala kutongolola ioso Izalaiele iafuama kubhanga, hama jiiadi ja atumini-â, o jiphange jâ joso a kala mu kaiejela o kizuelu kiâ.

³³ Kua Nzebulone, a tundu ku kifuẋi kia masoladi, a ate mu ididi mbé kúlua ita, a di zakela ni mata oso a ita, makuinhi a tanu a midi. Kuma ue ene aditungula mu kuijiia kiambote o kuta athu mu ididi iâ oso aia mu kúlua ita, ni muẋima ua lujiji mbé o kukuatekesa Davidi ni mu banda.

³⁴ O kua Nafitali, midi ia jikabhitangu, o kuthandu dia jikabhitangu makuinhi a tatu a midi ni sambuadi ia masoladi kumoxi ni ene, ambata tungubu tuofele ni jososa.

³⁵ Ku akua Dane ue, a atungula phala kúlua ita, makuinhi aiadi ni nake dia midi ni hama jisamanu.

³⁶ O ku akua Asele, a tundile phala o kifuẋi kia masoladi phala ku ata mu ididi ku ita, makuinhi a uana a midi.

³⁷ O ku mbandu ia sámbua dia Njoloda, ku akua Lubene ni akua Ngade, ni kaxaxe ka muiji ua Manasa, ni imbolongondo ioso ia ita, phala kúlua na-iu adibhongolola hama ni makuinhi aiadi a midi ia muthu.

³⁸ Mala enhá a ita ene oso adiiudika kiambote ia a ate ku munono ua ita, ni muẋima uoso uatenena, eza bhu Hebolone phala ku zangumuna Davidi ni ku mu bhanga sobha ia Izalaiele ioso. Ni masubhu ue oso a subhuka kua Izalaiele, akexile ni muẋima uene umoxi, phala Davidi ku mu bhanga sobha.

³⁹ Hé akala kuenhoko, ni Davidi, izuua itatu, anga akala mu kúdia ni kunua, mukonda o jiphange jê ene a a iudikilile o mákudia.

⁴⁰ O athu ue a tungile bhua zukuama, ni bhenhobho katé ku Isakale, ni Nzebulone, ni Nafitali, abheka jinga o jimbolo ja huta ku thandu dia jiseseme ja jibulu, ni ku thandu dia jikamelu, ni ku thandu dia jimula, ni ku thandu dia jingombe, o mákudia a fadinha, ni isaka ia jifiku, ni isaka ia ji-uva, ni vinhu, ni maji, ni jingombe, ni ibhaku ia jimbudi ni jihombo ja nzungule, mukonda kua kexile kusanguluka mua Izalaiele.