I Malunda 10 - O Mikanda Ikola

O kalunga ka Saúlu ni anʼê, ni kutoloka kua Izalaiele

¹ O akua Fidíxia alua ita ni Izalaiele; o mala a Izalaiele anga alenga ku pholo ia akua Fidíxia, ia a a buidisila mu milundu ia Jiliboua.

² O akua Fidíxia hé a zuididika Saúlu ni anʼê, anga akua Fidíxia a jibha Jonata, ni Abinadabe, ni Malikisuua, ana a Saúlu.

³ O mvunda anga i dibandekeza mu kubilukila Saúlu, o akua kuasamisongo a mu mono, muene uoma uavulu hé u mu kuata, ua mala enhá.

⁴ Saúlu anga uambela disoladi diê, diambata o ngubu iê, uixi: Fomona o xibhata ié, u ngi kube na-iu katé ki itundidila; phala ki ki bhite kuila athu iá a kambe ku a saia eza mu ku ngi tobhesa. Disoladi-phe ua ditunuʼê, mukonda uakexile ni uoma uavulu; Saúlu-phe uzangula xibhata, hé u di toma-ku, iu ua buidila bhenhobho.

⁵ Disoladi diê-phe kia mono kuma Saúlu uafu, muene ue uditakuila ku xibhata iê, u ditoma anga ufua.

⁶ Kienhiki Saúlu kiafu ni anʼê kitatu ni dibhata diê dioso afuila-nê kumoxi.

⁷ Mala oso a Izalaiele iá akexile mu dikôlo, kia mono kuila Saúlu ni anʼê afu, axisa mabhata mâ, hé a lenga; o akua Fidíxia eza anga a tunga-mu.

O mbila ia Saúlu

⁸ Kia bhiti-phe kuila, ku kizuua kia kaiela-ku, o akua Fidíxia kioso kieza mu ku bhunda o imbi, a sange Saúlu ni anʼê hanji ki azeka mu milundu ia Jiliboua.

⁹ Anga a mu bhunda ima ioso, akatula o mútue uê ni mifula iê, a i tumikisa ku ixi ia akua Fidíxia kʼoxi iê, phala ku ki jimbula ku iteka iâ ni ku mundu uâ.

¹⁰ O mifula iê hé a i tula mʼonzo ia nzambi iâ, o mútue uê a u someka mu inzo ia Ndangone.

¹¹ Kia kivu-phe, akua Jabeze dia Ngiliiade, ni iene ioso akua Fidíxia ia bhange kua Saúlu,

¹² o indanda ioso-phe ia ita anga a balumuka, hé a katula o mukutu ua Saúlu, ni mikutu ia anʼê eza na-iu ku Jabeze; anga afunda o ifuba iâ bhoxi dia muxi uexana kuila Kaluvádiu, mu Jabeze, anga a jila mu sambuadi dia izuua.

¹³ Kiene Saúlu kiafuʼiki, mukonda dia ikuma iê, ia te mu ku kitukila Jihova, ni mukonda dia kukamba kubhaka o kizuelu kia Ngana, ni mukonda uê dia kusota o kimbanda kia muhatu, mukua kuzambula, mbé ku mu kundila ima ioso,

¹⁴ o ku sota Nzambi kana; kiene kia mu bhekela o ku mu jibha, o ungana uê anga a u bhana Davidi, mona Jese.