I Kolindo 9 - O Mikanda Ikola

O ukota ua Jipoxolo ua kubhinga jingeleja ku a bhana huta

¹ Manhi eme ki ngi di vu? Ki ngala ngi Poxolo? Ngana ietu Jezú, manhi ki ngi mu mono mesu? Manhi enuʼ enu ki mu ibundu ia kikalakalu kiami mua Kristu?

² Né-mbe athu engi ki ngi kala Poxolo iâ, enu ki ngi kambe kukala ngi Poxolo ienu! Kuma enu muala mu kidimbu kiami kia upoxolo, mukonda dia muenhu uenu u muala na-u mua Ngana.

³ Enʼ ió ala ku ngʼ amba, eme ngi funda-nâ kiki:

⁴ Kifua eme ki ngala ni ukota ua kuẋikina kuila a ngi bhane kia kudia ni kunua ku kikalakalu kiami?

⁵ Kifua eme ki ngala ni ukota ua kuenda ni muhatuʼ ami se uala muxikani, uila ki bhanga o jipoxolo ni akuetu, ni jiphange ja muene Ngana, ni Phetele?

⁶ Inga eme-muene ngó ni Barnabé, ki tu tena kufula kukalakalela o huta ietu?

⁷ Dikuenze kuẋi ki aia ku ita, muene u sota o huta iê? Mba nanhi u phapha dibhia dia ji-uva nʼ a kambe kudia ku idima iê? Mba nanhi u bhila kilunga nʼ a kambe kutambula ku lete i bhana o kilunga?

⁸ Ki Sabhu ia athu ngó i nga te, maji ni mu Kitumu kí momo.

⁹ Kuma a soneka mu Kitumu kia Mozé, exi: Ngombe i titidila o masa, kana ku i kuta ku dikanu. Kifua Nzambi ua ki ambela muene mukonda o ngombe ua i kala ni muanu?

¹⁰ Inga ua ki ambela muene mukonda dietu? Kidi kiene, muene ua ki ambela mukonda dietu! Mukonda uoso u dima, u tokala u dimina dilau, ni uoso u vunda, u dielela kuma uanda kudia-ku.

¹¹ Se etu tua mi kunina ima ia nzumbi, manhi ki kala musanu, se tua munu ku jimbote jenu mu xitu?

¹² Se ku kala akuetu ala ni ukota uenʼiú ua kukinga o ima iambote kokuenu, etu kifua ki tu beta kota? Sumbala-phe ukota uenʼ iú etu na-u, maji ki tu solo ku ki bhanga. Inda ima ioso tua soko na-iu, mbebhu o Njimbu Iambote ia Kristu kana ku i fudisa.

¹³ Enuʼ enu mua kʼ ijiia kuma akua kusedivila mu Tembulu, a dia ku ima i tunda mu Tembulu. Mua kʼ ijiia ue kuila ni ió emanena o sata ia mu ku oha ku kalatodio, a nomona mbandu iâ ku sata ia ibhaku ia bheka mu kusatela bhu kalatodio.

¹⁴ Kiene-phe ue kia lekelela Ngana, kuma oso a kola o Njimbu Iambote, mu kukola o Njimbu Iambote kuene ku a dia.

¹⁵ Maji eme-phe ima ioso iii ki ngi jijila ku i bhanga; ni kiki, ki ngi ki sonekena phala enu ni mu ngi bhange kienʼ iki. Kuma inda nga-fu, ki ngʼindi kubhanga kiki! Mbata ki ngʼ ehela muthu ku ngi bhuisa o thate iami mu kubhanga kiki.

¹⁶ Kuma né-mbe ngi kola Njimbu Iambote, ki ki ngi bhana kuta thathe. Kuma katé bhu ngezʼ abha, kiene kia ngi fuama kubhanga. Kokolo diami se ngi kamba kukola o Njimbu Iambote!

¹⁷ Kala kiki, o kikalakalu kiki se ngi ki bhanga mu vondadi iami, sai nganhu iê. Maji se ngi ki bhanga, mukonda kiene kia ngi fuama, mbata kikalakalu kia ngi tuika Nzambi.

¹⁸ O ki ngalʼ iki-phe, futu iami iahi? Oko iene ia kutanena kuboka o Njimbu Iambote mu ngoho, sé kubhinga kitadi, mba kujijila kiokio kia ngi tokala mu ukota uami ua kubhanga o kikalakalu kia Njimbu Iambote.

¹⁹ Sumbala eme ngala ngi fôlo, ka ngi vu kuala muthu! Maji nga di bhange ngi mubhika ua ene oso, phala ngi tene kukombola ni kunganhala kilunga kia dikota kia athu, kioso ki nga tena.

²⁰ Kioso ki ngi kalakala mu ʼaxaxe ka Jijudé, ngi kala ngi Judé, phala ngi kombole Jijudé. Sumbala eme ki ngala bhoxi dia Kitumu kia Mozé; maji kioso ki ngi kalakala mu ʼaxaxe ka Jijudé ala bhoxi dia Kitumu, eme uami ngʼ ila kala ngala bhoxi dia Kitumu, phala ngi nganhale o Jijudé, akua Kitumu.

²¹ Kiene kimoxi ue kioso ki ngi kala mu ʼaxaxe ka ió ki Jijudé, a kambe o Kitumu kia Mozé, eme uami ngi kala ku kanga dia Kitumu, phala ngi tene kunganhala ió ki Jijudé. O kiki, ki mukonda eme nga fulu kutumaka o Kitumu kia Nzambi, mukonda ni kidi kiene eme ngala bhoxi dia Kitumu kia Kristu.

²² Oso a bhuila mu kuxikana, ngi kala-nâ kala eme nga bhuila uami, phala ngi kombole oso a bhuila. Ngi kala ngi kioso kua ene oso, phala mu ndunge joso, ngi tene kubhulula-ku amoxi-mu.

²³ Ima ioso iii ngi i bhanga mukonda dia Njimbu Iambote, phala ngi tambule ku mbote iê kumoxi ni akuetu.

²⁴ Enuʼ enu mua kʼ ijiia kuma bhu dikanga bhua di kuata o makuenze mu kulenga, ene oso a lenga muene, maji muthu umoxi ngó u tambula o kijimbuete kia kikoue. Kiene ue, enu uenu lengenu, phala mu tambule o kikoue.

²⁵ Uoso ue u di longa o nguzu bhu matonokenu, u kala bhoxi kia ijila ia nguzu, u i kumbidila muene mu ima ioso. Muene-phe u ki bhangela o kutambula o kitundu ki lela kindala. Maji etu-phe tu ki bnhangela kutambula o kitundu ki kia kà lela dingi.

²⁶ Kala kiki, kiene ue ki ngi lenga katé bhu mbambe, phala ki ngiie ni kubelajaka. Ngi di bhanga ue kala ngi mutonoki a bokisi, home jê ki ji lueza.

²⁷ O mukutu uami-phe ngi u bhana jihuxi katé ki ngi u tolola, hé uenda ni kubelesela, mbé kuiengesa kuila, ku thandu dia kulonga athu o maka ma Njimbu Iambote, eme-muene hinu ngi dianguka.