I Kolindo 7 - O Mikanda Ikola

Phaulu u vutuila a mu ibhula o ukaza ni ukudi

¹ Kiki-phe, nganda kuzuela ku maka ió u mua ngi sonekena. Ngambe kuma ki uabha se diiala di kamba kusakana muhatu.

² Mukonda-phe dia kuila sai-ku undumbu uavulu, inda kala diiala di kala ni muhatuʼê, kala muhatu u kala ni muadi uê.

³ O diiala di bhange muhatu mʼ onzo o mbote ia mu tokala ku i bhana, o muhatu ue kiene ki a bhana o mbote ia tokala ku diiala mʼ onzo. Diiala u bhanga kia uabhela o muhatu, o muhatu u bhanga kia uabhela o diiala mʼonzo.

⁴ O muhatu ka di vu dingi kukutu uê-muène, kuma mukutu uê ua tokala kiá o diiala. Kiene kimoxi ue o diiala, ka di vu dingi mukutu uêmuène, mukonda o mukutu uê ua tokala kiá o muhatu.

⁵ Kiiadi kiâ kana muthu u di tuna mukuá, kikale ngó se kiiadi kienu mua bangana ku ki bhanga mu kithangana, phala mu te miẋima mu kusamba. Kithangana-phe kuila kia bhiti, mu takana dingi kala ki mua mu bhanga kiá, phala Satana ka mi diangule mukonda dia kukamba o nguzu ia ku di langa.

⁶ Kiki nga ki ambela-phe mu ku mi bhana ndunge, ki ngi ki ambela-phe mu ku mi bhana kijila.

⁷ Maji eme-muène nginda-phe athu oso a kale uila ki ngalʼ eme. Maji-phe ue kala muthu uala ni ujitu uê ua mu bhana Nzambi; iú ujitu uê uengi, iú ujitu uê uengi.

⁸ Ngʼ ambela-phe o makudi ni atudi, kuila ki uabha se a kala sé kukazala uila ki ngalʼeme.

⁹ Maji se ka tena-phe ku di tumina o jihanji jâ, kota-phe a sakane; kuma o kusakana ki ku soko ni kuuama mu jihanji.

¹⁰ Phala oso a sakana kiá, ngala ni kijila kia ku a bhana, ki kiami eme, maji kia Ngana, kuila: O muhatu ua sakana, ka di ambudise ni muadi uê.

¹¹ O ki kala ua di ambudisa-nê, a kale ku ukudi; o kia kamba kukala ku ukudi, a di ondolole dingi ni muadi uê. O diiala ue kiómuene, ka di ambudise ni muhatuʼê.

¹² Phala athu amukuá-phe, ngambe eme, Ngana ka zuela: Se phange uala kidistá mudietu u kala ni muhatuʼê ua kambe kuxikana, maji uetaia ku di tuma-nê, muène ka mu ambudise.

¹³ Ni muhatu uoso uala kidistá mudietu, hé u kala ni muadi uê ua kambe kukala kidistá, maji uetaia o kudituma-nê, ka ambudise muadi uê.

¹⁴ Kuma o diiala dia kambe kukala kidistá, a mu xikina kuala Nzambi mukonda dia kukala ni muhatu ua xikana; o muhatu ua kambe kukala kidistá, a mu xikina kuala Nzambi mukonda dia kukala mu umoxi ni muadi uê ua xikana. Hé ki kiene, anʼ enu ejù kala anʼ a matumbu a kambe kuijiia Nzambi. Maji o kiki-phe, ala anʼ a ngene a Nzambi.

¹⁵ Maji o diiala mba muhatu ua kambe kuxikana-phe, kia bhindamena ku di ambudisa, aiê. Mukonda bhu kaẋiʼabha o diiala uala kidistá, mba muhatu uala kidistá, ua jituka phala kutena kusola. Mukonda Nzambi ua tu ixanena kukala ni muenhu ua kutululuka.

¹⁶ Eie u muhatu ua kidistá, ua kʼ ijiia kiebhi se muadi ué u mu bhulula? Ni eie u diiala dia kidistá, ua kʼ ijiia kiebhi se muhatuʼé u mu bhulula?

Kulaiela mu kutumaka Nzambi!

¹⁷ Maji-phe kala muthu a kale mù kioso kia mu uanena Ngana, kioso o kikexilu kiê kia mu ixanena Nzambi, kiene kiá ki enda. Kiene ki ngene ku a longa mu Jingeleja joso.

¹⁸ Muthu se a mu ixana a mu saie kiá, iú uetaia o kixanu kia Nzambi, ka biluke muthu a kambe o ku mu saia.

¹⁹ O kukala u muthu a ku saie, ki kima; o kukala u muthu a kambe o ku ku saia, ki kima. Kia kate-ku o kualuka ijila ia Nzambi.

²⁰ Kala muthu a xale mu kikexilu kiê muoso mua mu sange, iú uetaia o kixanu kia Nzambi.

²¹ A ku ixana kuala Nzambi ki uala u mubhika? Ki ki ku kuatele kima. Maji se ua tena kutambula ufôlo-phe, kiauabha, inda u bhanduluke.

²² Kuma uoso a mu ixana kuala Ngana mu ubhika muala, ua biluka fôlo ia ngene ia Ngana. Kiene ue kimoxi o muthu uala fôlo a mu ixana kuala Kristu, uala mubhikʼ a ngene a Kristu.

²³ Nzambi ua mi sumbu ni suilu. Uila kiki, kana kukala dingi mu abhika a athu.

²⁴ Enu jiphange, kala muthu muoso mua mu sange o kixanu kia Nzambi, muene mu a xala ni kuendela bhu pholo ia Nzambi.

O makudi ni atudi a ahatu

²⁵ Ki tu kuata ku maka ma makudi a anʼa ilumba, ki ngala ni kijila kia ngi bhana Ngana. Maji ngi mi longesa-phe kioso ki nga fika, eme uami ngi muthu a ngi kuatekesa kuala Ngana kukala fiiele.

²⁶ Eme nga fika-phe kuma ki uabha, o diiala kuxala kioso ki ala, mukonda dia ibhidi mu izuʼ umu, i tua mu bhita.

²⁷ Se uala u muthu ua sakana ni muhatuʼé, kana kusota ku di muangununa-nê. Se u muthu uala u dikudi, kumoneka muhatu, kana kusota muhatu.

²⁸ Ki uila-phe u sakana, ki kituxi ki ua te. O monʼ a muhatu ue kia sakana, ki kituxi kia te. Oso a sakana-phe andù kala ni jingongo mu xitu, maji eme-phe nginda ngi mi tebhunuina-ku.

²⁹ Ngambe-phe kiki, jiphange, kuma o thembu ia butu, kua bhingi ku pholo ku tuia, oso ala ni ahatuʼâ, a kale uila kala-nâ.

³⁰ O oso a dila, kele kala ala ni malamba; O oso a mu kuolela, kele kala a mono mbote; Oso a sumba, kele kala avu kimbamba kiokio kia sumbu.

³¹ O oso a sota imbamba iambote mu ngongo mumu, ka landukile kiá ngó iene mu iene. Kuma o funza ia mundu iú, ki ualʼ iki, ki i nange kubhita.

³² Eme nginda-phe ki mu kala ni jihele. Uoso uala dikudi, u kala ngó ni hele ia kikalakalu kia Ngana, mukonda uala kuinda kioso kia uabhela Ngana.

³³ Maji uoso-phe uala dikaza, u kala ni hele ia ima ia mu ngongo, mukonda uala kuinda kubhanga kioso kia uabhela muhatuʼê.

³⁴ U tandanganha mukonda ala ku mu sunga ku mbandu jiiadi. O mu kuzuela-phe ku mbandu ia ahatu, kutale o atudi, uixi o makudi, ene a lalamena ngoho o kikalakalu kia Ngana, mukonda andala a di bhakula kua Ngana ni mukutu ni nzumbi. Maji o muhatu ua dikaza-phe u lalamena o ima ia mundu iú, mukonda u mesena mu ioso, kioso ki a uabhela muadi uê.

³⁵ Kiki-phe nga ki zuelala phala ku mi kuatekesa, mu bhanduluke. Ki ngi mesena ku mi fuisa mu dibhebhe. Maji nga mesena ku mʼ idikiza kioso kia fuama kubhanga, phala mu kale mú xibhidila Ngana ni muẋima uoso, sé kutandanganha.

³⁶ Oso-phe a di solo ngó, maji nguauâ dingi kukazala, eme-phe ngʼ a tangela kuila: Se mu kubhanga kiki o monʼ a diiala ua fika kuma kianda kubhangʼ iki ku kilumba kiê ki ki fuama, mukonda o henda ia mu zolo na-iu hanji iavulu, iú ua bhindamena u sakana-nê—Kuabhu-phe, a sakane! Kana-ku kituxi mu kubhanga kiki.

³⁷ Maji-phe se o monʼ a diiala ua kolokota ni muẋima uê, nguaiê dingi kusakana, uendi inda u kala ku ukudi, iú uala ni nguzu ia kuditumina o jihanji jê, iú ua te kiá ku muẋima kioso kianda kubhanga—kuabhu-phe, muene ue ua bhange kiambote, mu kukamba kusakana ni monʼ a kilumba.

³⁸ Mu kienʼ iki, uoso ua sakana kilumba kiê, ua bhange kiambote; uoso-phe ua fulu kusakana, ua beta kubhanga kiambote.

³⁹ Muhatu se ua sakana ni muthu, ua kutiua kioso muadi uê ki ala hanji ku muenhu. Maji o muadi uê se uafu, muene ua kutunuka, u sakanê ni uoso ua mu andala. Maji kikale-phe ngó ukaza mua Ngana.

⁴⁰ Inda-phe o kuzediua kuê kota, se u xala ku utudi. O kiki kiene ki nga xinganeka eme, nga di fika ue kukala ni Nzumbi ia Nzambi.