I Kolindo 6 - O Mikanda Ikola

Akua Ngana a tokala a di tetulula mudiâ

¹ Se muthu mudienu u kala ni muiônga kua mukuá, kifua u bhumina kuia kufunda-nê bhu pholo ia isueia, o bhu pholo ia athu a Nzambi nguê kuia-bhu?

² Inga enu ki mua kʼ ijiia kuma athu a Nzambi hadi a kà fundisa o mundu? Se muedi kuma ene a kà fundisa o mundu, kifua tumilonga tuofele tutu mu tu tokoka?

³ Kifua ki mu kʼijiia kuma hadia tua kà fundisa katé ni ji-anju? Hé kiene, o ima ia muenhu iú tu i lembua kiebhi!

⁴ Se muambe-phe kufundisa ima ia muenhu iú, kana ku ta athu ku kibhuna, oso ka sedivila mu Ngeleja, phala kufundisa o milonga ienu.

⁵ Nga ki ambela ku mi kuatesa jisonhi! Manhi mudienu mua kambe muadikime u tena kutetulula o milonga ia jiphange jê?

⁶ Nga fika sai-mu! Maji kua mu bhinga-phe o phange uia mu kufunda ni phange iê katé ni bhu pholo ia athu ka xikana!

⁷ Kana bá, kiene ue kisemu, kuila mu ʼaxaxe kenu mu kala ni madimanda mudienu! Ki inda mu ehelela o ku mi bhanga kiaiibha? Ki inda o ku mi nhana?

⁸ Enu-phe nguenu! Muendi mu vutula uenu ku di bhanga kiaiibha, kala muthu ni mukuâ, ni ku di nhana, muthu ni mukuâ, o ene jiphange jenu ji mua mu bhanga kienʼ iki!

⁹ Inga ki mu kʼ ijiia kuma athu abhengalala ka tena kubhingana mu Utuminu ua Nzambi? Kana ku di nganala, kuma ni jindumbu, ni abhezi a iteka, ni akua jiphanda, ni mâla a ilalu, ni mâla akua kubhanga ufusa ni mâla ni akuâ.

¹⁰ Ni mii, ni akua luimbi, ni jihôlua, ni axingi a jindaka, ni ingulungumba, ene oso kà tena kubhingana mu Utuminu ua Nzambi.

¹¹ Enu amoxi-mu, kiene ki mua kexile. Maji a mi sukula ku ituxi, a mi lumbila kua Nzambi, o Muène iú ua mi xikina bhu pholo iê mukonda dia Jezú Kristu, Ngana ietu, ni mukonda dia Nzumbi ia Nzambi.

O mikutu ienu idiandu ia ngene ia Kristu

¹² Sai ni muthu uila: Eme ngi tena kubhangʼami ioso i nga mesena. Xi, kiene muene! Maji-phe ima ioso ki i ku fuama! Kuma eme uami ngi tena kuila ngixi: Kima kioso-kioso ngi bhangʼami! Maji nguami kuehela kima ni ki kala mu ku ngi tumina kala ngi mubhika.

¹³ Sai ni iú uanda kuila uixi: O kudia a ku bhanga phala mu mala, o mala a a bhangela phala o kudia! Xi, kiene muene. Maji o Nzambi-phe hinu kiiadi kiâ uanda ku a bhuisa-ku. O mukutu uetu-phe ki u tokala ku u bhakula mu kubhikila undumbu, maji ua tokala kubhikila Ngana. O Ngana muène ua tokala ku uzala o mukutu uetu.

¹⁴ Nzambi-phe ua fukunuine Ngana, ni etu hadia ua kà tu fukununa mu nguzu iê.

¹⁵ Kifua ki mu kʼijiia, kuma mikutu ienu idiandu ia ngene ia Kristu? O ki ngalʼ iki kifua ngi katula idiandu ia ngene ia Kristu, hé ngi i bhanga idiandu ia muhatu ua kidianzunga? Kana, ki kiene!

¹⁶ Inga ki mu kʼ ijiia kuma o diiala uoso u di banda ni kidianzunga u di bhanga-nê mukutu umoxi? Kuma a ki soneka mu Mikanda Ikôla, exi: Ene kiiadi kiâ a kala xitu imoxi.

¹⁷ Maji uoso ua di bande ni Ngana-phe, u kalanê nzumbi imoxi.

¹⁸ Undumbu lengenu-u! Kioso kituxi ki ta o muthu, kituxi ku kanga dia mukutu uê. Muthu uoso-phe u ta phanda, mukutu uê-muène ua u te kituxi.

¹⁹ Inga ki mu kʼ ijiia kuma o mukutu uenu tembulu ia Nzumbi Ikôla, uene moxi dienu, mua mu tambula kua Nzambi? Enu-uenu ki mua di vu, (ki mu di tokala dingi enu-uenu).

²⁰ Kuma a mi sumbu ni suilu. Uila kiki, fumanesenu Nzambi ku mikutu ienu, ni ku jinzumbi jenu, kuma ja tokala Nzambi.