I Kolindo 5 - O Mikanda Ikola

Phaulu u bazela akua Kolindo mukonda dia ufusa

¹ Kia fumana kuma sai mudienu undumbu, undumbu uene ua bhingi né ku matumbu ki u moneka. Kuma ngʼ evu kuila sai diiala mudienu ua sakana ni manhʼâ ia katumba, mukaji a tatʼâ!

² Enu-phe muala kiebhi ni izala iosuʼ oio? Kia mi fuamene kukala ni mala mba avulu, phala uoso ua bhange kienʼ iki ku mu tubhula mudienu.

³ Ni kidi kiene, eme sumbala ku mukutu ngala kuengi, maji mu nzumbi eme koko ku muala enu. O ki ngedi ngala kuenhoko ni enu, mu dijina dia Ngana Jezú, ngêlesa kia muenʼ ió ua bhange o kima kiaiibha kiosuʼ iki.

⁴ Kioso ki mu bhongoloka, nganda kukala ni enu mu nzumbi. Kienhokio, mu nguzu ia Ngana ietu Jezú, uanda kukala ue kuenhoko ni etu kumoxi,

⁵ Enu muthu u kala kiki mu bhakuidienu Satana, phala a mu buikise o mukutu uê, maji o nzumbi iê phala i bhuluke mu kizuua kia Ngana Jezú.

⁶ Ku di thatha kuenu ki ku uabha! Mbata o Sabhuʼ oio enu mua ijiia kiambote kuma Kakifulu-fulu kofele ka sambuka dikende dioso.

⁷ Kombenu-phe o kifulu-fulu kiokulu kia ituxi, nda mu xale ni kuzela kua kidi. Bhenhobho mbé mu kale mu dikende diobhe, kuma muala ku hangala. Mukonda o fesa ietu ia Phasu, ioiudike kiá, kiosuʼ iki Kristu, o Kambudi ka Phasu ietu a tu satela-nê kiá.

⁸ Uila kiki, tu bhangienu o fesa ia Phasu ietu, kana ni mbolo ia kifulu-fulu kiokulu, o kifulu-fulu kia ituxi ni jiphanda, maji ni mbolo ja hangala, o mbolo ja kuiuka ni kidi.

⁹ Nga mi sonekena mukanda ua mukua ngixi kana ku di tambulula ni jindumbu.

¹⁰ Ki ngambe-phe ngixi mu gongo mumu enu mu di muangununa ni jindumbu ku mundu, ni jihabhu, ni afumbi, ni abhezi a iteka, kuma hé muambe ku a ebha enʼió, ki bhinga o mu ngongo mu tunda-mu.

¹¹ Maji ki tualʼ iki, eme ngambe kuila se muthu a mu ixana phange ietu u kala ndumbu, mba kinjenje, mba mubhezi a iteka, mba muxingi a jindaka, mba hôlua, mba mukua kutatela akuá ima ka i bhange, mba munhani, athu a kala kiki, kana ku di tambulula-nâ, né ngó kuxikama mu kudia-nâ ku meza.

¹² Kuma eme ngi fundisa kiebhi o athu ku kanga? Maji athu mu kilunga ki bhinga enu mu a fundisa.

¹³ Athu-phe ku kanga, Nzambi muene ua kà a fundisa. Kala ki ambe o Madivulu a Nzambi: Muthu ió ua bhukumuka mu tubhudienu mudienu.