I Kolindo 4 - O Mikanda Ikola

Jingunza ni alundi a Nzambi

¹ Etu tua tokala kuila enu mu tu banza kuma tu jingunza ja Kristu, tu imbadi a tu tuika kulonga o kidi kia ijinganu ia Nzambi.

² Kunu-phe uoso a mu tuika o kikalakalu kiki, u bhinga u kala fiiele.

³ Maji eme ki ki ngi kate kiavulu, se enu mu ngi tokuesa, mba bhu kionge kia athu oso-oso bhua ngi tokuesa. Eme-muène ngó ue ki ngi di tokuosa.

⁴ Kuma ki ngejiia kikuma ki ngala na-kiu. Maji ki bhene ngó bhu ngi lungila. U ngi tokuesa muène Ngana.

⁵ Uila kiki, kana kuêlesa muthu kiluua a bhixila bhu thembu iê. Kingenu o kufundisa kua kà suka-ku kia kéza Ngana. Muène uà kʼela iosueke mua vundu u i bheka bhua zele, ni ixinganeku iala mu miẋima ia athu u i tukulula. Kiene muthu ni muthu kia ka tambula kua Nzambi o diximanu diê dioso dia mu tokala.

⁶ Ima ienʼ iii-phe, enu jiphange jami kixanga ki nga mi tela, mu ku di tanga eme-muène ni Apolo. Nga tange etu kiiadi kietu, kifua kijimbuete, mukonda dia ku mi kala ni henda, phala mu di longe ki ambe o Sabhu kuila: Kana kusomboka ima ioso iòsoneke. Kana ue muthu ukala ni izala ia kuximana muthu umoxi, o mukuá hé u mu tènda.

⁷ Eie nanhi muène ua kubhangesa kuila akuenu oso u a tunda mu unene? Ngana Nzambi ki muène ua kubhana ioso i uala na-iu? Abha-phe, phala-hi eie u di zangeleka, kala o ioso i uala na-iu, Nzambi ki muène ua ku bhanaiu?

⁸ Enu ioso i mua bhindamena, muala na-iu kiá! Muala kiá mu jimvuama! Mua tambula kiá ungana, etu-phe kana! Tamanu mua kexile mu jisobha mu kidi kiene, mbé etu uetu ni tu kale ku ungana mu kutumina kumoxi ni enu.

⁹ Kuma eme nga fika etu tu Jipoxolo, Nzambi ua tu bhana o kididi kia sukidila kuema. Ua tu kingisa kala athu a xikamena ku a jibhila bhu mesu a mundu. A tu bhake bhu pholo ia ngongo ioso, ni ji-anju ni athu a tu te mesu.

¹⁰ Etu tuala tu ioua, mukonda dia Kristu, enu-phe mua Kristu mu jinjimu! Etu tua bhuila, enu mua suina; etu tu tambula malebhu, enu mu tambula o fuma.

¹¹ Tua mu tala hadi katé ni kithangana kienʼ iki, tuedi ni nzala, ni dinhota. Tuedi ni kuzuata o makoza, ni kutambula o kibetu. Tua lémbua o kididi kia kidi bhu tu tunga.

¹² Tu tala hadi mu kukalakala ni maku phale kumona kia kudia. Ela a tu xinga, etu tu benzela. Ela a tu zukutisa, etu tu kolokota ni kinhenge.

¹³ Ela a tu lebhula, etu mu kuvutula tu dionda. Katé bhu tuezʼ abha tua kituka tu dixidilu dia mundu, tu makolôlo a ima ioso mu ngongʼ umu.

¹⁴ Ima ienʼ iii ki nga i soneka mu ku mi kuatesa enu jisonhi. Maji mu ku mi dimuna, kala mu tuana tuami muène, tata!

¹⁵ Kuma né-mbé mu kala ni kuinhi dia midi dia jimesene ji mi longa mua Kristu, ki mu vudila kukala ni jitata, mukonda muala ngó ni tata imoxi iene. Kuma eme nga mi vuala mua Kristu Jezú, kioso ki nga mi bhekela o Njimbu iê Iambote.

¹⁶ Uila kiki, nga mi diondo-phe, kalenu mu afikixi ami eme.

¹⁷ O mukonda dia kiki, kiene ki nga mi tumikisina Timote. Muène monʼ amiʼ a henda, ua fiiele mua Ngana. Muène uanda ku mi kuatekesa mu kulembalala o maulongelu mami u ngene mú kaiela ku muenhu ua ubhe mua Kristu, kala ki ngene kulonga kuene kuoso mu Jinga-leja joso.

¹⁸ Amoxi-moxi-phe ala ni izala, a ngi fika kuila kuenhoko ki nganda kuiaku mu ku mi kunda.

¹⁹ Maji ngi mi sanga-phe kindala, Ngana kia ki mesena. Bhenhobho-phe nga kà ebhula enʼió ala ni izala, se a bhanga-hi, kana ngó mu kuzuela kuâ, maji o nguzu iâ.

²⁰ Kuma o Utuminu ua Nzambi ki uende ni kuzuela, maji ni nguzu.

²¹ Enu-phe mua mesena kiebhi? Ngi mi sanga ni muxi ua kubeta, inga ngi mi sanga ni muẋima uezala ni henda ni uthu ua mbote?